Papa Françesku: në Kishë nuk ka padronë e punëtorë
R. SH. - Vatikan
Dhuratat e Shpirtit Shenjt krijojnë atmosferë paqeje, ndërsa thashethemet e rrënojnë harmoninë; e të krishterët janë të thirrur të marrin, për të dhënë, si të ishte shpirti “magazinë”. Këto, thënë me dy fjalë, reflektimet e Françeskut në katekizmin e audiencës së përgjithshme, mbajtur në Sheshin e Shën Pjetrit e kushtuar përsëri “sakramentit të Krezmimit”, duke sqaruar se i krishteri është i thirrur të jetë “dhuratë për të tjerët”.
Shpirti Shenjt na hap udhën për të hyrë në bashkësi
Shpirti Shenjt na shpërqendron nga vetvetja, nga “uni”, për të na çuar tek “ne”, tek bashkësia e krishterë. E Krezmimi i bashkon më shumë besimtarët, i bën gjymtyrë të gjalla të korpit mistik të Kishës, misioni i së cilës në botë vijon përmes ndihmesës së të gjithë atyre, që janë pjesë e saj. Kisha duhet përfytyruar si organizëm i gjallë, i përbërë nga njerëzit. “Ndokush mendon se në Kishë ka padronë e punëtorë - kujtoi duke folur lirisht Papa Bergoglio - Po nuk është kështu. Kishë jemi të gjithë. Të gjithë kemi përgjegjësinë ta shenjtërojmë njëri-tjetrin, të kujdesemi për njëri-tjetrin”.
Thashethemet e rrënojnë veprën e Shpirtit Shenjt
Ipeshkvi është shërbyes i drejtëpërdrejt i Krezmimit, ndërsa inkorporimi kishtar shprehet me shenjën e paqes, që e mbyll ritin: marrim “Shpirtin Shenjt dhe paqen”, “e këtë paqe duhet t’ua japim të tjerëve”. Ashtu si në shumë raste, Papa Françesku dënoi përsëri zakonin e keq të përgojimit, të shpërrallimit, të marrjes nëpër gojë të njërit e tjetrit, gjë që i jep fund paqes së shpirtit njerëzor. “Përgojimet janë luftë - ngulmoi - ndërsa dishepujt e Krishtit duhet të jenë ‘burra e gra të paqes’”. Nuk duhet, prandaj, ta shkatërrojnë veprën e Shpirtit Shenjt me gjuhën e tyre të gjatë.
Simfonia e Shpirtit Shenjt
Krezmimi merret një herë të vetme, por energjia shpirtërore, që krijohet nga vajimi shenjt vijon në kohë. Sepse Shpirti Shenjt është krijues e jo përsëritës e dhuratat e tij krijojnë simfoninë. Prej këndej, ftesa e Papës Bergoglio për të mos e mbyllur “Shpirtin Shenjt në kafaz”, për të mos ia ndalur hovin erës, që fryn për të na shtyrë të ecim drejt lirisë, për të mos e shuar Zjarrin flakërues të dashurisë së krishterë!