Kërko

Cookie Policy
The portal Vatican News uses technical or similar cookies to make navigation easier and guarantee the use of the services. Furthermore, technical and analysis cookies from third parties may be used. If you want to know more click here. By closing this banner you consent to the use of cookies.
I AGREE
Capriccio sinfonico
Programe Podcast

Shkëlqimi i rigjetur i Notre-Dame de Paris

Pak ditë pas rihapjes, pesë vjet pas zjarrit të dhimbshëm të 2019, një vështrim në ngjyrat e gurit të restauruar dhe shkëlqimin e Katedrales, me Kryeipeshkvin e Parisit Laurent Ulrich. Vetë prelati do të kryesojë kremtimin me rastin e rihapjes së Katedrales në mbrëmjen e 7 dhjetorit 2024, në të cilën do të jenë të pranishëm presidenti Francës Emmanuel Macron dhe krerë të shumtë shtetesh dhe qeverish. Të dielën 8 në ora 10.30 Mesha inauguruese me ritin e kushtimit të altarit kryesor.

R.SH. / Vatikan

Pak ditë pas rihapjes, pesë vjet pas zjarrit të dhimbshëm të 2019, një vështrim në ngjyrat e gurit të restauruar dhe shkëlqimin e Katedrales, me Kryeipeshkvin e Parisit Laurent Ulrich. Vetë prelati do të kryesojë kremtimin me rastin e rihapjes së Katedrales në mbrëmjen e 7 dhjetorit 2024, në të cilën do të jenë të pranishëm presidenti Francës Emmanuel Macron dhe krerë të shumtë shtetesh dhe qeverish. Të dielën 8 në ora 10.30 Mesha inauguruese me ritin e kushtimit të altarit kryesor.

Pas më se pesë vitesh punë intensive, Notre-Dame de Paris, e shkrumbuar nga zjarri tragjik i 15 prillit 2019, do t’i rihapë dyert ditën e festës së Shën Ambrozit, më 7 dhjetor 2024. Ngjarja, e shumëpritur në Francë dhe në mbarë botën, do të kremtohet me një ceremoni madhështore, që do të nisë me bekimin e do të vazhdojë me Magnificat, Te Deum dhe Vesprit. Të nesërmen, 8 dhjetor, Festa e Zojës së Papërlyer, katedralja do t’i hapë rishtas dyert për besimtarët dhe vizitorët, me hyrje falas, me kërkesë përmes faqes zyrtare të internetit ose një aplikacioni.

Punë e jashtëzakonshme restaurimi

Në realizimin e projektit të restaurimit morën pjesë qindra zejtarë, arkitektë dhe restauratorë, të angazhuar për t’i rikthyer Notre-Dame - Zojës sonë - shkëlqimin e saj origjinal. Maja, e projektuar nga Eugène Viollet-le-Duc, simbol i pagabueshëm i horizontit të Parisit, u rindërtua besnikërisht dhe vetrazhet, që flasin për shekujt e historisë dhe të fesë, u restauruan me kujdes të përpiktë. E edhe çatia, e njohur me emrin "pylli" për strukturën e saj komplekse mesjetare prej druri (e, për këtë arsye, e rrezikuar të ndizet me një shkrepëse, siç ndodhi fatkeqësisht), u rindërtua duke përdorur teknika novatore dhe materiale të qëndrueshme.

Ky monument madhështor, simbol i Parisit, i Francës dhe i Kishës universale, një nga Katedralet par excellence, ndër monumentet më të vizituara në botë, po përgatitet të mirëpresë përsëri 12 deri në 15 milionë vizitorë në vit, duke tejkaluar shifrat e mëparshme, përmes një sistemi rezervimi online, garant i një përvoje paqësore dhe të sigurt për të gjithë.

Simbol i kulturës franceze dhe botërore

Notre-Dame-Zoja e Parisit, nuk është thjesht kryevepër e arkitekturës gotike, por vend që tregon historinë dhe identitetin e Francës. E nisur në  vitin 1163 dhe e përfunduar në 1345, katedralja kaloi nëpër shekuj historie: në çastet e lavdisë e në periudhat e braktisjes. Gjatë revolucionit francez pësoi dëmtime serioze dhe pothuajse u harrua. Por pikërisht atëhere u ringjall. Falë Victor Hugo-it dhe romanit të tij të famshëm Notre-Dame de Paris (1831) (përkthyer në gjuhën shqipe me titullin “Katedralja e Parisit”, përkthim i shkëlqyer i përkthyesit shqiptar Bujar Doko), u kthye në qendër të vëmendjes.

Hugo shkroi: "Koha është e verbër, e njeriu, budalla". Me këto fjalë vuri në dukje çkujdesjen e pafalshme, që po e çonte në rrënim një prej simboleve të qytetit dhe të kulturës europiane. Kjo thirrje alarmi jo vetëm që e shpëtoi Notre-Dame, por nxiti një interes ripërtërirë për trashëgiminë gotike, duke kulmuar me restaurimin e viollet-le-duc në shekullin e 19-të.

Një ngjarje historike

Më 7 dhjetor, në ceremoninë e rihapjes do të marrin pjesë presidenti francez Emmanuel Macron, i cili do të jetë mjeshtër i ceremonive, dhe lider të shumtë ndërkombëtarë, përfshirë edhe Presidentin e Republikës Italiane Sergio Mattarella. Prania e kreut të shtetit italian, i cili zgjodhi të heqë dorë nga premiera tradicionale e Teatro alla Scala për të qenë i pranishëm në Paris, flet vetë për vlerën universale të Notre-Dame si simbol i qëndrueshmërisë dhe shpresës. Parashikohet edhe një festë që  gërsheton elemente fetare, kulturore dhe civile, në përkim me rolin historik të Katedrales, si vend takimi dhe dialogu.

Rilindje, që shikon nga e ardhmja

Zjarri i vitit 2019 e tronditi thellësisht Francën dhe mbarë botën, por tregoi edhe aftësinë e njerëzimit për t'u bashkuar për një kauzë të përbashkët. Menjëherë pas katastrofës u mblodhën mbi 800 milionë euro donacione nga individë, kompani dhe institucione në mbarë botën. Këto fonde bënë të mundur përballimin e një prej sfidave më komplekse në historinë e restaurimeve arkitekturore.

Rilindja e Notre-Dame është edhe mundësi për të reflektuar mbi kuptimin e trashëgimisë historike dhe kulturore. Siç shkroi, edhe një herë, Victor Hugo: “Një ndërtesë e madhe, është si libër i madh; çdo gur është një fjalë". Katedralja nuk është thjesht vend fizik, por mesazh universal që flet për fenë, historinë, bukurinë.

Simbol për të gjithë

Notre-Dame nuk i përket një kombi apo një feje të vetme, por është padyshim trashëgimi universale. Siç theksoi Jean-Luc Mélenchon pas zjarrit: "Notre-Dame nuk i përket askujt, ose ndoshta u përket të gjithëve". Është vend ku bashkëjetojnë feja, arti, historia dhe shpresa e krishterë për paqen, duke krijuar një lidhje universale që kapërcen ndarjet kulturore dhe fetare.

Me rihapjen e saj, katedralja po përgatitet të jetë edhe një herë vend takimi dhe frymëzimi për brezat e ardhshëm, duke kujtuar se edhe pas tragjedive më shkatërruese, është gjithmonë e mundur të rilindësh.

05 dhjetor 2024, 14:58
Prev
April 2025
SuMoTuWeThFrSa
  12345
6789101112
13141516171819
20212223242526
27282930   
Next
May 2025
SuMoTuWeThFrSa
    123
45678910
11121314151617
18192021222324
25262728293031