“I Viaggi del Cuore”, shtegtim në Itali dhe jashtë saj ndërmjet bukurive natyrore, artit dhe aktualitetit

R.SH. - Vatikan

“I Viaggi del Cuore”- “Shtegtimet e zemrës”, program i drejtuar nga Davide Banzato, rikthehet nga data 14 maj, në orën 08.50 në Canale 5 (episodet do të transmetohen edhe në kanalin ndërkombëtar Mediaset). Programi rikthehet në ekran me rastin e përvjetorit të Dukjeve të Zojës së Fatimës. Prandaj shtegtimet e zemrës do të nisen nga Fatima, të diel, më 14 maj 2023, në vise të ndryshme, të cilat do t'ju bëjnë të jetoni çaste vërtet të paharrueshme, duke vizituar qytete dhe vende me natyrë mahnitëse, me histori, art, bukuri dhe kulturë, e duke ju shoqëruar në ecjen mbi gjurmët e disa shenjtorëve të mëdhenj, autorë të kthesave historike të njerëzimit.

Ndalesa në Portugali

Dy episodet e para do të jenë në Portugali, me Don Savino Lombardin, udhërrëfyes i L'Opera Romana Pellegrinaggi (Veprës Romake të Shtegtimeve). Do të kemi rastin të jetojmë një shtegtim të vërtetë, që do t'i krijojë shikuesit mundësinë të zbulojë mrekullitë historike dhe të thellohet në mesazhe shumë aktuale. Në Fatima, ku Zoja iu duk tre barinjve të vegjël, do të tregohet historia e dukjeve, do të ketë dëshmi të jetuara dhe do të thellohet e fshehta e Fatimes, e ndarë në tri pjesë, me ngjarje që kanë ndodhur në histori dhe që, siç tha Papa Benedikti XVI, "do të ishte gabim i rëndë nëse do të besohej se mesazhi profetik i Fatimes tashmë është kryer plotësisht".

Nga Lisbona në Sardenjë

Episodi i dytë do t'i çojë shikuesit në Lisbonë dhe Coimbra, për të rigjurmuar origjinën e historisë së Shëna Ndout të Padovës. Do të mund të vizitojnë edhe Tomarin, me një nga vendet më magjepsëse në botë, Manastirin e Kalorësve Templarë, një mjedis i UNESCO-s. Vend i Trashëgimisë.

Episodi i tretë, që do të realizohet në bashkëpunim me Rajonin Autonom të Sardenjës - Drejtoria e Përgjithshme e Presidencës - Shërbimi i Komunikimit Institucional - do të na çojë në një rajon unik, të pasur me histori, art dhe kulturë. Sardenja, e njohur për bukurinë e saj piktoreske, me detin, ishujt dhe fshatrat e saj, është gjithashtu një nga viset turistike më të kërkuara. Ne do të zbulojmë disa nga shenjtorët e saj më të nderuar, Shën Efizion, Shën Barbarën dhe Shën Salvatorin nga Horta. Në Cagliari do të prekim kushtimin dhe historinë e Shën Efisios. Një tjetër ndalesë magjepsëse do të jetë Nora, një nga vendet më të njohura dhe më të rëndësishme arkeologjike të Sardenjës. Në Iglesias, në zemër të malit, do të hyjmë në Shpellën e Shën Barbarës, një kryevepër e natyrës.

Shtegtim në Lourdes dhe më pas, në Turqi

Shtegtimet e zemrës do të vazhdojnë më pas për në Lourdes, me 3500 ushtarë italianë udhëhequr nga Imzot Santo Marcianò, kryeipeshkëv i zakonshëm ushtarak i Italisë, prijës për edicionin e 63-të të shtegtimit ushtarak ndërkombëtar. Shtegtimi do të mbledhë së bashku më shumë se 14,000 ushtarë nga 42 kombe dhe do të flasë për paqen, në sa përjetojmë luftën në Ukrainë, e fundmja nga 59 luftërat dhe 900 konfliktet në botë. Episodi i pestë do të realizohet në bashkëpunim me Agjencinë e Promovimit të Territorit të Bazilikatës dhe do të na çojë në zbulimin e një zone të pasur me histori, art dhe përshpirtëri. Shtegtime të tjera do të na prijnë për të zbuluar Kapadokien në Turqi, destinacione të tjera italiane dhe jashtë vendit. E gjithë kjo, gjithmonë me praninë e misioneve Don Bosco, të cilat do të tregojnë situatën e vendeve të ndryshme të botës. Në çdo udhëtim do të jetë themeluesja e Nuovi Orizzonti, Chiara Amirante dhe gazetarët e shkrimtarët e Famiglia Cristiana dhe Edizioni San Paolo për njohuri mbi çështjet aktuale

Do të shkojmë tek të gjithë

Shtegtimet e zemrës është format televiziv i konceptuar dhe i prodhuar nga Elio Angelo Bonsignore, së bashku me Consuelo Bonifati. Autorë janë Davide Banzato (edhe në rolin e drejtuesit), dhe Martina Polimeni; regjisorë, Matteo Ricca dhe Frabrizio Lo Presti. Në kohëzgjatjen e tij prej 50 minutash, programi synon t’i arrijë të gjithë, besimtarë dhe jobesimtarë, falë formatit kulturor dhe investimit në mjetet e konsiderueshme për cilësinë në nivel të lartë të figurës. Gëzon patronazhin e Selisë së Shenjtë, përmes Dikasterit për Ungjillëzimin.