Nga Takimi i Riminit, thirrje për paqe dhe dialog
R. SH. - Vatikan
Paqja ishte në qendër të vëmendjes ditën e parë të Takimit të Riminit. Deri më 25 gusht, rreth 100 debate përbëjnë një të tërë me titull: “Pasion për njeriun”, frazë e marrë nga një shkrim i don Giussanit. Politika e madhe ndërkombëtare, ringjallja e vlerës së paqes, dialogu ndërmjet feve janë aspekte themelore të ngjarjes.
Palestinezët kanë frikë nga braktisja
Fortlumturia e tij Pierbattista Pizzaballa, Patriark Latin i Jeruzalemit, pohoi se shpresa është bija e besimit. Më pas u ndalua tek situata në Lindjen e Mesme, duke theksuar se si izraelitët, ashtu dhe palestinezët, janë të dëshpëruar! Palestinezët druhen më shumë, meqë mendojnë se janë braktisur nga bashkësia ndërkombëtare. Prandaj kërkimi i paqes duhet të jetë shqetësimi i parë i atyre, që kanë besim. “Nëse sot është e vërtetë që të flasësh për drejtësinë dhe paqen në Lindjen e Mesme do të thotë të jesh në anën e atyre që luftojnë kundër mullinjve të erës, është e vërtetë edhe se të gjithë duhet ta duan paqen dhe drejtësinë, veçanërisht ata, që kanë përgjegjësi për fatet e njeriut e të njerëzimit! Angazhimi për paqen dhe drejtësinë - pohoi me forcë imzot Pizzaballa në debatin “Mjeshtra të paqes”- nuk është një element ‘më shumë’, një element shtesë, që mund të bëhet edhe pa të: “Përkundrazi, besimi në Zotin të krijon menjëherë dëshirën për t’i bërë mirë çdo njeriu, pasionin e papërmbajtshëm për njeriun, në mënyrë që ai të ketë jetë të denjë për thirrjen e tij, si vetje e krijuar sipas shëmbëlltyrës dhe ngjashmërisë së Zotit”.
Jo, përçarjeve ideologjike, synimi i paqes, parë si vlerë
Edhe imzot Paolo Pezzi, kryeipeshkëv i Moskës, kujtoi fuqinë e faljes. Fuqi, që e pati përjetuar kur ishte famullitar i thjeshtë, por duke shtuar edhe se mbrojtja e atdheut është vlerë tejet e rëndësishme:
“Sot nuk ka të vërteta për të gjithë. Ka të vërteta të pjesshme: kjo shihet qartë kur pushteti nënvizon vetëm disa vlera. Po paqja sot është vlerë, jo përvojë. Nëse vlerat theksohen ideologjikisht, dështojnë - përfundoi Pezzi - Në duart e pushtetit bëhen mjet për justifikimin e dhunës më të pamëshirshme, sepse çdo pushtet e ndjen veten bartës të një thirrjeje mesianike”.
Për të nisur dialogun, të gjithë duhet të zbresin nga piedestali
Për Kryeipeshkvin e Banguit, në Afrikën Qendrore, kardinalin Diedonne Nzapalainga, ekziston një kusht thelbësor për arritjen e dialogut: të gjithë duhet të zbresin nga piedestali i tyre dhe të shndërrohen në mjeshtra të paqes, në gjurmët e Krishtit. Më pas kardinali foli për pasojat pozitive të rrëfimeve në Afrikë.
“Lufta nuk zgjidhet me dhunë, por me fillimin e dialogut. E të kujtosh dialogun, do të thotë t’i lësh maskat të bien. Kështu mund ta shikojmë fytyrën e vërtetë të tjetrit!”
Ta shikojmë tjetrin si qenie njerëzore - nxit kardinali - sepse paqja bëhet me armiqtë. Kam parë armiq, që nuk donin ta shikonin më njëri-tjetrin në sy! Atëherë ne, prijësit fetarë, u bëmë urë. Më në fund, një ftesë për të sjellë paqe edhe këtu, në Itali. Nëse njihni familje ukrainase dhe ruse, pyetini ata, e do të mund ta shikoni njëri-tjetrin në sy, të hani së bashku, të bisedoni me njëri-tjetrin. Tashmë është fillimi i paqes. Fjala është të guxosh, të guxosh të sjellësh ide për paqen, por duhet shumë durim”, përfundoi kardinali Nzapalainga.
Lufta kundër Ukrainës po trondit të gjithë Evropën
Në mesazhin e tij, Presidenti i Republikës Sergio Mattarella theksoi se lufta pushtuese e Rusisë kundër Ukrainës, me pikëllimin, shkatërrimin, urrejtjen që vazhdon të krijojë, trondit mbarë njerëzimin, duke prekur vlerat e tij themeluese, e veçanërisht, Evropën, në vetë identitetin e saj. Më pas, dy fjalë për ekologjinë:
“Është gjithnjë besnikëria ndaj njeriut, që na vë përball sfidës më të madhe të kohërave: shpëtimit të planetit nga shfrytëzimi, për të cilin është përgjegjës vetë njeriu! Koha jonë - si na kujton Papa Françesku - është koha e ekologjisë integrale:
“Njeriu duhet të rindërtojë drejtpeshimin me mjedisin dhe burimet natyrore. E këtë mund ta bëjë vetëm me frymën e solidaritetit”.
