Nigeri, alarmi i meshtarëve: gjithnjë në rrezik
R. SH. - Vatikan
“T’i jepet fund kundërshtimit të dhunshëm! Mbështetuni në lutje!”. Kjo është thirrja e ipeshkvijve nigerianë përballë shtimit dramatik të rrëmbimeve, vrasjeve dhe të dhunës në vend. Sipas Fondacionit “Ndihmë për Kishën që Vuan” gjithnjë pranë “të vuajturve”, si nigerianët, qysh nga fillimi i vitit 2022 në vend janë rrëmbyer të paktën 18 meshtarë. Pesë prej tyre, javën e parë të korrikut. Shumica e të rrëmbyerve më pas u liruan, ndërsa tre u gjetën të vrarë!
Meshtarët, ‘specie’ e rrezikuar
“Është vërtet e trishtueshme - shkruhet në një deklaratë të Shoqatës së Meshtarëve Katolikë Dioqezanë Nigerianë, dërguar ‘Ndihmës për Kishën që Vuan’ - të bëhemi specie e rrezikuar pikërisht gjatë veprimtarive tona të zakonshme baritore”.
Sipas Shoqatës, disa herë dhe në nivele të ndryshme, qeverisë i është kërkuar ndihmë, megjithatë, siç u vërejt edhe në Konferencën e Ipeshkvijve Nigerianë, dhuna e vrasjet vazhdojnë! E kjo i tregon qartë gjithë kombit se qeveria ka dështuar në detyrën e saj kryesore: “mbrojtjen e jetës së qytetarëve nigerianë”.
Ne ‘luftojmë’ me Ungjill, jo me armë
Meshtarët nuk i përgjigjen kurrë forcës me forcë e dhunës me dhunë! Nuk janë “terroristë, as bandë hajdutësh e vrasësish”. Ata e vënë në pikëpyetje dobinë e pjesëmarrjes ndër protestat në rrugë, duke dyshuar për vlerën e tyre dhe duke bërë thirrje për armatosjen, me armën e parë e kryesore të njeriut të Zotit:
“Arma jonë meshtarake është shpallja e Fjalës së Zotit në kremtimin e Eukaristisë, si kujtim i Krishtit dhe misionit të tij mbi tokë. Gjë që tregon se jemi të armatosur me Ungjij e uratë, jo me armë. Krishti nuk na ka bërë kurrë thirrje të rrëmbejmë armët kundër kujtdo, ose të kryejmë akte hakmarrjeje”.
Ky, qëndrimi i këtyre meshtarëve të admirushëm, kandidatë për martirizim, në vendin e tyre! Që, megjithatë, e vijojnë misionin e ungjllëzimit, në ato vise të vështira, që kanë aq shumë nevojë për Ungjillin!
Një javë lutje dhe agjërim për siguri
Prandaj, priftërinjtë theksojnë se do ta vazhdojnë misionin, pavarësisht nga mungesa e sigurisë, e se do të mbeten “mbrojtës të jetës dhe të paqes”, duke ftuar vëllezërit e tyre të bashkohen këto ditë me një nismë të jashtëzakonshme lutjeje dhe agjërimi, eukaristie, adhurimi, rruzarjeje të njëzëshme. Të gjitha, veprimtari, që plotësojnë programet e tjera tashmë të vendosura nga dioqezat, për të frenuar problemin e pasigurisë në Nigeri.
