Ukraina na mëson vlerën e durimit

R.SH. - Vatikan

Sot, në Videomesazhin e ri të Kishës Katolike Greke, Ukraina na mëson vlerën e durimit, fryt i Shpirtit Shenjt. Videomesazhi i ri i Kishës Katolike Greke të Ukrainës, na kujton se kur flasim për vlerën e durimit si fryt i Shpirtit Shenjt, shohim fytyrën e Zotit. Flasim me Zotin tonë, që është durimtar i madh me njeriun! Zoti nuk e do vdekjen e mëkatarit, e di të presë gjatë, të krijojë kohën e hapësirën e nevojshme, që mëkatari të pendohet, të heqë dorë nga ligësia e tij, nga mëkati i tij e të nisë e të jetojë. Duhet kujtuar edhe se durimi është fryt i Shpirtit Shenjt, e, prej këndej, tipar i të krishterit! Të jesh i durueshëm me të ligshtit, nuk do të thotë  ta lavdërosh mëkatin a të keqen. Do të thotë të kesh mëshirë për ta e të bësh çmos t’i shërosh nga mëkati. Po ky durim, si fryt i Shpirtit Shenjt, ka edhe një karakteristikë tjetër.

Në jetën e krishterë ka shumë rëndësi të ngulësh këmbë  në të mirën. E kjo vlen edhe për ne, sepse shpesh duam ta kuptojmë gjithçka me një frymë. Një i ri thoshte: “Nuk e di se çka dua, por e dua  menjëherë!”.

Por menjëherë nuk mund të bëhet asgjë. Vetëm durimi e ndihmon njeriun  ta kapërcejë çdo rrezik e vështirësi!

E sa nevojë kemi sot për këtë virtyt. Sepse kështu  mund ta vijojmë udhën tonë shpirtërore, profesionale. E mund ta vijojmë me të njëjtin durim edhe luftën tonë. Do të ishte një tip i fitores, i ngadhënjimit mbi të keqen, mbi pushtuesin rus!

Sot  themi: “Zot, të falënderojmë që po na jep durim. Me ligështitë tona. Edhe me pabesinë e kërcënimin. Na ndihmo të jemi të mirë deri në vdekje. O Zot, na  jep forcë  në luftën për lirinë e Atmes sonë!”.

Zoti e bekoftë Ukrainën, e bekoftë ushtrinë ukrainase! Zot, na jep durimin  të presim ditën e fitores!