Kërko

Delegacioni ndërfetar për vizitë në Ukrainë Delegacioni ndërfetar për vizitë në Ukrainë 

Në Kiev, të gjithë vëllezër në lutjen për paqe, ndërsa kriza e grurit bëhet qendrore

Një delegacion ndërfetar ndërkombëtar shkoi këtë javë në kryeqytetin ukrainas, ku bëri thirrje për t’i dhënë fund luftës, që po shkatërron vendin e Evropës Lindore prej më se tre muajsh. Krerët fetarë iu përgjigjën ftesës së kryetarit të bashkisë së Kievit. Ndërkaq, gjendja në Ukrainë mund të përshkruhet me tri fjalë, që dëshmojnë se konflikti bëhet vetëm më i ashpër. Ato janë: gjenocid, Lugansk e grurë

R.SH. – Vatikan

“Një ëndërr e re vëllazërimi dhe miqësie shoqërore, që nuk kufizohet vetëm me fjalë”: kështu shkruante Papa Françesku në një tweet, ndërsa i dorëzonte botës enciklikën “Fratelli tutti”. Ajo miqësi, ai vëllazërim është sot ëndërr për Ukrainën dhe Rusinë, prej tre muajsh në luftë. Paqja aq e dëshiruar ishte kësaj jave në qendër të lutjeve të krerëve fetarë nga e gjithë bota, që u bashkuan në Kiev për t’iu përgjëruar Zotit të paqes, me një zë të vetëm. Delegacioni i tyre ndërfetar mbërriti në Kiev të hënën në mbrëmje, pas një udhëtimi 14 orësh me autobus nga Varshava, për t’u kthyer më 26 maj.

Zoja pa kokë nga bombat në Ukrainë
Zoja pa kokë nga bombat në Ukrainë

Ftesa e kryetarit të bashkisë

Që nga marsi, kryetari i bashkisë së Kievit, Vitali Klitschko, i pati ftuar krerët e të gjitha feve në kryeqytet, duke u kërkuar “të mbajnë qëndrim e të marrin përsipër detyrën morale, që u takon”, si edhe përgjegjësinë e lutjes për paqen. “Për të treguar solidaritet me popullin ukrainas, ejani në Kiev”, bënte thirrje ai, me dëshirën për ta kthyer në “kryeqytet të humanizmit, të përshpirtërisë e të paqes”. Kësaj jave, 17 liderë fetarë iu përgjigjën thirrjes së kryetarit të bashkisë dhe u mblodhën në lutje për paqen, por sollën edhe ndihma humanitare e patën takime me drejtues të ndryshëm politikë e fetarë.

Çastet e lutjes

 Të martën, më 24 maj, delegacioni fetar u lut në Qendrën Përkujtimore të Holokaustit “Babyn Yar” me tingujt e violinës së Pavlo Kaurov, nga Universiteti Kombëtar Pedagogjik Dragomanov. Nunci apostolik në Ukrainë, imzot Visvaldas Kulbokas u lut me krerët fetarë në gjuhën ukrainase. Pasoi një konferencë për shtyp, ku delegacioni fetar shpjegoi se erdhi në Kiev në përfaqësi të feve e të kombeve të ndryshme, për të kërkuar që qytetet të mos bombardohen, që të lejohet eksportimi i grurit, për të shmangur një krizë të mundshme ndërkombëtare ushqimore. Pastaj, inkurajimi dhe kërkesa e ndihmës humanitare për një popullsi të rraskapitur nga njëqind ditë konflikti. Më 25 maj, lutja e përbashkët në sheshin para katedrales së Shën Sofisë në Kiev.

Në Donbass të Ukrainës
Në Donbass të Ukrainës

Gjenocid, Lugansk e grurë: tri fjalët e sotme

Gjatë gjithë javës ndihej një atmosferë si ajo, që kërkon Papa me enciklikën “Fratelli tutti”. E, në fund të fundit, në çastet e heshtjes e të lutjes para Zotit, njeriu e kupton se nuk është në gjendje ta kontrollojë luftën: di ta fillojë atë, por pastaj, siç shihet qartë edhe në vende të tjera, armët nuk i zgjidhin çështjet, për të cilat qëllojnë pa pushim, duke vrarë njerëz e duke shkatërruar banesa.

Pikërisht sot, gjendja në Ukrainë mund të përshkruhet me tri fjalë, që dëshmojnë se konflikti bëhet vetëm më i ashpër. Ato janë: gjenocid, Lugansk e grurë. Gjenocid është fjala, që përdori presidenti ukrainas Zelensky në videon e tij të natës, duke nënvizuar se këtë po bën Rusia në Donbass, duke “shpërngulur e duke vrarë në masë civilë: është qartësisht politikë gjenocidi”. Nga ana tjetër, Kievi pranon se rusët po përparojnë më tej në Lugansk, ku ka filluar ofensiva ushtarake. E, kriza e grurit, që nuk lejohet të dalë nga Ukraina, po bëhet gjithnjë e më qendrore edhe në nivelin diplomatik, me presidentin Putin, i cili ka hapur një shteg për zgjidhje, por vetëm nëse hiqen sanksionet kundër Rusisë.

27 maj 2022, 11:14