Kërko

Vatican News

Thirrje e teologëve për të shpëtuar vëllazërimin, siç kërkon enciklika e Papës

Promovuar nga imzot Vincenzo Paglia dhe imzot Pierangeli Sequeri, dhjetë teologë nënshkruajnë thirrjen për “Të shpëtuar Vëllazërimin – Së bashku”. Bazohet në enciklikën e Papës Françesku “Fratelli tutti”

R.SH. - Vatikan

Titullohet “Të shpëtojmë Vëllazërimin – Së bashku”, thirrja e nënshkruar nga një grup prej dhjetë teologesh e teologësh katolikë, ftuar nga kreu i Akademisë Papnore për Jetën, mzot Vincenzo Paglia dhe nga imzot Pierangeli Sequeri, drejtor i Institutit Papnor Teologjik Gjon Pali II për Shkencat e Martesës e të Familjes, ku imzot Paglia është Kancelar i Madh. Ky apel i drejtohet Kishës, në të gjitha komponentet e saj, grave dhe burrave vullnetmirë, me të cilët teologët dëshirojnë të konfrontohen, jo thjesht përmes një analize që, o duhet pranuar, o duhet hedhur poshtë.

Dialog pa paragjykime

Nuk është tezë, me të cilën ata u kërkojnë njerëzve të pajtohen, por është një “repertor” temash, që i konsiderojnë vendimtare për reflektim e diskutim. Teologët janë bazuar në enciklikën e Papës Françesku “Fratelli tutti”. Ata propozojnë të kuptohet më thellë Kisha, e cila nxitet të hapet ndaj një bote, që priret të mbyllet. “Kisha – shkruhet në dokument – nuk është aristokraci shpirtërore e të zgjedhurve, por tendë mikpritëse, që mbron ylberin e besëlidhjes ndërmjet Zotit dhe krijesës njerëzore. Feja do të mësojë si të banojë në gjuhën e botës shekullare, pa paragjykim për kumtin e saj të afërsisë me Zotin. Afërsia kishtare e fesë do të mund të banohet edhe nga kananea, samaritanja, Zakeu, centurioni. Pa paragjykime për distancën e tyre”.

Thirrje jo besimtarëve

Teologët katolikë u bëjnë thirrje edhe jo besimtarëve. “Ne ju propozojmë një kthesë në prirjet e mendimit të kohës – shkruhet në tekst. - Mos e përbuzni Emrin e Zotit, të cilit i drejtohet lutja e besimtarëve të sinqertë për gjithë burrat dhe gratë e planetit, e për të cilin besimtarët janë gati të ndërhyjnë për gjithë të varfrit e të braktisurit. Na kritikoni ne, kur duhet – e madje, edhe kur nuk do t’ju takonte – por mbrojeni me respekt misterin e Emrit të Zotit – i pashqyrtueshëm edhe për ju”.

Enciklika “Fratelli tutti”, perspektivë e re vëllazërimi

 Siç shpjegon imzot Paglia në pasthënie, “institucionet kishtare janë të thirrura të luajnë rolin e tyre në promovimin e një dialogu më të thellë e më të shpeshtë ndërmjet inteligjencës së fesë dhe mendimit njerëzor. Në këtë risi, teologjia e baritoria konvergjojnë, si dy anë të të njëjtit veprim”. Enciklika e fundit e Papës Françesku “Fratelli tutti” “inkurajon përfytyrimin e një perspektive të re në këtë dialog, si interpretim i frytshëm dhe i nevojshëm i një vëllazërimi intelektual, në shërbim të gjithë bashkësisë njerëzore”. Grupi i teologeve dhe teologëve, që kanë hartuar thirrjen, janë: Kurt Appell, atë Carlo Casalone SJ, don Dario Cornati, Joao Manuel Duque, Isabella Guanzini, atë Marcello Neri, don Giovanni Cesare Pagazzi, Vincenzo Rosito, Gemma Serrano, Lucia Vantini.

08 qershor 2021, 14:50