Kamerun: kardinali Tumi, i rrëmbyer dje, lirohet
R. SH. - Vatikan
Christian Wiyghan Tumi, kryeipeshkëv nderi i Dualës (Kamerun), kardinali i parë kamerunez, 90 vjeç, i sekuestruar dje nga një komandë e armatosur, në rrugën ndërmjet Bamensa-s e Kumbo-s, u lirua nga duart e rrëmbyesve.
Në këtë ngjarje mendohet të ketë pasur dorë edhe Mbreti i Kumbos, Fon di Nso, autoritet moral tradicional. Pak para se të lirohej, Elie Smith, bashkëpunëtor i ngushtë i kardinalit, mundi të lidhej në telefon me rrëmbyesit e të marrë prej tyre disa informacione: kreu i sulmit të armatosur - sipas tij - ishte gjenerali i Ambazonianëve (separatistë anglishtfolës të rajonit të trazuar të Ambazonies, në jug-perëndim të vendit), një ish bari, i njohur me emrin Chaomao. Lajmi u konfirmua edhe nga familjarët e mbretit Kumbo. Shkaku i rrëmbimit ishte se prelati i lartë i nxiste fëmijët të shkojnë në shkollë. Kujtojmë se ndonjë ditë më parë, një grup i armatosur rrëmbeu disa mësues, të cilët i lëshoi dje, më 5 nëntor. Ndërsa më 24 tetorin e kaluar tetë fëmijë u mbytën gjatë një sulmi të armatosur në shkollën dygjuhëshe ndërkombëtare Mother Fracisca. Lajm, që arriti menjëherë tek Papa, i cili shprehu dhimbjen e thellë për këtë mort tragjik, duke bërë edhe thirrje që të marrë fund dhuna e të garantohet shkollimi i fëmijëve, e ardhmja e Afrikës!
Papa lutet për fëmjët e vrarë në Kamerun. Ipeshkvi: për ne ky është ngushëllim!
Kardinali Tumi, i lindur më 15 tetor 1930 në Kikaikelaki, në famullinë e asokohshme Kumbo, sot dioqezë - si ipeshkëv e më pas si kardinal ka qenë gjithnjë në vijë të parë të frontit në çastet më të vështira të territorit të Kamerunit verior, në kufi me Çadin, vend gjysëm i harruar nga autoritetet qëndrore, i zhytur në varfëri të thellë, i tronditur gjithnjë nga përçarjet etnike. Për mbrojtjen e paqes, pas fillimit të krizës në veri e në jug-perëndim të Kamrunit e për luftën kundër diskriminimit të pakicës anglofolëse (rreth 20% e popullsisë), në korrik 2019 kardinali Christian Tumi u vlerësua me çmimin Nelson Mandela!