Të meditojmë me Ungjillin e së dielës XXI të vitit liturgjik
R.SH. - Vatikan
13 “Kur Jezusi arriti në krahinën e Cezaresë së Filipit, i pyeti nxënësit e vet: “Ç’thonë njerëzit, kush është Biri i njeriut?” 14 Ata u përgjigjën: “Disa thonë se është Gjon Pagëzuesi; do të tjerë Elia; do të tjerë Jeremia ose një ndër profetë”. 15 “Po ju - u tha atyre - ç’thoni: kush jam unë?” 16 Iu përgjigj Simon Pjetri: “Ti je Mesia - Biri i Hyjit të gjallë!” 17 Atëherë Jezusi i tha: “I lumi ti, o Simon, biri i Jonës, sepse këtë nuk ta zbuloi mishi e gjaku, por Ati im që është në qiell! 18 Edhe unë po të them: Ti je Pjetër-Shkëmb dhe mbi këtë shkëmb unë do ta ndërtoj Kishën time dhe dyert e ferrit s’do të ngadhënjejnë kundër saj! 19 Ty do t’i jap çelësat e Mbretërisë së qiellit: gjithçka të lidhësh mbi tokë, do të jetë e lidhur edhe në qiell e gjithçka të zgjidhësh mbi tokë, do të jetë e zgjidhur edhe në qiell”. 20 Atëherë u urdhëroi nxënësve që të mos i tregojnë askujt se është ai Mesia.
Të lutemi së bashku:
Ai, Simoni, biri i Jonës,
të njohu si Mesi,
si i Shumëprituri, si Biri i Zotit të gjallë.
E ti, o Jezus, e quajte “shkëmb”,
guri mbi të cilin do të ndërtohej Kisha jote.
Ti e di sa i brishtë do të ishte ky shkëmb
pikërisht në çastin kur
duhej të kishte dhënë provë
për qendresën e tij para stuhive,
për guximin para keqdashjes,
për besnikërinë pa hije dyshimi.
E megjithatë, Ti nuk hoqe dorë prej tij,
as ia llogarite mundësitë
apo virtytet a kompetencat,
por fenë e tij, atë fe
që e bëri të flasë atë ditë,
atë fe, që do ta mbështesë
kur të ndihet ngushtë e i brishtë,
plot frikë e do të Të mohojë tri herë me radhë.
E njëjta gjë vlen edhe për ne, o Zot.
Nëse i lë në duart tona thesaret e tua të paçmuara,
duke mos marrë parasysh mëkatet e plogështinë tonë,
e bën, sepse e sheh besimin që kemi në Ty,
dashurinë, që na lidh me Ty.
E shi për këtë, na largohet trishtimi
e mbushemi me gëzim që jemi
një mjet i varfër në duart e Tua.