Të meditojmë me Ungjillin e së dielës

R.SH. - Vatikan

Ungjilli i kësaj së diele, e gjashta e kohës së Pashkëve 'C', është marrë nga Gjoni ( 14,23-29)

²³ Jezusi iu përgjigj: “Nëse ndokush më do, ai do të ma mbajë fjalën, Ati im do ta dojë, tek ai do të vijmë dhe tek ai do të banojmë… ²⁵ Këto fjalë jua thashë ndërsa banova me ju. ²⁶ E Shpirti Shenjt ‑ Mbrojtës, të cilin do t’jua dërgojë Ati në Emër tim, Ai do t’jua mësojë të gjitha dhe do t’ju përkujtojë gjithçka [unë] ju thashë. ²⁷ Po ju lë paqen, po ju jap paqen time! Nuk po jua jap siç e jep bota. Mos t’ju shqetësohet zemra as të mos ju trembet. ²⁸ Ju dëgjuat se ju thashë: ‘Po shkoj dhe do të kthehem tek ju’. Po të më donit, do të galdonit se po shkoj tek Ati, sepse Ati është më i madh se unë. ²⁹ Ju thashë tani ‑ para se të ndodhë, që të besoni kur të ndodhë. 30 S’do të flas më shumë me ju, pse po afrohet princi i botës. Ai kundër meje s’mundet asgjë.

Ti, o Jezus, s’na kërkon të të duam

Vetëm me fjalë.

Ti nuk mjaftohesh

me pranimin tonë,

me duartrokitjet,

me konsensusin.

Për ty, dashuria është diçka konkrete,

reale, e prekshme:

tregohet me fakte,

me vendime e me jetën

e çdo dite.

Edhe, e sidomos

kur kjo na dhemb,

kur nuk është e lehtë

të rreshtohemi në anën tënde,

të ndjekim rrugën tënde,

të plotësojmë vullnetin e Atit Qiellor.

Na ndihmo pra, o Zot

Ta pranojmë Fjalën tënde

Edhe kur është tepër kërkuese.

Na dhuro forcën, guximin,

ta bëjmë realitet në jetën tonë.

E kur sprovohemi,

kur tundohemi ta shkëmbejmë

paqen e gëzimin tënd

me ndonjë avantazh të kotë

na jep urtinë të zgjedhim

çka vlen me të vërtetë.

Shpirti yt na kujtoftë fjalët e tua

që ne t’i përballojmë

ndërlikimet e jetës me shpirt të qetë.