Me 29 janar kalendari kujton Shën Kostancin, ipeshkëv i Perugjës e martir

R.SH. - Vatikan

Shën Konstanci i Perugjës († Foligno, rreth vitti 170) ishte ipeshkëv dhe martir latin. I pari që zuri katedrën e Perugjës (Perugia) u martirizua në kohën e perandorit Mark Aurelit, gjatë persekutimeve të Perandorisë Romake kundër të krishterëve.

Sipas gojëdhënës, nga e cila kemi katër variante, Kostanci u arrestua dhe u hoq zvarrë para konsullit Luçio gjatë persekutimit të Mark Aurelit. Pasi u rrah mizorisht me kamxhik, u mbyll së bashku me disa shokë në një furrë të madhe të ndezur, prej nga doli mrekullisht i paprekur. U flak rishtas në burg, ku me sjelljen e tij shembullore, ia doli t’i kthejë në fenë e Krishtit rojet, që e ndihmuan të ikte. 

U strehua në shtëpinë e një farë Anastasi, edhe ky i krishterë, por u arrestua përsëri. U martirizua pranë Kishës së Trivios, në zonën e Folinjos, ku shërbente. Kisha u shemb rreth vitit 1527, po fusha ku derdhi gjakun për Krishtin vijon t’ia ruajë emrin. Quhet edhe sot e kësaj dite ‘Fusha e Shën Kostancit’. Pas martirizimit, reliket e shenjtit u mbartën në Perugja e u varrosën në vendin mbi të cilën më pas u ngrit katedralja e qytetit italian. Martiriologu Jeronimian e kujton Shën Kostancin më 29 janar.