Në luftën kundër varfërisë, OKB-ja bën thirrje për pezullimin e borxhit të jashtëm
R.SH. – Vatikan
Pikërisht në vendet në zhvillim, të cilat kanë borxhe të jashtme të larta, numri i njerëzve të varfër po rritet me shpejtësi: këtë vë në dukje raporti i UNDP-së (Programi i OKB-së për Zhvillimin), që u paraqit sot, 14 korrik. Këto vende, pa shumë mundësi ekonomike, duhet të zgjedhin ose të shlyejnë borxhin, ose të ndihmojnë popullsinë. Megjithëse shuma e borxhit është më e ulët se në vendet e pasura, vërehet në raport, ajo rritet më tepër, sepse shtetet e varfwra paguajnë më shumë interes, për shkak të taksave më të larta.
Rreth 3,3 miliardë njerëz, gati gjysma e njerëzimit, theksohet më tej, jetojnë në vende, që shpenzojnë më shumë për të paguar interesin e borxhit sesa për arsimin. Për këtë arsye, Kombet e Bashkuara bëjnë thirrje për pezullimin e shlyerjes së borxhit, në mënyrë që fondet e destinuara për të të përdoren për financimin e masave shoqërore.
Sistem i vjetëruar
Sipas llogaritjeve të raportit, për të nxjerrë këta 165 milionë vetë nga varfëria, do të kushtonte rreth 14 miliardë dollarë në vit, ose më pak se 4% e interesit, që paguajnë çdo vit vendet në zhvillim.
“Kemi një kosto njerëzore për mosveprimin në ristrukturimin e borxhit sovran të vendeve në zhvillim”, shton raporti. Sekretari i Përgjithshëm i OKB-së, Antonio Guterres, flet për një "sistem të vjetëruar", që pasqyron "dinamikën koloniale të kohës kur u krijua".
Në mesazhin Urbi et Orbi të Pashkëve 2020, Papa Françesku pati kërkuar përsëri të anulohej borxhi i vendeve më të varfra, në kuadrin e pandemisë së koronavirusit, e cila tashmë po rëndonte shumë mbi sistemet ekonomike dhe shoqërore të tyre. Por, edhe sot, pavarësisht nga impenjimi në këtë drejtim, ky problem nuk është zgjidhur ende.
