Lufta në Ukrainë, goditet edhe Lvivi
R.SH. - Vatikan
Telefonata e presidentit amerikan Joe Biden me homologun kinez Xi Jinping, ajo e Puntin me homologun francez Macron, menjëherë pasi Moska hodhi poshtë kërkesën e Gjykatës së Hagës për të ndalur operacionin ushtarak në Ukrainë, karakterizojnë ditën e sotme, të 23-tën e luftës në Ukrainë. Vijon ofensiva ruse në qytete të ndryshme të vendit me pasoja shtimin e numrit të refugjatëve – që e kanë kapërcyer 3 milonëshin – si edhe të numrit të viktimave civile, përfshirë fëmijët. U godit Lvivi, në pjesën perëndimore, 90 kilometra larg kufirit me Poloninë. Avionët rusë bombarduan gjatë natës, edhe Luganskun e tregun e Kharkiv, një nga më të mëdhenjtë e Evropës Lindore. Lufta nuk kurseu as Kievin, ku bombat ranë në veri të kryeqytetit. Sipas ministrit ukrainas të mbrojtjes, qyteti i Volnovakha-s nuk ekziston më, ndërsa në Mariupol janë shkatërruar 80% e ndërtesave të banimit. Nga ana e saj, Organizata Botërore e Shëndetësisë bën të ditur se që nga fillimi i luftës, forcat ruse kanë sulmuar 43 struktura shëndetësore.
Fronti diplomatik
“Nga bllokimi i Detit të Zi vjen rreziku i një krize ushqimore globale”, njofton Kievi, duke kujtuar se Rusia dhe Ukraina prodhojnë 30% të drithërave botërore. Ndërkaq, bisedimet ruso-ukrainase vazhdojnë. Pala ukrainase mendon se do të arrihet një marrëveshje brenda pak ditësh, maksimumi një javë e gjysmë. Garant për të do të jenë disa shtete, ndër të cilat SHBA-të, Gjermania e Turqia.