Mirë dita per kudhana

R.SH. - Vatikan

Kënga popullore tradicionale 'Mirë dita per kudhana', që këndohet në Shqipërinë veriore në Festën e Dëftimit të Zotit, mbledhë prej popullit, nga Dom Aleksandër Sirdani  

Mirë dita per kudhana (1

Me ‘i tubë pare t’ argjana (2

Mirë mot e mirë sot

Na ndimo, o i lumi Zot!

Del e del, o Zoja e shpísë

Me kuletë të Zotnís

Del e del e dalsh e bardhë

Sot me pare e mot me djalë.

A po del apo shkojmë?

Njiktu kenka ‘i shêj, shêj mirë,

Kali kamb’ bardhë

Dera e prarueme,

Zoja e nderueme…

A po del apo shkojmë?

Njiktu kênka ‘i shportë me arra

Zojës shpís ju prifët e mara.

Njiktu kenka‘i pemê me molla

Të mira u ardhshin fjolla-fjolla (3

Njiktu kenka ‘i shportë lejthija

Flakë u ndezt’ në ket’ derë dashnija!

Njiktu kênkan duert si bora,

Plot me lule u mbushtë kunora!

Njiktu kenka ‘i arkë sheqera

T’bardhës shpí i kjoftë rritë ndera

A po del apo shkojmë?

1. kudhana: kolendra

2. argjana – argjandit

3. fjollë – tubë

Mbledhë prej popullit, nga Dom Aleksandër Sirdani