Kërko

Vatican News
Sulmi  kundër Bazilikës së Zojës në Nicë të Francës Sulmi kundër Bazilikës së Zojës në Nicë të Francës  (AFP or licensors)

Nicë, Macron: “Jemi në gjendje sulmi”

Presidenti francez flet për “atentat islamist”. Hetimet çojnë tek vrasësi, Brahim A, për të cilin burime të aparateve italiane të sigurimit pohojnë se kishte arritur pak kohë më parë nga Lampeduza në Francë. Në gjendje alarmi e gjithë Franca, ku numri i ushtarakëve të antiterrorizmit kalon nga tre mijë, në shtatë mijë.

R. SH. - Vatikan

“Është atentat terrorist islamik”: Presidenti francez nuk ka asnjë dyshim kur, duke folur për Nicën (Nizza), deklaron se vendi vijon të sulmohet. Vrasësi, që u mori jetën tre vetëve në bazilikën e Zojës (Notre-Dame) quhet Brahim Aoussaoui, është tunizian, 21 vjeç, i ardhur nga fundi i shtatorit në Lampeduzë të Italisë e më pas, në tetor, në Francë. Manuel Macron  dhe mbarë Kombi  është përkrah katolikëve në Francë e në Botë.

“Pas vrasjes së atë Hamel, në verën e vitit 2016 - kujtoi presidenti - katolikët sulmohen e kërcënohen përsëri në vendin tonë. Kombi mbarë është përkrah tyre e përkrah tyre do të vijojë të jetë, që feja të mund të ushtrohet lirisht në vend”. Ndërkaq, në takimin e Këshillit të Sigurimit, u vendos të merren masa të reja për mbrojtjen e territorit  dhe të vendeve të kultit.

Dy fjalë për zhvillimin e ngjarjes

Sulmi me thikë nisi dje paradite, në orën 9.00, në Bazilikën kushtuar Zojës së Bekuar, në qendër të Nicës, në Avenue Jean-Medecin. Agresori, si iu sul viktimave me britmën “Allah Akbar”, i preu kokën një gruaje dhe e theri në fyt sakrestanin, 45 vjeçar, që vdiq menjëherë brenda kishës. Pastaj  i nguli thikën në grykë edhe një gruaje tjetër, që iku e u strehua në një bar, ku pas pak dha shpirt. Pati kohë të thoshte vetëm: “Thojini fëmijëve të mi se i dua fort!”.

Atentatori u arrestua, pasi u plagos. Kryebashkiaku i Nicës, Kristian Estrosi, që foli menjëherë për sulm terrorist, vendosi që të gjitha Kishat të rrethohen me roje ose të mbyllen, ashtu si të gjitha vendet e kultit të qytetit. Më pas kujtoi se “atentatori, edhe ndërsa po e mjekonin, vazhdonte  të bërtiste “Allahu është i madh!”. Me sa dukej, sapo i kishte mbushur 25 vjetët.

Kryeministri Jean Castex u largua ngutshëm nga Asambleja Kombëtare, ku do të paraqiste masat e reja të përballimit të koronavirusit, për të marrë pjesë në takimin e organizuar sakaq në ministrinë e brendshme nga ministri Gerald Darmarin. E menjëherë në të gjithë Francën u  shpall  gjendja e emergjencës në situata atentatesh.

Imami i Madh i Al-Azhar e dënon atentatin

Ahmed Al Tayyib, Imam i Madh i Al-Azhar, qendra më e rëndësishme teologjike dhe universitare e Islamit sunit, e dënoi sulmin kundër bazilikës së Shën Marisë në Nicë, duke pohuar se “fetë nuk kanë punë me kësi kriminelësh”. Në mesazhin e përhapur edhe përmes facebook, Al-Azhar pohon  se “nuk mund të ketë asnjë shfajësim për veprime të tilla të urryera ateiste, të cilat i kundërvihen mësimeve tolerante të Islamit dhe të gjitha feve hyjnore, që kërkojnë të luftohet kundër çdo tip dhune, ekstremizmi, urrejtjeje dhe intolerance”. Kërkohet t’i vihet fre gjuhës, duke ndenjur larg fjalëve si dhunë e urrejtje, për të dëgjuar zërin e urtisë e të arsyes.

Dy javë më parë u vra Samuel Paty

Sulmi ndodhi ndërsa Franca ishte ende e tmerruar, pas fundit të Samuel Paty-it, mësuesit që, më 16 tetor, iu pre koka vetëm pse u foli nxënësve për  karikaturat e Charlie Hebdo, që paraqisnin Muhametin. Tensioni vijoi të thellohet  edhe orët e fundit, pak orë pas botimit të karikaturave të reja kundër presidentit turk Erdogan dhe pas deklaratave të presidentit francez, Emmanuel Macron.  

Qëndrimi i bashkësisë ndërkombëtare

Kryesia e Bashkimit Evropian e dënon aktin terrorist dhe i shpreh Francës afërsinë. Kryetarja e Komisionit Evropian Ursula von der Leyen, pohon: “Të rrimë të bashkuar e të vendosur përballë mizorive dhe fanatizmit”. Ndërsa kryetari i Europarlamentit, Davide Sassoli, nënvizon: “Kjo dhimbje  ndjehet në mbarë Evropën: e kemi për detyrë t’i kundërvihemi së bashku dhunës e edhe atyre, që përpiqen ta nxisin e ta përhapin urrejtjen”.

30 tetor 2020, 11:48