Ramush Haradinaj: Kosova e interesuar për marrëdhënie me Vatikan
R.SH. - Vatikan
Sekretari i Selisë së Shenjtë, Kardinali Pietro Parolin priti sot në Vatikan Kryeministrin e Kosovës, zotin Ramush Haradinaj. Gjatë bisedimeve të përzemërta u trajtuan tema të ndryshme si situata aktuale e Kosovës, aspiratat e saj drejt familjes evropiane, dialogu e stabiliteti në rajon, “kërkimi i partneritetit diplomatik me Shtetin e Vatikanit, për këtë, njohja nga Selia e Shenjtë është hap i nevojshëm”. “Shteti i Kosovës është faktor i rëndësishëm i paqes dhe i stabilitetit si dhe promovues i fqinjësisë së mirë. Liria fetare dhe orientimi ynë euro-atlantik janë vlera të pacënueshme”. Kryeministri i Kosovës Haradinaj kujtoi edhe 10-vjetorin e pavarësisë së vendit, arritjet e sfidat që ka shoqëria e re demokratike, me vokacion evropian.
Po kështu, u fol për vlerën e familjes e për rolin e komuniteteve fetare në vend e për kontributin e Kishës katolike në veçanti. Kardinali Parolin tha se Selia Shenjtë përcjell nga afër e me vëmendje zhvillimet në vend, vlerëson arritjet e siguron mbështetjen në rrugën euro-atlantike e në kultivimin e vlerave, që afrojnë, bashkojnë e çojnë përpara bashkëjetesën mes entiteve të ndryshme të vendit.
Kryeministri Haradinaj tha, mes tjerash, se “Kardinalit Parolin i shpreha përkushtimin e vendit që të ruajmë dhe t'i avancojmë marrëdhëniet tona, ndërsa Hirësia e Tij, na inkurajoi për rrugën tonë euro-atlantike”. Por le ta dëgjojmë Kryeministrin e Kosovës, zotin Ramush Haradinaj në mikrofonin e Vatican News të dom David Gjugjës....
Deklarata zyrtare e kryeministrisë së Kosovës
Kosova e interesuar për marrëdhënie strategjike me Vatikanin
Vatikan, 22 maj 2018
Kryeministri i Republikës së Kosovës, Ramush Haradinaj, po qëndron për vizitë zyrtare në Vatikan, ku sot është pritur në takim nga, Sekretar shteti i Vatikanit, Kardinali Pietro Parolin.
Të arriturat e vendit në aspektin politik dhe demokratik, pozicioni i Kosovës karshi vendeve të rajonit dhe bashkëpunimi ekonomik dhe diplomatik me këto vende, ishin disa nga temat e diskutimit në këtë takim.
“Kosova është e përkushtuar që të vazhdoj avancimin e raporteve me Vatikanin dhe se njohja e shtetësisë së Kosovës nga Vatikani, është hap i nevojshëm”, tha Kryeministri Haradinaj.
Kryeministri Haradinaj përmendi edhe faktin se liria fetare dhe orientimi euro-atlantik i Kosovës janë vlera të pacenueshme, vlera këto që duhet të promovohen edhe në raportet mes dyja vendeve.
“Shteti i Kosovës është faktor i rëndësishëm i paqes dhe i stabilitetit si dhe promovuese e fqinjësisë së mirë”, tha kryeministri Haradinaj, duke shprehur mirënjohjen e popullit të Kosovës dhe Qeverisë për përkrahjen e vazhdueshme të Selisë së Shenjtë dhënë Kosovës.
“Kosova është e interesuar që në Ballkan të shtyjë procesin e paqes permanente dhe pajtimit, në të njëjtën frymë, Kosova është e interesuar të ketë marrëdhënie strategjike me Vatikanin”, ishte qëndrimi i Kryeministrit Haradinaj.
Sekretari i Shtetit të Vatikanit, Kardinali Pietro Parolin, e inkurajoi popullin e Kosovës për paqe, pajtim dhe prosperitet me vendet fqinje dhe në rrugën e saj drejt integrimeve euro-atlantike.
Qëndrimi i Kryeministrit Haradinaj në Selinë e Shenjtë po bëhet në kuadër të vizitës zyrtare në këtë vend, në të cilën do të zhvillohen një ser takimesh me nivele të larta dhe me interes për vendin.
