“ക്രിസ്തു ജീവിക്കുന്നു” : യുവജനങ്ങളുടെ സുവിശേഷവൽക്കരണം

സി. റൂബിനി ചിന്നപ്പ൯ സി.റ്റി.സി, വത്തിക്കാൻ ന്യൂസ്

അപ്പോസ്തോലിക പ്രബോധനം

അപ്പോസ്തോലിക പ്രബോധനമെന്നത് കത്തോലിക്കാ സഭയില്‍ പാപ്പാ പ്രസിദ്ധീകരിക്കുന്ന ഔദ്യോഗിക ലേഖനങ്ങളുടെ വിവിധതരത്തിലുളള പരമ്പരകളിൽപ്പെടുന്ന ഒരു ലേഖനമാണ്. ഇവയുടെ പ്രാധാന്യ ശൃംഖലയില്‍ ഏറ്റവും മുന്‍പന്തിയില്‍ നില്‍ക്കുന്ന ചാക്രീക ലേഖനങ്ങള്‍ കഴിഞ്ഞാല്‍ തൊട്ടടുത്ത സ്ഥാനമാണ് അപ്പോസ്തോലിക പ്രബോധനങ്ങള്‍ക്കുള്ളത്.

ഏഴാം അദ്ധ്യായം

ഏഴാമത്തെ അദ്ധ്യായം യുവജന ശുശ്രൂഷയെക്കുറിച്ചാണ്. ആമുഖമായി യുവജന ശുശ്രൂഷയ്ക്ക് പ്രധാനമായി രണ്ട് സഹ ഗമന മാർഗ്ഗങ്ങൾ - എത്തിച്ചേരലും, വളർച്ചയും - ഉണ്ടെന്ന് വിശദീകരിച്ചു കൊണ്ട് ഓരോ വ്യക്തിയും 'വീട് ' നിർമ്മിക്കാനുള്ള കല്ലാണെന്ന തിരിച്ചറിവിലേക്കും എപ്പോഴും മിഷനറിമാരായിരിക്കുകയെന്ന സ്നേഹ ബോധ്യങ്ങളിലേക്കു നയിക്കാൻ കഴിയുന്ന "ജനകീയമായ'' യുവജന ശുശ്രൂഷയുടെ സാധ്യതകളിലേക്കും പാപ്പാ വിരൽ ചൂണ്ടുന്നു. ഇതിനായി " യുവജനങ്ങളുടെ കൂടെ സഞ്ചരിക്കുന്ന സമൂഹ''മായി നാം മാറണമെന്ന് പാപ്പാ ആഗ്രഹിക്കുന്നു.

222. യുവജനത്തിന്റെ സുവിശേഷ വൽക്കരണത്തിന് അടിസ്ഥാനപരമായ സ്ഥലങ്ങളാണ് കത്തോലിക്ക വിദ്യാലയങ്ങൾ. സത്യത്തിന്റെ സന്തോഷം(Veritas Gaudium) എന്ന അപ്പോസ്തോലിക കോൺസ്റ്റിറ്റ്യൂഷനിൽ കുറെ മാർഗ്ഗദർശക തത്വങ്ങൾ കൊടുത്തിട്ടുണ്ട്. സ്കൂളുകളും യൂണിവേഴ്സിറ്റികളും മിഷനറി പ്രവർത്തനത്തിന്റെ നവീകരണത്തിനും പുനരുജ്ജീവനത്തിനും വേണ്ടി അവയെ പരിഗണിക്കണം. ആ തത്ത്വങ്ങളിൽ താഴെ പറയുന്നവ ഉൾക്കൊള്ളുന്നു: കെറിഗ്മയുടെ പുതിയ അനുഭവം, വ്യാപകമായ സംവാദം, വിഷയങ്ങൾ തമ്മിൽ ബന്ധിപ്പിക്കുന്ന സമീപനങ്ങൾ, കണ്ടുമുട്ടൽ സംസ്കാരത്തിന്റെ വളർത്തൽ, നെറ്റ് വർക്കുകൾ സൃഷ്ടിക്കുക എന്ന അടിയന്തരാവശ്യം, എളിയവരും സമരം അവഗണിക്കുന്നവരുമായ ആളുകളോടുള്ള പ്രത്യേക താൽപര്യം. ഇതുപോലെ പ്രധാനപ്പെട്ട ഒന്നാണ് ശിരസ്സിന്റെയും ഹൃദയത്തിന്റെയും കൈകളുടെയും അറിവ് ഒന്നിപ്പിക്കാനുള്ള കഴിവ്. (കടപ്പാട്. പി.ഒ. സി പ്രസീദ്ധീകരണം).

യുവജനങ്ങളുടെ സുവിശേഷവൽക്കരണം: കത്തോലിക്കാ വിദ്യാലയങ്ങളുടെ പങ്കിനെക്കുറിച്ചുള്ള ഫ്രാൻസിസ് പാപ്പയുടെ ഉൾക്കാഴ്ചകൾ

യുവമനസ്സുകളുടെ സുവിശേഷവൽക്കരണത്തിൽ കത്തോലിക്കാ സ്കൂളുകളുടെ പ്രധാന പങ്ക് ഫ്രാൻസിസ് പാപ്പാ നിരന്തരം ഊന്നിപ്പറഞ്ഞിട്ടുണ്ട്. സത്യത്തിന്റെ സന്തോഷം (Veritas Gaudium)  എന്ന പാപ്പാ യുടെ അപ്പോസ്തലിക കോൺസ്റ്റിറ്റ്യൂഷനിൽ നിന്നുള്ള മാർഗ്ഗനിർദ്ദേശങ്ങളിൽ ശ്രദ്ധ കേന്ദ്രീകരിച്ചാണ് ഫ്രാൻസിസ് പാപ്പയുടെ പ്രബോധനങ്ങൾ ഇന്ന് നാം പരിചിന്തനം ചെയ്യുന്നത്. സ്കൂളുകളിലും സർവ്വകലാശാലകളിലും മിഷനറി പ്രവർത്തനങ്ങൾ പുനരുജ്ജീവിപ്പിക്കുന്നതിനും സജീവമാക്കുന്നതിനുമായി പാപ്പാ ഉയർത്തിക്കാട്ടുന്നത് സുവിശേഷ പ്രഘോഷണത്തിന്റെ (കെറിഗ്മ) ഒരു പുതിയ അനുഭവം, വിശാലമായ സംവാദം, വിദ്യാഭ്യാസത്തിലെ വിവിധ മേഖലകൾ തമ്മിലുള്ള സഹകരണം ഉറപ്പാക്കുന്ന സമീപനങ്ങൾ, കൂടികാഴ്ചയുടെ സംസ്കാരം, നെറ്റ് വർക്കിംഗ്, പാർശ്വവത്കരിക്കപ്പെട്ടവർക്കുള്ള മുൻഗണന എന്നിവയാണ്. കൂടാതെ, വിദ്യാഭ്യാസത്തിൽ ശിരസ്സ്, ഹൃദയം, കൈകൾ എന്നിവ സംയോജിപ്പിക്കുന്നതിന്റെ പ്രാധാന്യവും വിചിന്തനം ചെയ്യാം.

2018 ജനുവരി 29-ന് പുറത്തിറക്കിയ അപ്പോസ്തോലിക ഭരണഘടനയിൽ, സഭാ സർവ്വകലാശാലകളിൽ "സമൂലമായ സമീപന മാറ്റത്തിനും" "ധീരമായ സാംസ്കാരിക വിപ്ലവത്തിനും" ഫ്രാൻസിസ് പാപ്പാ ആഹ്വാനം ചെയ്തു. Veritas Gaudium ("സത്യത്തിന്റെ സന്തോഷം") 1979-ൽ വിശുദ്ധ ജോൺ പോൾ രണ്ടാമൻ പുറപ്പെടുവിച്ച അപ്പോസ്തോലിക ഭരണഘടനയായ Sapienza Cristiana പകരം വയ്ക്കുന്നു. സമൂഹത്തിലെയും അക്കാദമിക ജീവിതത്തിലെയും മാറ്റങ്ങളുടെ വെളിച്ചത്തിൽ നവീകരിച്ചതാണ്. "സത്യത്തിന്റെ സന്തോഷ"ത്തിൽ പാപ്പാ ഊന്നിപ്പറയുന്നത്, സഭയുടെ ഇന്നത്തെ പ്രാഥമിക ആവശ്യത്തെ സഭാ പഠനങ്ങൾ സേവിക്കുന്നുവെന്നും അത് "ആത്മാവ് നിറഞ്ഞ' സുവിശേഷവൽക്കരണത്തിന്റെ ഒരു പുതിയ ഘട്ടത്തിലേക്ക് കടക്കാൻ ദൈവജനം തയ്യാറായിരിക്കണമെന്നുമാണ്. ഈ വെല്ലുവിളിക്ക് "വിവേചനത്തിന്റെയും ശുദ്ധീകരണത്തിന്റെയും പരിഷ്കരണത്തിന്റെയും ദൃഢമായ പ്രക്രിയ" ആവശ്യമാണെന്ന് പാപ്പാ ഓർമ്മപ്പെടുത്തി. ഒരു പുതിയ സമീപനത്തിന്റെ ആവശ്യകത വ്യക്തമാണ്, "വിശാലമായ നരവംശശാസ്ത്രപരവും പാരിസ്ഥിതികവുമായ പ്രതിസന്ധിയിൽ" പ്രകടമായ സമൂഹത്തിലെ "യഥാർത്ഥ യുഗമാറ്റത്തിന്റെ" വെളിച്ചത്തിൽ പാപ്പാ വ്യക്തമാക്കുന്നു. സഭാ സ്ഥാപനങ്ങളിൽ പഠിക്കുന്നതിനുള്ള പുതിയ സമീപനത്തെ നയിക്കാൻ, ഫ്രാൻസിസ് പാപ്പാ നാല് മാനദണ്ഡങ്ങൾ വാഗ്ദാനം ചെയ്യുന്നു.

1.     യേശുക്രിസ്തുവിന്റെ സുവിശേഷത്തിന്റെ എക്കാലത്തെയും പുതുമയുള്ളതും ആകർഷകവുമായ സദ് വാർത്തയുടെ അവതരണം

2.     വിശാലമായ സംവാദത്തിനും, കൂടികാഴ്ചയുടെ സംസ്കാരത്തിനും ഒരു സമർപ്പണം

3.     പഠനത്തിനുള്ള ഇന്റർ-ഡിസിപ്ലിനറി, ക്രോസ്-ഡിസിപ്ലിനറി സമീപനങ്ങളോടുള്ള പ്രതിബദ്ധത

4.     പരസ്പര താൽപ്പര്യമുള്ള പഠനങ്ങൾ പ്രോത്സാഹിപ്പിക്കുന്നതിന് മറ്റ് സ്ഥാപനങ്ങളുമായി ശൃംഖല ഊന്നൽ നൽകുന്നു.

കെറിഗ്മയുടെ പുതിയ അനുഭവം

കെറിഗ്മയുടെ പുതിയ അനുഭവം വിദ്യാർത്ഥികൾക്ക് നൽകേണ്ടതിന്റെ പ്രാധാന്യം ഫ്രാൻസിസ് പാപ്പാ അടിവരയിടുന്നു. ക്രിസ്തീയ വിശ്വാസത്തിന്റെ കാതലായ സന്ദേശം യുവജനങ്ങളിൽ പ്രതിധ്വനിക്കുന്ന വിധത്തിൽ അവതരിപ്പിക്കുന്നത് ഇതിൽ ഉൾപ്പെടുന്നു. കത്തോലിക്കാ സ്കൂളുകൾ കേവലം വിവരങ്ങൾ കൈമാറുക മാത്രമല്ല, ക്രിസ്തുവുമായുള്ള വ്യക്തിപരമായ കണ്ടുമുട്ടൽ ആളിക്കത്തിക്കുകയും വേണം. വിശ്വാസം പ്രസക്തവും ആകർഷകവുമാക്കുന്നതിന് അവരുടെ അധ്യാപന രീതികൾ പൊരുത്തപ്പെടുത്താൻ ഈ ആശയം അധ്യാപകരെ വെല്ലുവിളിക്കുന്നു.

വിപുലമായ സംവാദം

ഫ്രാൻസിസ് പാപ്പയുടെ ഉദ്ബോധനങ്ങളിൽ  സംവാദം ഒരു പ്രധാന വിഷയമാണ്. വിശ്വാസ സമൂഹത്തിനുള്ളിൽ മാത്രമല്ല, വിശാല സമൂഹവുമായും വിപുലമായ ചർച്ചകളിലും സംവാദങ്ങളിലും ഏർപ്പെടാൻ പാപ്പാ കത്തോലിക്കാ വിദ്യാഭ്യാസ സ്ഥാപനങ്ങളോടു ആഹ്വാനം ചെയ്യുന്നു.  വിവിധ മതവിശ്വാസ സമൂഹങ്ങൾ തമ്മിലുള്ള സംവാദം, അവിശ്വാസികളുമായുള്ള സംവാദം, സമകാലിക പ്രശ്നങ്ങളെ ക്രിസ്തീയ വീക്ഷണകോണിൽ നിന്ന് അഭിസംബോധന ചെയ്യൽ എന്നിവ ഇതിൽ ഉൾപ്പെടുന്നു. അത്തരം ചർച്ചാവേദികൾ വൈവിധ്യമാർന്ന കാഴ്ചപ്പാടുകളെക്കുറിച്ച് ആഴത്തിൽ മനസ്സിലാക്കാനും വിമർശനാത്മകമായി ചിന്തിക്കാനുള്ള കഴിവുകൾ വികസിപ്പിക്കാൻ വിദ്യാർത്ഥികളെ സഹായിക്കുകയും ചെയ്യുന്നു. വിദ്യാഭ്യാസത്തോടുള്ള ഇന്റർ ഡിസിപ്ലിനറി, ക്രോസ് ഡിസിപ്ലിനറി സമീപനങ്ങളെയും പാപ്പാ പ്രോത്സാഹിപ്പിക്കുന്നു. ഇതിനർത്ഥം വിശ്വാസത്തെ വിവിധ അക്കാദമിക് വിഷയങ്ങളുമായി സംയോജിപ്പിക്കുക എന്നാണ്. വിദ്യാർത്ഥികൾ അവരുടെ വിശ്വാസവും ശാസ്ത്രം, ധാർമ്മികത, സാമൂഹിക നീതി തുടങ്ങിയ വിഷയങ്ങളും തമ്മിലുള്ള ബന്ധം കണ്ടെത്തണം. അത്തരമൊരു സമീപനം വിശ്വാസവും യുക്തിയും തമ്മിലുള്ള ഐക്യം വിലമതിക്കാൻ വിദ്യാർത്ഥികളെ സഹായിക്കുന്നു.

കൂടികാഴ്ചയുടെ സംസ്കാരം പ്രോത്സാഹിപ്പിക്കുക

കത്തോലിക്കാ സ്കൂളുകളിൽ കൂടികാഴ്ചയുടെ സംസ്കാരം പ്രോത്സാഹിപ്പിക്കുന്നതിന് ഫ്രാൻസിസ് പാപ്പാ ആഹ്വാനം ചെയ്യുന്നു. വിദ്യാർത്ഥികളും അധ്യാപകരും വൈവിധ്യതകളെ സ്വീകരിക്കുകയും മറ്റുള്ളവരുമായി അർത്ഥവത്തായ ഇടപെടലുകളിൽ ഏർപ്പെടുകയും ചെയ്യുന്ന ഒരു അന്തരീക്ഷം സൃഷ്ടിക്കുന്നത് ഇതിൽ ഉൾപ്പെടുന്നു. ഇത് സഹാനുഭൂതി, അനുകമ്പ, സ്വബോധം എന്നിവ വളർത്തുകയും ആത്യന്തികമായി ക്രിസ്തുമതത്തിന്റെ കേന്ദ്രമായ സ്നേഹത്തിന്റെയും ഉൾക്കൊള്ളലിന്റെയും സന്ദേശം പ്രതിഫലിപ്പിക്കുകയും ചെയ്യുന്നു.

ശൃംഖലകൾ സൃഷ്ടിക്കുന്നതിന്റെ അടിയന്തിരത

കത്തോലിക്കാ വിദ്യാഭ്യാസ സമ്പ്രദായത്തിനുള്ളിൽ സഹകരണത്തിന്റെ ശൃംഖലകൾ സൃഷ്ടിക്കേണ്ടതിന്റെ ആവശ്യകത പാപ്പാ അടിവരയിടുന്നു. സ്കൂളുകൾ, സർവ്വകലാശാലകൾ, മറ്റ് സ്ഥാപനങ്ങൾ എന്നിവ തമ്മിലുള്ള സഹകരണം വിദ്യാഭ്യാസത്തിന്റെ ഗുണനിലവാരം ഉയർത്തുകയും മികച്ച സമ്പ്രദായങ്ങൾ പങ്കിടാൻ സഹായിക്കുകയും ചെയ്യും. പാർശ്വവത്കരിക്കപ്പെട്ട സമൂഹങ്ങളിലേക്ക് കത്തോലിക്കാ വിദ്യാഭ്യാസം വ്യാപിപ്പിക്കുന്നതിലും ഈ ശൃംഖലകൾ നിർണ്ണായക പങ്ക് വഹിക്കും.

പാർശ്വവത്കരിക്കപ്പെട്ടവർക്ക് അനുകൂലമായ ഒരു തിരഞ്ഞെടുപ്പ്

ഫ്രാൻസിസ് പാപ്പയുടെ ഏറ്റവും ഹൃദയസ്പർശിയായ ഉദ്ബോധനങ്ങളിൽ ഒന്ന്, ഏറ്റവും കുറവുള്ളവരായി സമൂഹം തള്ളിക്കളയുന്നവർക്ക് അനുകൂലമായ ഒരു ഓപ്ഷനുവേണ്ടിയുള്ള ആഹ്വാനമാണ്. കത്തോലിക്കാ സ്കൂളുകൾ പാർശ്വവത്കരിക്കപ്പെട്ട സമൂഹങ്ങളുമായി സജീവമായി ഇടപഴകുകയും അവരെ സേവിക്കുകയും വേണം. ഇതിനർത്ഥം പിന്നാക്കം നിൽക്കുന്ന വ്യക്തികൾക്ക് ഗുണനിലവാരമുള്ള വിദ്യാഭ്യാസം ലഭ്യമാക്കുക, സാമൂഹിക അനീതികളെ അഭിസംബോധന ചെയ്യുക എന്നൊക്കെയാണ്. അതിന് ശിരസ്സ്, ഹൃദയം, കൈകൾ എന്നിവ സംയോജിപ്പിക്കേണ്ടതിന്റെ പ്രാധാന്യം പാപ്പാ ഊന്നിപ്പറയുന്നു.

കത്തോലിക്കാ സ്കൂളുകൾ ബൗദ്ധിക വളർച്ച (തല), വൈകാരികവും ആത്മീയവുമായ വികാസം (ഹൃദയം), സേവനത്തോടും സാമൂഹിക നീതിയോടും (കൈകൾ) ഉള്ള പ്രതിബദ്ധത എന്നിവ പരിപോഷിപ്പിക്കണം.  ഈ സമഗ്രമായ സമീപനം വിദ്യാർത്ഥികൾക്ക് വിശ്വാസവും, ജീവിത ലക്ഷ്യവും ക്രോഡീകരിക്കുന്ന സമഗ്രമായ വിദ്യാഭ്യാസം ലഭിക്കുന്നുവെന്ന് ഉറപ്പാക്കുന്നു. ചുരുക്കത്തിൽ, യുവജനങ്ങളുടെ സുവിശേഷവൽക്കരണത്തിൽ കത്തോലിക്കാ വിദ്യാഭ്യാസ സംവിധാനങ്ങൾ  സുവിശേഷ പ്രഘോഷണത്തിന്റെ ഒരു പുത്തൻ അനുഭവം യുവാക്കൾക്ക് നൽകണം. അതിനായി സ്ഥാപനങ്ങളിൽ  വിപുലമായ സംവാദങ്ങൾ പ്രോൽസാഹിപ്പിക്കണം. വിദ്യാഭ്യാസത്തിന്റെ വിവിധ തലങ്ങൾ ഈ ലക്ഷ്യത്തിലേക്ക് പരസ്പരം സഹകരിക്കുന്ന ഒരു സംവിധാനം തയ്യാറാക്കണം. കൂടികാഴ്ചയുടെ സംസ്കാരത്തിന് മുൻതൂക്കം നൽകുകയും ആരേയും ഒഴിവാക്കുകയും പാർശ്വവത്കരിക്കുകയും ചെയ്യാതെ സമൂഹം പുറന്തള്ളുന്നവർക്ക് വേണ്ടി അവർക്കനുകൂലമായ ഒരു തിരഞ്ഞെടുപ്പ് സഭയുടെ വിദ്യാഭ്യാസ സംവിധാനങ്ങളിൽ ഉണ്ടാവണമെന്ന്  ഫ്രാൻസിസ് പാപ്പാ കർക്കശം എടുത്തു പറയുന്നു.

ഈ തത്ത്വങ്ങൾ കത്തോലിക്കാ അധ്യാപകർക്ക് യുവാക്കളെ സേവിക്കുന്നതിലും വിശ്വാസം, അനുകമ്പ, നീതി എന്നിവയുടെ മൂല്യങ്ങൾ പ്രോത്സാഹിപ്പിക്കുന്നതിലും അവരുടെ ദൗത്യം പുതുക്കുന്നതിനും പുനരുജ്ജീവിപ്പിക്കുന്നതിനും സമഗ്രമായ ചട്ടക്കൂട് നൽകുന്നു. ഈ ആഹ്വാനങ്ങൾ സ്വീകരിക്കുന്നതിലൂടെ, അതിവേഗം മാറിക്കൊണ്ടിരിക്കുന്ന ലോകത്തിൽ യുവജനങ്ങളുടെ സുവിശേഷവൽക്കരണത്തിനുള്ള ഒഴിവാക്കാനാവാത്ത ഇടങ്ങളായി  കത്തോലിക്കാ വിദ്യാലയങ്ങൾ മാറുകയും  തുടരുകയും  ചെയ്യും.