ር.ሊ.ጳ ፍራንችስኮስ የማርያም ሕይወት በአገልግሎት እና በምስጋና ተለይቶ ይታወቃል ማለታቸው ተገለጸ!

የጎርጎሮሳዊያኑን የቀን አቆጣጠር በሚከተሉ የካቶሊክ ቤተክርስቲያን ምዕመናን ዘንድ በነሐሴ 09/2015 ዓ.ም የፍልሰታ ማርያም አመታዊ በዓል በታላቅ መንፈሳዊነት በመከበር ላይ የገኛል። በወቅቱ ርዕሰ ሊቃነ ጳጳሳት ፍራንችስኮስ በቫቲካን በሚገኘው በቅዱስ ጴጥሮስ አደባባይ ለተሰበሰቡ ምዕመናን በእለቱ ከሉቃስ ወንጌል (1፡39-66) ተወስዶ በተነበበውና  “ማርያምም በዚያው ሰሞን በፍጥነት ተነሥታ ወደ ደጋው አገር፣ ወደ አንድ የይሁዳ ከተማ ሄደች፤ ወደ ዘካርያስ ቤትም ገብታ ለኤልሳቤጥ ሰላምታ አቀረበች። ኤልሳቤጥም የማርያምን ሰላምታ በሰማች ጊዜ፣ ፅንሱ በማሕፀኗ ውስጥ ዘለለ፤ ኤልሳቤጥም በመንፈስ ቅዱስ ተሞላች .... ማርያምም እንዲህ አለች፤ “ነፍሴ ጌታን ከፍ ከፍ ታደርገዋለች፤ መንፈሴም በመድኀኒቴ በእግዚአብሔር ደስ ትሰኛለች፤ እርሱ የባሪያውን መዋረድ ተመልክቷልና። ከዛሬ ጀምሮ ትውልድ ሁሉ ብፅዕት ይሉኛል፤ ኀያል የሆነው እርሱ ታላቅ ነገር አድርጎልኛልና፤ ስሙም ቅዱስ ነው፤ ምሕረቱም ለሚፈሩት ከትውልድ እስከ ትውልድ ይኖራል” በሚለው የቅዱስ ወንጌል ክፍል ላይ መሰረቱን ያደረገ አስተንትኖ ማድረጋቸው የተገለጸ ሲሆን የማርያም ሕይወት በአገልግሎት እና በምስጋና ተለይቶ ይታወቃል ማለታቸው ተገልጿል።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደርጉትን የቅዱስ ወንጌል አስተንትኖ ሙሉ ይዘቱን እንደ ሚከተለው አሰናድተነዋል፤ ተከታተሉን።

የተወደዳችሁ ወንድሞቼ እና እሕቶቼ እንደምን አረፈዳችሁ!

ዛሬ ቀን የድንግል ማርያም ክብረ በአል ላይ ማርያም በሥጋ በነፍስ ወደ ገነት በማረግ ክብር ማግኘቷ ላይ እናሰላለን። የዛሬው ቅዱስ ወንጌል እሷን ወደ ተራራው ስትወጣ ያቀርብልናል፣ በእዚያን ጊዜ "ወደ ተራራማው አገር" (ሉቃስ 1፡39) ተነስታ ሄደች ይለናል። እናም ለምን እዚያ ወደ ተራራው ላይ ትወጣለች? የአጎቷን ልጅ ኤልዛቤትን ለመርዳት እና እዚያም ምስጋና እና ደስታን ታውጃለች። ማርያም ወደ ላይ ትወጣለች እና የእግዚአብሔር ቃል እንዲህ ስታደርግ የሚለየን ምን እንደሆነ ይገልጥልናል፡ ለባልንጀራዋ አገልግሎት እና ለእግዚአብሔር ምስጋና ይሁን። እነዚህ ሁለቱም ነገሮች፡ ማርያም ባልንጀራዋን የምታገለግል ሴት ናት ማርያም ደግሞ እግዚአብሔርን የምታመሰግን ሴት እንደ ሆነች ያሳያል። ወንጌላዊው ሉቃስ ደግሞ የኢየሱስን ሕይወት ሲተርክ ወደ ላይ ወደ ሲወጣ ራሱን በመስቀል ላይ የመስጠት ቦታ ወደ ሆነችው ወደ ኢየሩሳሌም ሲሄድ ተርኳል። የማርያምን ጉዞም በተመሳሳይ መንገድ ገልጿል። ኢየሱስና ማርያም፣ ባጭሩ፣ አንድ መንገድ ይጓዛሉ፡ ወደ ላይ የሚወጡ ሁለት ሕይወቶች፣ እግዚአብሔርን እያከበሩ እና ወንድሞችን እያገለገሉ ነው። ኢየሱስ እንደ ቤዛ፣ ለእኛ ነፍሱን አሳልፎ የሚሰጥ፣ ለእኛ መጽደቅ ሲል እራሱን አሳልፎ ሰጥቷል፣ ማርያም ለማገልገል የምትሄድ አገልጋይ ሆና ስትቀርብ ሞትን አሸንፈው የሚነሱ ሁለት ህይወቶች፣ ምስጢራቸው አገልግሎት እና ምስጋና የሆኑ ሁለት ህይወቶች እንደ ነበሩ ያሳያል። እነዚህን ሁለት ገፅታዎች በጥልቀት እንመልከታቸው፡ አገልግሎት እና ምስጋና።

አገልግሎት! ወንድሞቻችንን ለማገልገል ስንነሳ ነው ማገልገል የምንችለው፥ ህይወትን ከፍ የሚያደርገው ፍቅር ነው። ወንድሞቻችንን ለማገልገል እንሄዳለን እናም በዚህ አገልግሎት "እናወጣለን"። ማገልገል ግን ቀላል አይደለም፡ ገና ፀንሳ የነበረችው እመቤታችን ከናዝሬት ወደ 150 ኪሎ ሜትር ርቀት ተጉዛ ወደ ኤልሳቤጥ ቤት ደረሰች። መርዳት ለሁላችንም ውድ የሆነ ነገር ነው! ይህንን ሁሌም የምንለማመደው ሌሎችን መንከባከብ በሚያስከትል ድካም፣ ትዕግስት እና ጭንቀቶች ውስጥ ነው። ለምሳሌ ያህል ብዙ ሰዎች በየቀኑ ወደ ሥራና ወደ ሥራ የሚሄዱበትን ኪሎ ሜትሮች እና ለሌሎች ስለሚያከናውኑት ብዙ ተግባራት አስብ፣ አዲስ የተወለደ ሕፃን ወይም አረጋዊን በመንከባከብ ጊዜና እንቅልፍ እጦት የሚከፈለውን መስዋዕትነት አስብ፤ በምላሹ ምንም የሚያቀርቡትን ለማገልገል የሚደረገው ጥረት በቤተክርስቲያኑ ውስጥ እና በበጎ ፈቃድ ስራ ላይ የተሰማሩትን ሰዎች ማሰብ እንችላለን። የበጎ ፈቃድ ስራን አደንቃለሁ። አድካሚ ነው፣ ግን ወደ ላይ ይወጣል፣ ወደ ገነት ያደርሳል! ይህ እውነተኛ አገልግሎት ነው።

ነገር ግን አገልግሎት ያለ እግዚአብሔር ምስጋና መካን እንድንሆን ያጋልጣል። በእውነት ማርያም የአጎቷ ልጅ ቤት ስትገባ ጌታን ታመሰግናለች። ከጉዞዋ የተነሳ ድካሟን አታወራም ይልቁንም የደስታ መዝሙር ከልቧ ይወጣል። እግዚአብሔርን የሚወዱ ምስጋናን ስለሚያውቁ ነው። የዛሬው ወንጌል ደግሞ ያሳየናል “እነሆ፤ የሰላምታሽ ድምፅ ጆሮዬ እንደ ገባ፣ በማሕፀኔ ያለው ፅንስ በደስታ ዘሏልና” (ሉቃ. 1፡44)፤ ኤልሳቤጥ የበረከት ቃል እና “የመጀመሪያውን የብፅህና መስጋና” የምትናገረው፡ “ያመነች የተባረከች ናት” (ሉቃስ 1፡45)። እናም ሁሉም ነገር የሚያበቃው በማርያም ነው፣ የምስጋና መዝሙር በማወጅ (ሉቃ. 1፡46-55)። ውዳሴ ደስታን ይጨምራል። ምስጋና እንደ መሰላል ነው፡ ልብን ወደ ላይ ይመራል። ውዳሴ ነፍሳትን ያነሳል እናም ተስፋ የማጣትን ፈተናን ያሸንፋል። ሰዎች፣ ከሐሜት ርቀው የሚኖሩ፣ ውዳሴን ለመስጠት አቅመ ቢስ ሲሆኑ አይታችኋል አይደል? ራሳችሁን ጠይቁ፡ እኔ ምስጋና ማቅረብ እችላለሁን? እግዚአብሔርን በየቀኑ እና ሌሎችንም ማመስገን እንዴት ጥሩ ነው! ከፀፀትና ቅሬታ ይልቅ በምስጋናና በመባረክ መኖር፣ ፊታችንን ከመዘፍዘፍ ይልቅ ዓይናችንን ወደ ላይ ማድረግ እንዴት መልካም ነው! ቅሬታ፡ በየቀኑ የሚያዝኑ ሰዎች አሉ። ግን እግዚኣብሄር ከጎንህ እንደ ሆነ ተመልከት፣ እርሱ እንደ ፈጠረህ አስብ፣ እርሱ የሰጠህን ነገሮች በሙሉ አስብ። ተመስገን ተመስገን! ይህ ደግሞ መንፈሳዊ ጤንነት ነው።

አገልግሎት እና ምስጋና! እራሳችንን ለመጠየቅ እንሞክር፡ ሥራዬንና የዕለት ተዕለት ሥራዬን የምኖረው በአገልግሎት መንፈስ ነው ወይስ በራስ ወዳድነት? አፋጣኝ ጥቅሞችን ሳልፈልግ ራሴን ለተሰማኝ ሰው እሰጣለሁ? ባጭሩ አገልግሎት ሕይወቴን “መስፈንጠሪያ ጣውል” አደርገዋለሁ? ስለ ምስጋናም እያሰብኩ፡ እኔ እንደ ማርያም በእግዚአብሔር ደስ ይለኛል (ሉቃ. 1፡47) ወይ? ጌታን እየባረኩ እጸልያለሁ ወይ? እናም ካመሰገንኩት በኋላ፣ በማገኛቸው ሰዎች መካከል ደስታውን እዘረጋለሁ ወይ? እያንዳንዳችሁ ለእነዚህ ጥያቄዎች መልስ ለመስጠት ሞክሩ።

ወደ ሰማይ ቤት ያረገችው እናታችን እመቤታችን ቅድስት ድንግል ማርያም በአገልግሎት እና በምስጋና በየቀኑ ወደ ላይ እንድንወጣ እርሷ በአማላጅነቷ ትርዳን።