ፈልግ

Vatican News
ርዕሰ ሊቃነ ጳጳሳት ፍራንቸስኮስ በቫቲካ የቅዱስ ወንጌል አስተንትኖ ባደረጉበት ወቅት ርዕሰ ሊቃነ ጳጳሳት ፍራንቸስኮስ በቫቲካ የቅዱስ ወንጌል አስተንትኖ ባደረጉበት ወቅት   (ANSA)

ር.ሊ.ጳ ፍራንቸስኮስ ኢየሱስ ይጠበቀናል፣ ያውቀናል፣ ይወደናል አሉ!

ርዕሰ ሊቃነ ጳጳሳት ፍራንቸስኮስ ዘወትር እሁድ እለት በእለቱ በሚነበበው ቅዱስ ወንጌል ላይ ተንተርሰው አስተንትኖ እንደ ሚያደርጉ ይታወቃል። በእዚህ መሰረት ቅዱስነታቸው በሚያዝያ 17/2013 ዓ.ም ከቫቲካን ሆነው ያደረጉት አስተንትኖ በእለቱ ከዮሐንስ 10፡11-18 ላይ በተጠቀሰው የመልካሙ እረኛ ታሪክ በሚገልጸው በቅዱስ ወንጌል ክፍል ላይ መሰረቱን ያደረገ እንደ ነበረ የተገለጸ ሲሆን ኢየሱስ እኛን ይጠብቀናል፣ ያውቀናል፣ ይወደናል ማለታቸው ተገልጿል።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን አስተንትኖ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ዛሬ መልካም እረኛ እሁድ ተብሎ በሚጠራው በዚህ ፋሲካ በዓል በአራተኛው ሳምንት እሁድ ላይ (የጎርጎሮርሳዊያኑን የቀን አቆጣጠር በሚከተሉ የካቶሊክ ቤተክርስቲያን የስርዓተ አምልኮ አቆጣጠር ደንብ መሰረት ማለት ነው) ከዮሐንስ ወንጌል 10:11-18 ተወስዶ የተነበበው ቃል ኢየሱስ በጎቹን የሚከላከል ፣ የሚያውቅና የሚወድ እውነተኛ እረኛ አድርጎ ያቀርባል።

“ቅጥረኛው” የመልካም እረኛ ተቃራኒ ነው ፣ በጎቹ የእርሱ ስላልሆኑ ብዙም ግድ አይለውም። እሱ የሚሠራው ለደመወዝ ብቻ ነው፣ እናም እነሱን ስለመከላከል አያሳስበውም፣ ተኩላ ሲመጣ ይሸሻል እና ብቻቸውንም ይተዋቸዋል (ዮሐ 10፡ 12-13)። በምትኩ ፣ እውነተኛው እረኛ የሆነው ኢየሱስ ሁል ጊዜ ይጠብቀናል እናም በየቀኑ እና በየጊዜው እርሱን ለማዳመጥ ከፈለግን ሁልጊዜ በምናገኘው በቃሉ ብርሃን እና በመገኘቱ ብርታት አማካኝነት ከብዙ አስቸጋሪ ሁኔታዎች ፣ አደገኛ ሁኔታዎች ያድነናል።

ሁለተኛው ገጽታ መልካም እረኛ የሆነው ኢየሱስ እኛን ያውቀናል የሚለው ነው፣ የመጀመሪያው ገጽታ-በጎቹን ይከላከላል ከሚለው ገጽታ ቀጣይ ሲሆን ሁለተኛው ገጽታ ደግሞ - በጎቹን ያውቃል በጎቹም እርሱን ያውቁታል (ዮሐንስ 10፡14) የሚለው ነው። ኢየሱስ አንድ በአንድ እንደሚያውቀን፣ እኛ በእርሱ የምንታወቅ መሆናችን ፣ ስማችን በእርሱ ዘንድ የታወቀ መሆኑን ማወቁ ምንኛ ያጽናናል! እርሱ እኛን በጅምላ አይደለም የሚያውቀን። እያንዳዳችን ለየት ባለ ሁኔታ ነው የሚያውቀን፣ እያንዳንዳችንን ከነታሪካችን ነው የሚያውቀን፣ እያንዳንዳችንም በእርሱ ዘንድ ዋጋ አለን፣ ሁሉም በመፈጠራቸው ፈጣሪ እና በክርስቶስ ስለተዋጁ። እያንዳንዳችን ኢየሱስ ያውቀኛል ልንል እንችላለን! እያንዳንዳችን ኢየሱስ ያውቀናል! እውነት ነው ፣ እንደዚህ ነው እሱ እንደማንኛውም ሰው ሳይሆን የሚያውቀን ነገር ግን በልባችን ውስጥ ያለውን ፣ ዓላማችንን ፣ በጣም የተደበቀ ስሜታችንን የሚይውቀው እርሱ ብቻ ነው። ኢየሱስ የእኛን ጥንካሬዎች እና ጉድለቶች ያውቃል ፣ እናም እኛን ለመንከባከብ ፣ የስህተቶቻችንን ቁስሎች በምህረቱ ብዛት ለመፈወስ ሁል ጊዜ ዝግጁ ነው። ነቢያት የእግዚአብሔርን ህዝብ እረኛ በተመለከተ ያቀረቡት ምስል በእርሱ ሙሉ በሙሉ ተፈጽሟል-ኢየሱስ ስለ በጎቹ ያስባል ፣ ይሰበስባል ፣ ቁስላቸውን ያክማል፣ ህመሞቻቸውን ይፈውሳል። ይህንን በነቢዩ ሕዝቅኤል መጽሐፍ ውስጥ ማንበብ እንችላለን (ሕዝ 34 11-16)።

ስለዚህ ፣ ጥሩ እረኛ የሆነው ኢየሱስ በጎቹን ይጠብቃል ፣ ያውቃል ፣ እና ከሁሉም በላይ ይወዳል። ለዚህም ነው ነፍሱን ለእነሱ የሚሰጠው (ዮሐ. 10፡15)። ለበጎቹ ማለትም ለእያንዳንዳችን ያለው ፍቅር በመስቀል ላይ እንዲሞት አድርጎታል። ይህ የአብ ፈቃድ ነውና - ማንም እንዳይጠፋ ይፈልጋል። የክርስቶስ ፍቅር አግላይ የሆነ ፍቅር አይደለም፣ ሁሉንም ያቅፋል። እርሱ ራሱ በዛሬው ወንጌል ውስጥ ይህንን ያስታውሰናል “ከዚህ ጒረኖ ያልሆኑ ሌሎች በጎች አሉኝ፤ እነርሱንም ማምጣት አለብኝ። እነርሱም ድምፄን ይሰማሉ፤ አንድ መንጋም ይሆናሉ፤ እረኛውም አንድ” (ዮሐ 10፡16) ይለናል። እነዚህ ቃላት የእርሱን ሁለንተናዊ አሳቢነት ይመሰክራሉ እርሱ የሁሉም እረኛ ነው። ኢየሱስ እያንዳንዱ ሰው የአባቱን ፍቅር እንዲቀበል እና እግዚአብሔርን እንዲገናኝ ይፈልጋል።

እናም ቤተክርስቲያን ይህንን የክርስቶስ ተልእኮ እንድትወጣ ተጠርታለች። በቤተክርስቲያናችን ውስጥ ከሚሳተፉ ሰዎች ባሻገር በተወሰነ ጊዜ ብቻ ወይም በጭራሽ ቤተክርስቲያን ውስጥ የማይሳተፉ ብዙ ሰዎች አሉ። ነገር ግን ይህ ማለት እነሱ የእግዚአብሔር ልጆች አይደሉም ማለት አይደለም - አብ ለሁሉም ሰው መልካም እረኛ ለሆነው ለኢየሱስ ሁሉንም በአደራ ሰጥቷል።

ወንድሞች እና እህቶች ፣ ኢየሱስ እኛን ይጠብቀናል፣ ያውቀናል እንዲሁም ይወደናል። በተልእኮው ደስታ ውስጥ ለመተባበር መልካሙን እረኛ ለመቀበል እና ለመከተል እንችል ዘንድ እመቤታችን ቅድስት ድንግል ማርያም እኛን ትርዳን።

25 April 2021, 10:43