ካብ ግብጺ ናብ ጋዛ ዚሓልፍ ዘሎ ተወሳኺ ረድኤት

ኣባ ተወልደ መብራህቱ - ሃገረ ቫቲካን

ኣህጉራዊ መራኸቢ ብዙሓን ከም ዝገለጾ ኢስማኢል ሃኒየ ነቲ ብቐጻሊ ዚፍጸም ዘሎ መጥቃዕቲ ደው ኬብልዎ ብዛዕባ ዚኽእሉሉ ዝዀነ ይኹን መሰናድዎ ወይ ተበግሶ ኺመያየጥ ከም ዚኽእል ገሊጹ ።

ሓላፊ ፖለቲካዊ ቤት ጽሕፈት ጉጅለ ሓማስ ዝዀነ ሃኒየ አብ መራኸቢ ብዙሓን ብቋንቋ ዓረብ ኣብ ዘቕረቦ መደረ ብዘይ ሓማስ ብዛዕባ መጻኢ ቃዛ ዚገልጽ ዝዀነ ይኹን መሰናድዎ ኸም ዘይዕወት ገለጸ ። ሃኒየ ነቲ ው. ሕ. ሃ. ዘበገሶ ኣብ ቃዛ ህጹጽ ትኹሲ ናይ ምቁራጽ ውሳነ ብሓጐስ ተቐቢልዎ አሎ ።

እዚ ኸምዚ ኢሉ ኸሎ እስራኤል ብዙሓት ወተሃደራት ሓማስ ኣብ ሰሜናዊ ቃዛ ኣብ ዝርከብ ሆስፒታል ኢዶም ከም ዝሃቡ ትገልጽ ።

ናይ ግብረ - ሰናይ ረድኤትን ነዳድን

ኣብ ካልእ ቦታታት ከኣ ግብጺ ነቲ በብመዓልቱ ናብ ገማግም ቃዛ ዚለኣኽ መጠን ነዳዲ ኻብ 129,000 ናብ 189,000 ሊትሮ ኸም ዘዛየደቶ ትገልጽ አላ ። ካብ 21 ጥቅምቲ ኣትሒዙ 4,057 ናይ ግብረ - ሰናይ ረድኤት ዝጸሓና ዓበይቲ ማካይን ካብ ግብጺ ናብቲ ራፋ ዝበሃል ከባቢታት ተሳጊረን አለዋ ።

እዚ ድማ መድሃኒት መግቢ ማይ 2,678 ቶን ነዳዲ ከምኡውን 48 ኣምቡላንስን ድንኳናትን ዘጠቓልል ኢዩ ።

እዚ ኸምዚ ኢሉ ኸሎ ናይ እስራኤል ኣምባሳደር አብ ብሪጣንያ ነቲ ኣብ መንጎ እስራኤልን ፍልስጥኤማውያንን ዘሎ መፍትሔ ክኸውን ዝኽእል ናይ ኽልተ-መንግስታት ዝብል ሓሳብ ነጺግዎ ይርከብ፣ አብ መግለጺኡ ድማ  ፍልስጥኤማውያን 'ኣብ ጥቓ እስራኤል ዝኾነ መንግስቲ ኽህልዎም ፈጺሞም ኣይደለዩን ኢዮም ' ድማ በለ።