ካርዲናል ፓሮሊን ምስ ናይ ሕብረት ሃገራት ዓረብ ልኡኽ ተራኺቦም

ስምዖን ተ. ኣርኣያ - ሃገረ ቫቲካን

ናይ ቅድስቲ መንበር ዋና ጸሓፊ ካርዲናል ፒየትሮ ፓሮሊን  ኣብ ቅድስቲ መንበር ናይ ፍልስጥኤም ልኡከ መንግስቲ ዒሳ ካሲሴ ናይ ሊባኖስ ልኡከ መንግስቲ ፋሪድ ኤል ካዘን፤ ናይ ዒራቕ ራህማን ፋርሃን ዓብደላ ኣላኣመሪ፤ ከምኡ’ውን ናይ ምስሪ ልኡከ መግንስቲ ማሕሙድ ጣላት ምስ ዝተሰነዩ ምስ ልኡኽ ማሕበር ሃገራት ዓረብ ኤናስ ሰይድ መሓመድ ዓሊ መካዊ ኣብ ዘካየድዎ ርክብ  ቅድስቲ መንበር ብዛዕባ ህልው ኩነታት እስራኤልን ፍልስጤምን ከምዘተሓሳስባ ደጊሞም ከም ዝገለጹ ዜና ቫቲካን ናይ ቅድስቲ መንበር ዜናን ክፍሊ ማሕተምን መግለጺ ጠቒሱ የመላኽት።

ናይ ቅድስቲ መንበር ስክፍታ

ኣብቲ ኣብ ናይ ቅድስቲ መንበር ቤት ጽሕፈት ዋና ጸሓፊ ኣብ ዝተኻየደ ምዉቕን ዓሚቕን ዘተ ብፁዕ ካርዲናል ፓሮሊን ር.ሊ.ጳ. ፍራንቸስኮ ተኹሲ ደው ክብል ናብ ቓዛ ሰብኣዊ ረድኤት ክበጽሕን ብተደጋጋሚ ዘቕረብዎ ጻውዒት ዘኪሮም፣ ህጹጽ ኣድላይነት ሰላምን... ኣብቲ ዞባ ነባሪ ሰላም ንምምጻእ፡ ክልተ ጎረባብቲ ሃገራትን መንግስታትን ዝብል መርገጺ ምሉእ ብምሉእ ምትግባርን፡ ከምኡ’ውን ንከተማ ኢየሩሳሌም ብዓለምለኻዊ ደረጃ ውሕስነት ዘለዎ ህልዊ ኹኔታ ዝብል መረገጺ ወሳኒ ምዃኑ ከም እተሰመረሉ ናይ ቅድስቲ መንበር ዜናን ክፍሊ ማሕተምን መገልጺ ዝጠቐሰ ዜና ቫቲካን ኣፍሊጡ።