ብመንፈስ ድኻታት ብፁዓን እዮም እንክብል ናይ ምጒሓፍ ባህሊ ክነወግድ ይዕድመና! ር.ሊ.ጳ.

“እዞም ወንጌል “ብመንፈስ ድኻታት” ዝብሎም መን እዮም፧ ቢልና ምስ እንሓትት እቶም ርእሶም ከም ዘይክእሉ ዝፈልጡ፡ ብቊዕ መነባብሮ ከምዘይብሎም ዝስቈረሮም ከም "ለመንቲ ኣምላኽ" ኮይኖም ዝነብሩ እዮም። ከማኡ እውን እቶም ኣምላኽ ብግዲ ከም ዘድልዮም ዝስምዖምን ሠናይ ዘበለ ኩሉ ካብኡ ከም ዝመጽእ እሞ፡ ከም ህያብ፡ ከም ጸጋ እናተቀበልዎ ዝነብሩ እዮም። ብሓጺሩ ብመንፈስ ድኻ ዝኾነ ነቲ ዝረኸቦ ኣኽቢሩ ዝዕቅብ፤ በዚ ከኣ ዝኾነ ህያብ ክጠፍኦ ኣይደልን። ሎሚ ኣብዛ ወትሩ ትጥቀስ ብመንፈስ ድኻታት ንእትብል ሓረግ ክነስተንትን ምደለኹ። ብመንፈስ ድኻታት ማለት ዘየባኽኑ ማለት እዩ። ብመንፈስ ድኻታት ዋላ ሓንቲ ንከየባኽኑ ይጋደሉ። ኢየሱስ ንኣገዳስነት ዘይምብኻን ኣብ ወንጌሉ ይምህረና፣ ንኣብነት ድሕሪ ተኣምር ምብዛሕ እንጌራን ዓሳን ዝኾነ ነገር ከይጠፍእ ኩሉ እቲ ተረፍ መግቢ ክንእክብ ይሓትት (ዮሓ 6፡12)። እዚ ዘይምብኻን ዝብል ኣምር ዋጋ ገዛእ ርእስና፣ ዋጋ ካልኦት ሰባትን ናይ ነገራትን ዋጋን ከነስተማቕር የኽእለና። እቲ ዘሕዝን ግን ብፍላይ ኣብተን ዝያዳ ሃብታማት ሕብረተሰባት፡ ባህሊ ምሕጓሕፍን ባህሊ ብኽነትን ዝዓብለለን፡ መብዛሕትኡ ግዜ ዕሽሽ ዝበሃል መትከል እዩ: እንተ እዘን ክልተ ባህልታት ሕማም ተላገብ እየን። ኣንጻር እዚ ሕማም እዚ ማለት ኣተሓሳስባ ምጒሓፍን ብኽነትን ሰለስተ ብድሆታት ከቕርበልኩም እፈቱ። ቀዳማይ ብድሆ፡ ብዓንዲ ርእሱ ንሕና ዘለናዮ ህያብ ህላዌ ኣይተባኽንዎ። ነፍሲ ወከፍና ክንዮ ዘሎና ክእለትን ባህርያትን ሓደ ሠናይ ነገር ኢና። ነፍሲ ወከፍ ሰበይቲ፡ ነፍሲ ወከፍ ሰብኣይ ብተውህቦ ጥራይ ዘይኮነ፡ ብኽብሪ ሃብታም እዩ፡ ብኣምላኽ ይፍቶ፡ ብቑዕ እዩ፡ ክቡር እዩ። ኢየሱስ ብዘለና ንብረት ዘይኮነስ ብመንነትና ከም ዝተባረኽና የዘኻኽረና። ሓደ ሰብ ነብሱ ሓዲጉ ንርእሱ ምስ ደርበየ፡ ገዛእ ርእሱ የባኽን። ንገዛእ ርእስና ከም ዘይብቑዓትን ከም ዝተጋገናን ገሩ ስለ ገዛእ ርእስና ዕሚም እናበልና ንክንነብር ዝቀላቀለና ፈተና ብሓገዝ ኣምላኽ ንቃለሶ። ነዚ ስዒቡ ዝመጽእ ካልኣይ ብድሆ ከኣ፡ ዘለና ህያባት ኣይነባኽን። ኣብ ዓለምና ኣብ ዓመት ኣስታት ሲሶ ካብ ጠቕላላ ምህርቲ መግቢ ናብ ጐሓፍ ከም ዝኸይድ ተረጋጊጹ። እዚ ድማ ብዙሓት ብጥሜት እናተሳቀዩ! ጸጋታት ፍጥረት ብኸምዚ ክባኽኑ ከለው ማንም ክጥቀሙሉ ኣይክእልን። ኩሎም ሰባት ዘድልዮም ምእንቲ ከይጎድሎም፣ ኣቑሑት ክዕቀቡን ንዘድልዮ ክካፈሉን ኣለዎም። ናይ ፍትሕን ግብረ ሰናይን፣ ናይ ምክፋል ኢኮሎጂ ደኣ ንዘርግሕ እምበር ዘለና ኣይነባኽን! ኣብ መወዳእታ ሳልሳይ ብድሆ፡ ንሰባት ኣይተቃልሉ ወይውን ኣይትጒሓፉ! ንዘመንና ዓብሊሉ ሒዙ ዘሎ ናይ ምጒሓፍ ባህሊ፣ ክሳብ እተድልየኒ ክጥቀመካ እየ፤ ድሕሪኡ ምንም ዘይተግደሰኒ ምስ ኮንካ ወይውን ኣብ መንገደይ ዕንቅፋት ምስ እትኾነኒ ክጒሕፈካ እየ። ግዳይ ናይዚ ዝኾኑ ከኣ እቶም ኣዝዮም ተኣፈፍቲ ክፍሊ ሕብረተሰብና ኮይኖም፣ እዚኦም ገና ብርሃን ዓለም ዘይረኣዩ ኣብ ከብዲ ወለደን ዘለው ናጽላታት: ኣረጋውያን: ጽጉማትን ድኻታትን እዮም። ሰባት ግን ክንጒሕፎም ኣይግባእን እዩ። ድኻታት ፈጺሞም ክድርበዩ ኣይክኣልን! ነፍሲ ወከፍ ሰብ ቅዱስ ህያብ እዩ፣ ኣብ ነፍሲ ወከፍ ዕድመን ኣብ ነፍሲ ወከፍ ኩነታትን ነፍሲ ወከፍ ፍሉይ ህያብ እዩ። ንህይወት ኩሉ ግዜ ነኽብሮን ነደንፋዓዮን! ህይወት ኣይንጉሓፎ! ክቡራት ኣሕዋትን ኣሓትን እስኪ ንገዛእ ርእስና ሒደት ሕቶታት ንሓትት። ቅድሚ ዝኣገረ ንድኽነት ብመንፈስ ከመይ እነብሮ! ንኣምላኽ ከመይ ጌረ ቦታ ከም ዝህቦ እፈልጥ ድየ፣ ንሱ ሰናይን ሓቀኛን ዓቢን ሃብተይ ምዃኑ እኣምን ድየ? ንሱ ከም ዘፍቅረኒ እኣምን ድየ ወይስ ህያብ ምዃነይ ረሲዐ ብጓሂ ንነብሰይ እድርብያ? ደሓር ከኣ: ከየባኽን እጥንቀቕዶ፣ ኣብ ኣጠቓቕማ ነገራት፣ ኣቑሑት ሓላፍነት ይስመዓኒዶ? ንኻልኦት ከካፍሎምከ ድሉው ድየ ወይስ ንርእሰይ ጥራይ እየ ዝሓስብ፧ ኣብ መወዳእታ: ነቶም ኣምላኽ ክሕልዎም ሓደራ ዝበለኒ ኣዝዮም ተኣፈፍቲ ክፍሊ ሕብረተሰና ከም ክቡር ህያባትዶ እቖጽሮም? ነቶም ዘድሊ ኩሉ ዝጐደሎም ድኻታት እዝክሮምዶ? ናይ ብፅዕና ሰበይቲ ዝኾነት ቅድስት እኖና ድንግል ማርያም ህያብ ሕይወት ንዝህቦ ሓጎስን ክንምስክርን ንርእስና ከም ህያብ ኣብ ምሃብ ዝርከብ ጽባቐን ክንምስክርን ትሓግዘና።”