ድለ

Vatican News

ካብ ሞት ዝተንሠኤ ክርስቶስ ዘይጠልም ተስፋና እዩ! ር.ሊ.ጳ

ቅ.ኣ.ር.ሊ.ጳ ፍራንቸስኮስ ነቲ ልሙድ ኡርቢ ኤት ኦርቢ ንከተማን መላእ ዓለምን ዝብል መልእኽቶም እንከመሓላልፉ ‘ሽሕ’ኳ ዘሎናዮ ኩነት ከቢድ እንተኾነ እነብዕሎ ዘሎና ፍጻሜ ዘይጠልም ተስፋ ይህበና። እቲ እተሰቅለ ክርስቶስ ካብ ሞት ተንሢኡ እዩ’ እዩ እንክብሉ እንኮ ዘይጠልም ተስፋ እቲ ካብ ሞት ዝተንሠኤ ክርስቶስ ምዃኑ ገሊጾም።

ዜና ቫቲካን!

ቅዱስነቶም ‘ካቶሊካዊት ቤተክርስትያን ንምሉእ ዓለም ‘እቲ እትሰቅለ ኢየሱስ ካብ ሞት ተንሢኡ እዩ! ሃሌሉያ!’ እናበለት ነቲ ዘሐጒስ ዜና ተበሥር ትእውጅ’ እንክብሉ መኽፈቲ መልእኽቶም ገለጹ።

ሎምዘመን እውን ከምቲ ዓሚ ዝገበርዎ ካብ ሰግለለት መንበረ ጴጥሮስ ዘይኮነ ብምኽንያት ደረታት ሎበዳ ኮቪድ ካብ ውሽጢ ባዚሊካ ቅዱስ ጴጥሮስ እዮም ዘመሓላለፉ።

በዓለ ትንሣኤ ብሓቂ ዝጭበጥ ተስፋ ምጽንናዕን እዩ ዝህበና ዝበሉ ቅዱስነቶም መልእኽቶም ብምቅጻል እተኾነ እዚ መልእኽቲ እዚ ከምቲ ንሕና እንብህጎን እንሓሎምን ካብዚ ንዓለምና ኣጨኒቁ ዘሎ ጸገማት ሃንደበታዊ መህደሚ ወይውን መውጽኢ ኣይፈጥረልና። ካብቶም ዘጨንቁና ሓደ ለበዳ ኮቪድ ኮይኑ ብቀንዱ ንድኻታት ወገና ዘጥቅዕ ማሕበርውን ቁጠባውን ቅልውላው ፈጢሩ። ካብኡ ዝገደደ ከኣ ምንም ምኽንያት ክትረኽበሉ ዘይትኽእል ዕንቅፋት ዝመልኦ ግጭታት ውግእን ንግድ ኣዕናዊ ኣጽዋርን ገና ይድህኸና ኣሎ። ኣብዚ እንኮ ተስፋና ተስፋ ትንሣኤ እዩ ኢሎም።

ዘይጠልም ተስፋ!

መልእኽቲ ፋሲካ እንትርፎ እቲ እተሰቅለ ክርስቶስ እንተዘይኰይኑ ካልእ ማንም ካብ ዝተንሠኤ ከምዘየሎ ይገልጽና። እግዚአብሔር ኣቦ ነቲ መድሓኒ ፍቃዱ ንምፍጻም ድኻምነትናን ሕማምናን ክበድ ሃጥያትናን ክሳብ ሞት ዝተቀበለ ኢየሱስ ካብ ሞት ኣተንሢእዎ። እዚ ከኣ እግዚብሔር አቦ ንኢየሱስ ክርስቶስ ኣኽብሮ ጐይታ እዩ  ኣብ የማኑ ከኣ ንዘለዓለም ይነብር።

እቲ ጐይታና ኢየሱስ ክርስቶስ ኣብ ኣእዳውን ኣእጋሩን ጐድኑን ሒዝዎ ዘሎ ቅንዋት ናይ መወዳእታ ዘይብሉ ፍቅሩ ማሕተም እዮም። ካብና ዝኾነ ናይ ሥጋስ ይኹን ናይ ነፍሲ ብርቱዕ ፈተናን ቊስልን ዘጋጥመና ኸኣ ኣብዘን ቅንዋት እዚአን መሕብኢ ጸግዒ ንረክብ ካብኤን ከኣ ናይቲ ዘይጠልም ተስፋ ጸጋ ንቅበል።

እዚ ካብ ሙታን ተፈልዩ ዝተንሠኤ ጐይታና ኢየሱስ ዝዓደለና ዘይጠልም ተስፋ ምስ ነንሕድሕድና ምድግጋፍ ደሚርካ ነቶም ብለበዳ ኮቪድ ዝሳቀዩን ዝሓመሙን ፍቁራቶም ዝሰኣኑን ተስፋን ምጽንናዕን ይህብ።  ጐይታ ንኩሎም ምናዳ ከኣ ሕይወት ንምድሓን ለይትን መዓልትን ዝቃለሱ ንዘለው ሓካይምን ኣለይቲ ሕሙማትን ይደግፍ ድሕሪ ቢሎም ነፍስወከፍ ምናዳ ኸኣ ነቶም ተኣፈፍቲ ዝኾኑ ክፍሊ ሕብረተሰብና ፍሉይ ሓገዝ ንክረኽቡን ክንክን ክወሃቦምን ክትባት ክረኽቡን መሰል ከምዘልዎም ኣይንዘንግዕ ኢሎም።

ነዚ ጉዳይ እዚ ፍሉይ ኣድህቦ ብምግባር ዓለምለኸ ማሕበረሰብ ‘ነቲ ኣብ ምዕዳል ክትባት ዝረኤ ምናዳ ኸኣ ኣብተን ድኻታት ሃገራት ዝግበር ዘየድሊ ምድንጓያት ክኣሊ እምሕጸትን’ እንክብሉ ጸዊዖም።

ቅዱሰነቶም ‘እቲ እንካብ ሞት ተፈልዩ ዝተንሠኤ ክርስቶስ ነቶን ብሽቅለት ኣልቦነትን ቊጠባዊ ቅልውላውን ዝሳቀዩ ምጽንናዕ እዩ’ ምስ በሉ፡ ‘ክርስቶስ ንኩሎም ሰበሥልጣን ኣእምሮኦም ከብርህ እሞ ነፍሲወከፍ ምናዳ ኸኣ ነቶም ለበዳ ኮቪድ 19 ድራማዊ መንገዲ ብዝኾነ ዘጋደዶ  ድኽነት ገጾም ሸተት ዝብሉን ድሮ ብኣኡ ዝደሃኹን ጽጉማት ሥድራቤታ ንምርዳእ ከኽእሎም እጽሊ’ ኢሎም።

ጸገም ለበዳ ኮቪድ 19ን ሳዕቤናቱን ኣብ ኩሉ እኳ እንተኾነ ብሕልፊ ግን ነቶም ኣብ ገዛ ተዓጽዮም ካብ ትምህርትን ምስ ብጾቶም ካብ ምርኻብን ተዓጊቶም ዘለው መንእሰያት ኣብ ኣተሓሳስብ ዓቢ ጽልዋ ብምግባር ሥነ ኣእምሮዊ ተጽዕኖ ከምዝፈጥር ዝገለጹ ቅዱስነቶም፡ ‘ኣብ መላእ ዓለም ንዘለው መንእሰያት ቅርበተይ እገልጽ’ ኢሎም።

ፍሉይነት ተስፋ ትንሣኤ ንምግላጽ ቅዱስነቶም ነቲ ቅድሚ ዓመታት ቅዱስ ዮሓንስ ጳውሎስ ካልኣይ ንሃይቲ ክበጽሑ እንከለው ዝበልዎ ማለት ‘ብኩሉ ኩሉ ድኻታት ዝኾኑ ሎሚ ዳግም ተስፋ ክገብሩ ኣለዎም’ ዘኪሮም ሎሚ እውን እንተኾነ ፍቁር ሕዝቢ ሃይቲ ሓሳብ ቤተክርስትያን ከምዘይጐደለ ብምዝኽኻር ‘ንመጻኢኦም ብተስፋን ርእሰ ተኣማንንት ክጥምጡቱ እምበር ብግዝያዊ ጸገማት ሕልና ኣይተዕርቡ። ብመንፈስ ምሳኹም እየ ጸገማቶም ንሓንሳእን ንሓዋሩን ፍታሕ ክርከበሎም ከኣ እጽሊ ኣሎኹ’ እንክብሉ ምስቲ ብድኽነትን ለበዳ ኮቪድን ካልእ ምምህዳራዊ ጸገማትን ገና ዝደሃኽ ሕዝቢ ሃይቲ ዘለዎም ቅርበት ገሊጾም።

ቀጺሎም ዝዘክርዋ ሃገር ምያንማር ኰይና ስለመንእሰያቶም ከምዝጽልዩ ከምኡ ስለእቶም ካብ ውግእን ሓያል ድኽነቶም ክሃድሙ ኣብ ስደትን መከራን ዝርከቡ ኩሎም ንጐይታ ኣብ ፍኖተ መስቀል ከምዝስዕብዎ ብምስኽኻር ዘመደ ኣዳም ደገፍን ህውነትን ብግብሪ ከርኢ ጸዊዖም። ነቶም ስደተኛታት ብምቅባል ዓቢ ኣስተዋጽኦ ዝገብራ ዘለው ከማ በዓል ሊባኖስን ዮርዳኖስን ብምምስጋን ዓመጽ ሶርያ ደው ክብል ኣዘኻኺሮም። ዓለም ብዓለማ እዝና ጸሚሙ ዓይና ዔሩሉ ዘሎ ጉዳይ የነን ከምኡ እውን ዓመጽ ሊብያ ምፍሳስ ደምን ዕግርግርን ደው ክብል፡ ቦታ ትንሣኤ ዝኾነ ኢየሩሳሌምን ቅድስት መሬትን ከምኡ ኣብ ቀረባ እውን ዝበጽሕዋ ሃገረ ኢራቅ ምስ ምሉእ ማእከላይ ምብራቅ ሰላም ከውሕሱ ሓደራ ኢሎም።

ቅዱስነቶም ካብዚ ብምቅጻል ናብ ኣህጉር ኣፍሪቃ ይሰግሩ እሞ ብውሽጣዊ ዓመጽን ዓለምለኸ ግብረሽበራውን ዘናውጸን ዘሎ ሃገራት ሳህለ ሳሃራ ናይጀርያ ዞባታ ትግራይን ካቦ ደልጋዶን ብጣዕሚ ከምዘተሓሳሰቦምን ጉዳያቶም ብዘተን ዕርቅን ሓቀኛ ምድግጋፍን ክፍታሕ እሞ ሰላም ክነግስ ከምዝጽልዩ ገሊጾም። ኣብ ምብራቃዊ ኡክራይንን ናጎርኖ ክራባኽን ዘሎ ግጭት እውን ፍታሕ ክርከቦ ብምዝኽኻር ነዚ ኩሉ ዝፍውስ ኣቊሳል ኢየሱስ ስለዝኾነ ቊስልታትና እውን ምስ ናቱ ተሓዊሱ ክፍወስ ንጸሊ እንክብሉ ብሓዋርያዊ ቡራኬ መልእክቶም ዛዘሙ።

ብድምጺ ንምክትታል!
05 April 2021, 18:57