ርሕሩሕን-በዓል-ብዙሕ-ምሕረትን-ዝኾነ-እግዚአብሔር-በደለይንታታ ክንስና ብምሕረቱ ይቅበለና! ር.ሊ.ጳ
ዜና ቫቲካን!
ጥምቀት ጐይታና ኢየሱስ ክርስቶስ ዘምጽኣልና ቡራኬ ማይ ርባ ዮርዳኖስ ኰይኑ ንማንም ማይ ናብ ማይጥምቀት ብምውላጥ ንዳግመ ልደትን ርደተ መንፈስ ቅዱስን ከም እንበቅዕ ስለዝገበረና ነፍሲወከፍና መንነትና እዚ ኮይኑ ከም ትርግታ ልቢ ብቀጻሊ ዝሃርም እዩ። እቲ ቀንዲ መለለዩኡ ከኣ እግዚአብሔር ኣቦ ብምሕረቱ ከምዝጽበየናን ኩነታትና ብዘየገድስ ሃንጐፋይ ኢሉ ከምዝቅበለና ርግጽነት ይህበና። ነዚ ኩነት እዚ ከኣ ኣብ ማይ ጥምቀት ከም እንረኽቦ ዝገለጹ ቅዱስነቶም እዚ ዝዀነሉ ቀንዲ ምኽንያት ከኣ ‘ጐይታና ኢየሱስ ክርስቶስ ኣብ ሩባ ዮርዳኖስ ወሪዱ እንክጥመቅ ንኩሉ ሓጢኣትና ተሸኪሙ ለቢስዎ። በየናይ መንገዲ ክንጐዓዝ ከምዘሎና መንገዲ ሓቢሩ ንክንስዕቦ ሓደራ ገዲፉ ድሕነት ዓደለና’ እንክብሉ ኣስተምሂሮም። ነዚ ከኣ ይብሉ ቅዱስነቶም፣ ነዚ ንምቅባልን ንምንባሩን ተኣምርን ክንዮ ነባሪ ሕይወትን ኣይኮነን ዘድሊ እንታይ ደአ ዕለት ዕለት ኣብ ዕለታዊ ናብራዊ ነዚ ዓቢ ምሥጢር ክንነብሮን ክነስተማቅሮን ክንምስክሮን ከም እንኽእል ኣብሪሆም።
ዕብየት ዕለታዊ መንባብሮ!
ቅዱስነቶም ናብ ዝርዝር ሕይወት ናይቲ ቀንዲ ኣብነትና ዝኾነ መድሓኒናን ጐይታናን ኢየሱስ ክርስቶስ ምልስ ይብሉ! ወልደ እግዚአብሔር ኰይኑ መልእልተ ባህርያዊ ሓይሉ እኳ ከርኢ እንተኸኣለ ትሕትና ለቢሱ ከማና ፍጹም ሰብ ኰይኑ ከም ማንም ካባና ንሰላሳ ዓመት ሕቡእ መንባብሮ ድሕሪ ምሕላፉ ንክጥመቅ ናብ ሩባ ዮርዳኖስ ምውራዱ ነጢርካ ዝብጻሕ ዘይኮነ ኣብ ነባራዊ ሥድራቤት ዕለት ዕለት ከም ማንም ሰብ ይነብር ነበረ። ካብ ልደቱን ንግብጺ ስደቱን ጀሚርካ ናብ ናዝሬት ተመሊስካ ካብ ኣቦኡ ጽርበት እናተማህረን ንወለዱ እናተኣዘዘን ዓበየ። ከም ማንም ወዲሰብ ከኣ ንኩሉ እናኣጽነዔን እናሠርሔን ዓበየ።
ፍቅሪ እግዚአብሔር ምስ ካልኦት ምክፋል!
ቀንዲ መልእኽቲ ጥምቀት ኣብ ሩባ ዮርዳኖስ ‘ንክትልወጥ ምድላይካ ዘመልክት ኰይኑ እዚ ከኣ ንሓጢኣትካ ምሕረት ብምልማን ነበረ። ኢየሱስ ከኣ ንሓጢኣትና ለቢሱ ስለሓጢኣትና ምሕረት ብምልማን ሓዋርያዊ ተልእኮኡ ጀመረ። ኣብዚ ግዜ እዚ ከኣ እቲ ንሰላሳ ዓመት ብምስጢርን ስውር ሕይወትን ዘሕለፎ መንባብሮ ንኩሉ ክገሃድ ጀመረ። ናብ ሕዝቢ ናብ ቃልዕ ወጺኡ ስብከቱ ጀመረ። ነዚ ሥርዓት እዚ ዝፍጽም ዝነበረ ቅዱስ ዮሓንስ መጥምቅ ኣይከውንን እዩ እናበለ እኳ ክቃወም እንተፈተነ ጐይታና መድሓኒና ኢየሱስ ክርስቶስ ግን ምስ ሓጢኣተኛታ ክውግን ምሳኦም ክኸውን ሓጢኣቶም ክለብሶ እሞ ምሕረት ከውህብ ከምኣቶም ኣብ መስርዕ ኣተወ። ንኩሉ ኣራጊፍካ ጥራሕ ነፍስኻን ጥራሕ እግርኻን ኰንካ ዝፍጸም ብምልኣት ኣብ ማይ ጠሊቅካ እትወጸሉ ምሥጢር እዩ’ እንክብሉ መልእኽቲ ጥምቀት ሩባ የርዳኖስ ገሊጾም።
ነዚ ቅርበት እዚ እንክገልጹ ቅዱስነቶም ‘እዚ ቅርበት እዚ እቲ እግዚአብሔር ንዓና ዘራዮ ቅርበት ኰይኑ ከምቲ ንሙሴ ዝበሎ እዩ። ማለት እስኪ ሕሰቡ ኣየናይ ኣምላኽ እዩ ንሕዝቡ ከምዚ ናተይ ክሳብ ክንድዚ ቀረባ ዝኾነ ዝበሎ እዩ። ቀረባ ምዃንከስ እቲ እግዚአብሔር ምሳና ዘርእዮ ኣገባብ እዩ’ ኢሎም። ብካልእ ኣዘራርባ ፍቅሪ ፍቅሪ ስለዝጽውዕ ከምቲ ዘፍቀረና ነፍቅር።
ፍቅሪ ፍቅሪ ይጽውዕ!
ኣብ ሩባ ዮርዳኖስ ዝተራእየ ትሕትና ኢየሱስከስ ሰማያት ከምዝኽፈት ቅድስት ሥላሴ ከም እትግለጽ መንፈስ ቅዱስ ብኣምሳል ርግቢት (ማር 1.10) እግዚአብሔር ኣቦ ከኣ ‘ንስኻ እቲ ዘፍቅሮ ወደይ ኢኻ’ እንክብል ብቃሉ ይወርድ። ገጽታ ኢየሱስከስ ገጽታ ምሕረት እዩ።
ኢየሱስ ልብና ክንከፍተሉ ይጽበየና!
ቅዱስነቶም ኣብ መወዳእታ ናብ ጥምቀት ነፍስወከፍና ምልስ ኢሎም ‘ሕይወትና በታ ኣብ መዓልቲ ጥምቀትና ዝተቀበልና ምሕረት ዝተመልከተት እያ’ ኢሎም።
ነዚ መንነት እዚ ዝተመሓርካ ናይ ምዃን መንነት ኣብ መሠረት እምነትና ሕይወትናን ዝኾነ መንነትና ንክንዕቅብ እኖና ድንግል ማርያም ትደግፈና ድሕሪ ቢሎም ጸሎተ መልአከ እግዚአብሔር ኣዕሪጎም።
[ Audio Embed ብድምጺ ንምክትታል!]
