ድለ

Vatican News

መሰኻኽር ምዃን ጸጋ ትዕድልቲ ዕርክነት እግዚአብሔር እዩ! ር.ሊ.ጳ

ኮቪድ-19 ወይውን ኮርና ቫይረስ ብዘስዓቦ ፍርሂ ምትእኽኻብ ተኸልኪሉሉ ኣብ ዘሎ ሃገረ ጣልያን ቅ.ኣ.ር.ሊ.ጳ ፍራንቸስኮስ ትማሊ ነቲ ብልማድ ኣብ ቅርዓት ቅዱስ ጴጥሮስ ምስ ምእመናን ዝደገምዎ ጸሎተ መልአከ እግዚአብሔርን ዝህብዎ ትምህርትን ከምቲ ቅዱስ ዮሓንስ ጳውሎስ ካልኣይ ኣሊ ኣጅካ ምስ ሃረሞም ካብ ሆስፒታል ንመጀመርያ ግዜ ብተለቪዥን ብቀጥታ ዝመሓለለፍዎ ሰንበት 8 መጋቢት 2020 እውን ፍርቂ መዓልቲ ቅዱስነቶም ብቀጥታ ዝመሓላለፍ መደብ ተለቪዥን ብምጥቃም ኣስትምህሮ ሂቦም ጸሎተ መልኣከ እግዚኣአብሔር ደጊሞም ሓዋርያዊ ቡራኬ ሂቦም። እቶም ብልማድ ኣብ ቅርዓት ቅዱስ ጴጥሮስ ዝመጹ ብሰፋሕቲ ናይ ተለቪዥን ሰሌዳ ከምዝተኸታተልዎ እንክምልከት ቅዱስነቶም ኣብ ፍጻሜ በታ ብልማድ ዝቅልቀሉላ መስኮት ተቀልቂሎም ነቶም ኣብ ቅርዓት ዝነበሩ ባሪኾም ሰላምታ ሂቦም።

አባ መኰንን አማኑኤል - ከተማ ቫቲካን

ጸገማት እንከጋጥሙ መፍትሒ ክትረኽበሎም ግድን ብምዃኑ እቶም ቅድሚ ሕጂ ብኣካል ክርከቡ ብዘይምኽኣሎም ብመስኮት ተለቪዥን ከምዚ ዓይነት ጸሎተ መልኣከ እግዚአብሔር ዝመርሑ ብኣካል ስለዘይክእሉ እንክኸውን ናይዚ ሰንበት ፍጻሜ ግን ብምኽንያት ንኩሉ ዝለኻኽም ሕማም ኰይኑ ምትእኽኻብን ምቅርራብን ንምፍኳስ ተባሂሉ እኳ እንተተገብሩ ቅዱስነቶም ግን ነቲ ፍጻሜ ስግንጢራውን ፍሉይን ምዃኑ ብምግላጽ ነቶም ኣብ ቅርዓት ቅዱስ ጴጥሮስ ዝነበሩ ብመስኮት ተለቪዥን ዳርጋ ምስኦም ከምዘለው ሰላም ከምዚ ክብሉ ሰላምታ ኣቅሪቦም።

“እዚ ናይ ሎሚ ጉባኤ ጸሎተ መልአከ እግዚአብሔር ዘይልሙድ ኰይኑስ ር.ሊ.ጳ መጻወድያ ዝመስል መዝገበ ቤተመጻሕፍት ዓጺኻ ብመስኰት ተለቪዥን ዝግበር ኰይኑ ግን እርእየኩም ኣሎኹ ኣብ ጐድኑኹም እየ። ነቶም ‘ስለ ዝተረስዑ ሕዝቢ ኢድሊብ ሶርያ` ዝብል ጭሮሖ ሒዝም ዘለው ጉጅለ ብምምስጋን ክጅምሮ እደሊ። እግዚአብሔር ይሃበለይ! ስለ እቲ እትገብርዎ አመስግነኩም። ኰይኑ ግን እዚ ዓይነት ኣጸላልያ ጸሎተ መልአከ እግዚኣአብሔር ብጻዕቂ ምትእኽኻብ ሰባት ንከይግበር በዚ ከኣ ናይቲ ቫይሩስ ምዝርጋሕ ክንዓግት ንኽእል።”

ናይ ዕለቱ ቃለ ወንጌል ካብ ማቴ 17 ትርኢት ኢየሱስ ኣብ ደብረ ታቦር ከምዝተለወጠ ዝገልጽ ኮይኑ ‘ድሕሪ ሹዱሽተ መዓልቲ ከአ ኢየሱስ ንጴጥሮስን ንያእቆብን ንዮሓንስ ሓዉን ወሲዱ ንብሕቶም ናብ ነዊሕ እምባ ኣውጽኦም። ኣብ ቅድሚኦም ትርኢቱ ተለወጠ። ገጹ ኸም ጸሓይ ኣንጸባርቀ፡ ልብሱ ድማ ከም ብርሃን ጸዕደወ። እንሆ እውን፡ ሙሴን ኤልያስን ምስኡ እንኪዛረቡ ተራእይዎም። ሽዑ ጴጥሮስ ንኢየሱስ ‘ጐይታይ፡ ንኣና ኣብዚ ምንባር ጽቡቕ እዩ። እንተደኣ ደሊኻስ፡ ኣብዚ ሰለስተ ድንኳን ሓንቲ ንኣኻ ሓንቲ ንሙሴ ሓንቲ ድማ ንኤልያስ ክንሰርሕ’ በሎ፡፡ ጌና ኺዛረብ ከሎ፡ እንሆ፡ ብሩህ ደመና ኣጐልበቦም። ንኣኡ ስምዕዎ!’ ዚብል ድምጺ ወጽአ። እቶም ኣርድእቱ ነዚ ምስ ሰምዑ ብኣፍልቦም ተደፍኡ፡ ኣዝዮም እውን ድማ ፈርሁ። ኢየሱስ ድማ ቀርቡ ተንከዮም፡ ‘ተንሥኡ ኣይትፍርሁውን!’ ከኣ በሎም።’ ዝብል ይርከቦ።

ቅዱስነቶም ቀንዲ መልእኽቲ ናይዚ ፍጻሜ ሓዋርያት ምሥጢረ ክርስቶስ ንምርዳእ ክሕግዝ ከምዝኾነ በዚ ከኣ ንዓና ኣውን በዓለ ደብረታቦር ምሥጢረ ክርስቶስ ንክንርዳእ ይግሕግዘና ኢሎም።

በዓለ ደብረታቦር ምሥጢረ ክርስቶስ ንክንርዳእ ይግሕግዘና!

ጐይታና ኢየሱስ ክርስቶስ ንጴጥሮስን ያዕቆብን ዮሓንስን ብዛዕባ ሕማማቱን ስቃዩን ሞቱን ኣብ መወዳእታ ከኣ ካብ ሙታን ክትንሥእ ምዃኑ ምስ ገለጸሎም ፈጺሙ ክርድኦም ኣይከኣለን ክቅበልውዎ እውን ብጣዕሚ ጸጊምዎም ስለዚ ኢየሱስ እዚ ምሥጢር እዚ ንከብረሃሎም ናብ እምባ ታቦት ይወስዶም ኣብኡ ከኣ ነዚ ተኣምር እዚ የርእዮም። ኣዕይንቶም ይኽፈት ነቲ ክብሪ ይርእዩ።

“በዚ ዘደንቅ ፍጻሜ ምልዋጥ ኢየሱስ እቶም ሰለስተ ዝተዓደሉ ኣርድእቲ ኢየሱስ ወዲ እግዚአብሔር ብክብሪ ከንጸባርቅ ይርእይዎ። በዚ ከምዚ ከኣ መምህሮም መን ምዃኑ ንክፈልጡ ሓደ ስጉምቲ ንቅድሚት ይጐዓዙ። ክንዮ እቲ ሰብኣዊ ባህርይ ኢየሱስ ክርስቶስ መልኮታዊ ወገኑ ይርእዩ እሞ ብፍርሂ ይወሓጡ ወትሩ ከምዝገብሮ ከኣ ተንክፉ ተንሥኡ ኣይትፍርሁ ይብሎም።”

ከመይ ገቢሩ ነዚኦም መሪጹ ምስ እንብል ከኣ ጐይታና ኢየሱስ ክርስቶስ ክመርጽ እንከሎ ወትሩ ብመደብ ፍቅሪ እዩ ዝመርጽ።

ኢየሱስ ብመደብ ፍቅሪ ይመርጽ!

ማቴዎስ ወንጌላዊ ነቲ ፍጻሜ እንክገልጽ ‘ገጹ ኸም ጸሓይ ኣንጸባርቀ፡ ልብሱ ድማ ከም ብርሃን ጸዕደወ . . . ደመና ጐልበቦም . . . ንኣኡ ስምዕዎ’ እናበለ እቶም ሰለስተ ዝተመርጹ ዘጓነፎም ነገራት ይዝርዝር። ኰይኑ ግን ኣብዚ ቅጅል ዝብል ስለምንታይ ጐይታ ነዞም ሰለስተ መሪጹ ክትብል ዝገደደ ከኣ እቲ ሓደ ንምኽሓዱ ቀዳማይ ዝኾነ እቶም ክልተ ከኣ ሓደ ብየማኑ ሓደ ብጸጋሙ ኮይኖም ክሽየሙ ሃረር ዝብሉ ዝነበሩ (ማቴ 20.20) ነዚ ሕቶ ቅዱስነቶም ከምዚ ክብሉ ይምልሹ።

“ኢየሱስ ክመርጽ እንከሎ ንሕና እንጥቀሞ መምዘኒታት ኣይኮነን ዝጥቀም እንታይ ደኣ በቲ ናይ ፍቅሪ መደቡ እዩ ዝመርጽ። ፍቅሪ ኢየሱስ መወዳእታ የብሉን በዚ መደብ እዚ ከኣ እዩ ዝመርጸና። ብነጻ ዝግበር ምርጫ ምንም ጥቅሚ ዘይደሊ ነጻ ተበግሶ ኰይኑ መለኮታዊ ዕርክነት እዩ ምንም ግብረ መልሲ ኣይደልን። ከምቲ ነቶም ዝሓለፉ ዝመረጾ ሎሚ እውን ኣብ ጥቃኡ ክንከውን መሰኻኽሩ ክንከውን ይጽውዓና ኣሎ። መሰኻኽር ኢየሱስ ምዃን ሓደ ትዕድልቲ ሓደ ጸጋ ኰይኑ ማንም ዝግብኦ ኰይኑ ዘይኮነስ በቲ ናይ ፍቅሪ መደቡ ሽሕኳ ብቚዓት እንተዘይኰና ንሱ እንክሓርየና ድሕሪት ንምለሰሉ ምኽንያት የብልናን። ነዚ ዘይምብቃዕ ከም ምኽንያት ክንጥቀመሉ ከምዘይንኽእል ድሮ ኣብሪሁልና እዩ። ነዚ ከኣ እዩ ንከሓዲ ጴጥሮስን ሥልጣን ሃነፍነፍ ንዝብሉ ያዕቆብን ዮሓንስን መሪጹ ዘሰንድዎም ዘሎ። ፍርህን ስግኣትን ክስምዓና ግድን እዩ ኰይኑ ከምቲ ሽዑ ነዞም ኣርድእቲ ተንኪፉ ተንሥኡ ኣይትፍርሁ ዝበሎም ንዓና እውን ከምኡ ይብለና ኣሎና።”

ኢየሱስ ንዓና እውን ተንሥኡ ኣይትፍርሁ ይብለና!

ኣብ ጒዕዞ ሕይወት ክርስትና ንሕና እውን ከምዞም ሰለስተ ዝተመረጽና ኢና እዚ ግን ንሕና ኣብ እምባ ታቦር ደዪብና ብዓይንና ገጽ ኢየሱስ ከንጸባርቅ ርኢና ዘይኮነስ እታ ቃል ድሕነት ስለዝተዓደለትናን እምነት ስለዝተዋህበናን እዩ በዚ ከኣ ምስ ኢየሱስ ምስ ተራኸበና ንዝርከብ ሓጐስ ክነስተማቅር ንርከብ። ፍርሂ ክስምዓና እንከሎ ከኣ ናብና ቅርብ ኢሉ ትንክፍ የብለና እሞ ተንስኡ ኣይትርፍሁ ይብለና፣

“ኣብዙ ንዓይ ጥራይ ይጥዓመኒ እምበር ዝብል ኣምርን ብንፍገትን መሊኣ ዘላ ዓለምና ብርሃን እግዚአብሔር ብዕለታዊ ጭንቀት ትዳብን ኣላ። ዝገደደ ከኣ ንጸሎት ዝኸውን ግዜ የብለይን! ኣብ ቚምስና ዝኾነ ኣገልግሎት ወይ ሓገዝ ክገብር ኣይጥዕመንን! ወዘተ ንብል ኰይኑ ግን ነቲ ምሥጢረ ጥምቀት እንክንቅበል ዝኣትናዮ መሰኻኽር ናይ ምዃን ቃል ነዚ ከኣ ብክእለትና ዘይኮነ ብጸጋ መንፈስ ቅዱስ ምዃኑ ኣይረስዕ። ኣብዚ ግዜ ጾመኣርባዓ ቅድስት ማርያም ንመንፈስ ቅዱስ እንእዘዘሉ ጸጋ ክተውህበና እሞ ብጐደና ለውጢ ክንምርሽ ተማልደልና ኢሎም።”

ጻውዒት ንሰብኣዊ ቅልውላው ሶርያ ደው ንምባል!

ቅዱስነቶም ጸሎተ መልአከ እግዚአብሔር ምስ ደገሙ ብቪድዮ እናተራኣኣዩ ነቶም ኣብ ቅርዓት ቅዱስ ጴጥሮስ ዝነበሩ ዝተፈላለዩ ጉጅለታት ሰላምታ ኣቅሪቦም። ኣብዚ ግዜ እዚ ካብቲ ነቲ ናይ ዕለቱ ፍጻሜ ብተለቪዥን ንምግባር ዘገደደ ሕማም ለበዳ ኮሮና ቪሩስ ክሳብ እቲ ኣብ ሶርያ ብሰብ ዝግበር ህልቂትን ውግእን ስደትን ንዘሎ ኩነታት ክንወግድ እግዚኣአብሔር ጸጋኡ ክህበና ኣብ ርእሲ ምልማን ንነፍሲወከፍ ጸገም ዝኸውን ጻውዒት ኣቅርቦም።

ብቀዳምነት ቅዱስነቶም ዝዘከርዎም እቶም ብሕማም ለበዳ ኮሮና ቫይረስ ዝሳቀዩ ኮይኖም ንኩሎም እቶም ኣብዚ መዳይ ዝከኣሎም ዘበርክቱ ዘለው ኣለይቲ ሕይሙማትን ሓካይምን ኣጆኹም ክብሉ ድሕሪ ምትብባዕ ነዚ ሓያል ግዜ ንምስጋር ሓይሊ እምነትን ርግጽነት ተስፋን ውዕዋዔ ፍቅርን ሠናይ ተግባርን ብምዝውታር ከምዘድሊ ገሊጾም። ከምኡ እውን ኣብ ሶርያ ዘሎ ሰብኣዊ ቅልውላው ብዝቀልጠፈ ደው ክብል ጻውዒት ኣቅሪቦም።

ብድምጺ ንምክትታል!
09 March 2020, 19:05