ነዚ ሕሱም ግዜ ለበዳ ንምስጋር ጐይታ ንሕዝቡ ጥበብ ጥንቃቄን መንፈስ ልቦናን ይዓድል! ር.ሊ.ጳ

“ኣብዚ ቁሩብ ምስትንፋስ ተረኺቡ ካብ ውሸባ በብቊሩብ ክንወጸሉ ዝፍቀደሉ ዘሎ ግዜ ጐይታ ንሕዝቡ ማለት ንኩልና ጸጋ ጥንቃቄን ጥበብ ተኣዝዞን ሂቡ እዚ ለበዳ እዚ መታን ከይምለስ ነቲ ተዋሂቡና ዘሎ ዕድል ብጥበብ ከምእንጥቀመሉ ክገብረና ንለምኖ።”

“ኣብ ቀዳማይ ንባብ ኣብዚ ዕለታት እዚ ብዛዕባ ሰማዕትነት ቅዱስ እስጢፋኖስ ዘዘንቱ ክፍሊ ንምልከት ኣሎና። ሊቃውንቲ ሕጊ ክቃወምዎ ስለዘይከኣሉ መሰኻኽር ሓሶት ንእግዚኣብሔር ጸሪፉ ተጻይ ሕጊ ገሩ ዝብሉ ኣሰናድዮም ብዳርባ እምኒ የቅትልዎ። እዚ ኣሰራርሓ እዚ ማለት ብከምዚ ዝበለ ቀሊል ኣገባብ ንሞት ምፍራድ እሞ ከኣ ሕዝቢ ኣለዓዒልካ ቅተሎ ቅተሎ ኢልካ ሕይወት ሰብ ምሕላፍ መጀመርያ ኣይኮነን ኣብ ኢየሱስ ርኢናዮ (ማር 15,13) ኣብ ኦሪት እውን እንተኾነ ጉዳይ ሶስና (ዳን 13) ጉዳይ ናቡተ (1ዘነገ 21) ከምኡ እውን ኣብ ዘመነ ኣስቴ ኣማን ተጻይ ምሉእ ሕዝበ እሽራኤል (ኣስ 3)። ናይ ሓሶት ዜና ዘርጊሕካ ብጸለመ ንሕዝቢ ኣልዓዒልካ ፍትሒ ይውጻእ ከምዝብል ምግባር። እዚ ንንጹሕ ሰብ ብተንኮል ከምዝቅተል ምግባር እዩ። ከምዚ ብዝበለ ኣገባብ ንሕዝቢ ዚኣክል ምስ ኣረሳሰንካ ናብ ዳኛ ይኽየድ እዚ ከኣ ነቲ ዓመጽ ፍትሓዊ ንምምሳል እዩ እምበር እቲ ፍርድስ ድሮ ወዲኦሞ እዮም። እቲ ዳኛ ተጻይ እዚ ሕዝባዊ ፍርዲ ንምኻድ ብዘይመጠን ተባዕ ክኸውን አልዎ እንተዘየሎ ከም ጲላጦስ ኢዱ ተሓጺቡ (ማቴ 27.24) ሱቊ ኢልካ ምዕዛብ እያ። ሎሚ እውን እንተኾነ ኣብ ገለ ሃገራት እንተስ ኣብ መርጻ ክትዕወት ነቲ ዓዲ ክተዕኑ እንተስ መንግሥቲ ክትግምጥል መጀመርያ ናይ ሓሶት ዜና ተናፍስ ካብኡ ጸለመ ትነዝሕ ዝኣክል ምስ ጠምዘዝካ ትፍትን እሞ ትዕወት ዝብል ኣምር ዕለት ዕለት ንዕዘቦ እዩ። እዚ ማሕበራዊ መቅተልቲ ክንብሎ ንኽእል። ንእስጢፋኖስ ዘጋጠመ እዚ እዩ። ናይ ሎሚ ሰማዕታት እውን ዕለት ዕለት ዘጋጥሞም እዚ እዩ። ንኣብነት ንኣስያ ቢቢ ንሕሰብ ዓሠርተ ዓመት ኣብ ቤት ማእሰርቲ ካብ ሎሚ ሎሚ ትቅተል እናተባህለ ምንም በደል ዘይብላ ህዝቢ ሆሆ ስለዝበለ ጥራይ ከምኡ ብሾዋ ዝፍለጥ ጽንተት እስራኤላውያን ወትሩ ነቲ ሕዝቢ ምስ ኣስከርካ `ዳርጋ ጽቡቅ ገበርዎም ደንጒዮሞም እኳ ዘስምዕ መንፈስ ሰሪጹ ማንም ዘይግደሰሉ ቅትለትን ዓመጽን ይፍጸም። እዚ ነገር እዚ ጽቡቅ ከምዘይኮነ ኩልና ንፈልጥ ኢና እንተኾነ ዕለት ዕለት ዝካየድ ንእሽቲ ንሰብ ናይ ምጥፋእ ውዲት ስም ሰብ ምጽላም ምጉናይ ኣብ መወዳእታኡ ብኩሉ ከምዝኹነን ገርካ ካብቲ ቅተሎ ቅተሎ ዘይሓምቅ ፍጻሜ ትፈጥር። እወ እከለስ ወይውን እከሊትስ ደሓን ነራ እንተኾነ ኢልካ ዝተባህለን ዘይተባህለን ጸለመ ብምውሳኽ ክንደይ ሰባት ዘይጐዳእካ። እዚ ብቀንዱ ነቲ ብሓሶት ኣይትመስክር ዝብል ትእዛዝ ኣምላኽ ዝጻረር ኣብ ምዃኑ ሓቂ ኣባኻ ከምዘየላ የመልክት። ሓቂ ንጽርቲ እያ ሓራ ተውጽእ ዓመጽ ኣይትጻወርን። እቲ ሓቀኛ ምስክርነት ዝበሃል ከስ ሰማዕትነት እዩ። ቅዱስ እስጢፋኖስ እንተተመልከትና ከምኡ እውን ኩሎም ሓዋርያት መስኪሮም እዮም ብደሞም ሓቂ መስኪሮም። ሎሚ እንዝክሮ ዘሎና ካልእ ቅዱስ እውን ቅዱስ ሻነል ተጻይ ንጉሥ እዩ ተባሂሉ ብሓሶት ዝተኸሰን ዝተቀትለን እዩ። በጃኹም ኢለኩም ብዛዕባ መልሓስናን እትብሎን ነስተንትን። ብዙሕ ግዜ ብእንብሎም ብእንህቦ ርእይቶን ፍርድታትን ንክንደይ ሰባት ከም እንቀትል ከም እንሓሚ ነስተውዕል። ጐይታ ካብዚ መንገዲ እዚ እንገላገለሉ ኣብነት መሰኻክር ሓሶትን ሓመይትን እነወግደሉ ጸጋ ይሃበና።”