ብተባዕ እምነት ንበዓለ ልደት ክንሰናዶ የድሊ! ር.ሊ.ጳ

“ኣብ ጸሎትና ኣብ ምሥጢረ እቲ ሰብ ዝኾነ እግዚአብሔር እምነት ክህልወና ለሚና። ሎሚ እውን እንተኾነ ከምቲ ኣብ ወንጌል ክንበብ ዝሰማዕናዮ ንልቢ ኢየሱስ ዝትንክፍ ብዙሕ እምነት ኣሎ። ጐይታና ኢየሱስ ኣብ ምሉእ ወንጌል ተተመላሊሱ ብዛዕባ እምነት እዩ ዝምህሮም ዝነበረ። ወትሩ ከኣ ‘ኣምነቶም ርእዩ’ ከኣ ኢየሱስ ከምዚ ገበረ ዝብል ኣብ ወንጌል ብዙሕ ጥቅስታት ንረክብ። ኣብዚ ናይ ሎሚ ተጠቂሱ ዘሎ ተኣምር ከኣ ኢየሱስ ብርታዔ እምነቶም ክሳብ ብልዕሊ ናሕሲ ደዪቦም ነቲ ናሕሲ በሲዖም ነቲ ሕሙም ኣብ ቅድሚ ኢየሱስ ንከንበርዎ ክሳብ ክንደየናይ ትብዓት ከምዝነበሮም ርእዩ። እዚ ትብዓት ናይዞም ሰባት ካብቲ ዝነበሮም እምነት እዩ ዝፍልፍል። ከመይ እቲ ሕሙም ኣብ ቅድሚ ኢየሱስ እንተበጺሑ ከምዝሓዊ ጽኑዕ እምነት ነርዎም። ስለዚኸስ እምነት የድሊ። ልደት ከኣ በዓል እምነት ስለዝኾነ ብእምነትን ትብዓትን እምበር ብዓለማዊ መንፈስ ተዓብሊሉ ኣይኮነን ዝበዓል።”

“ኣብዛ ካልኣይቲ ሶሙን ዘመን ምጽኣት ንበዓለ ልደት ብግቡእ ንክንሰናዶ ሎሚ ነዛ ጸጋ እዚኣ ንልምን ኣሎና። ርግጽ እዩ ብዙሕ ግዜ ልደት ብዓቢ እምነት ከምዘይዝከር ኩልና ንርእዮ ዘሎና ጸገም እዩ ከመይ ብዓለማዊ መንፈስ ተዓብሊሉ ብህያባት ምቅባልን ምሃብን ዳርጋ ብገንዘብ ክትብሎ ዘድፍር ይኸውን ኣሎ። ኮይኑ ግን ጐይታ ብእምነት ክንገብሮ ይሓተና ኣሎ። ኣብዛ ሶሙን እዚኣ እምበአር ነጻ ጸጋ እዚኣ ንሕተት ንልደት ኢየሱስ ብእምነት ክነብዕሎ። ርግጽ እምነት ምዕቃብ ቀሊል ኣይኮነን! እምነትካ ምክልኻል እውን ከምኡ ቀሊል ኣይኮነን። ስለዚ ብልብና ናይ እምነት ሥራሕ ንድገም።”

“ሎሚ ከምኡ እውን ጽባሕ ንወንጌለ ዮሓንስ ወሲድናዮ ንታሽዓይ ምዕራፍ ብምሏኡ እንተኣንበብናዮ ጥዕና ነፍሲ ክህበና እዩ። ነዚ ኢየሱስ ብምጥማት ጥራይ ቅድሚ ኣዕይቱ ልቡ ዘብርሃሉ ብዕውሩ ናይ ዝተወልደ ተኣምር ተረዲእና ብልብና ናይ እምነት ሥራሕ ንድገም። ኦጐይታ ነዛ ንእሽቶ እምነተይ ሓግዛ። ንእምነተይ ካብ መንፈስ ዓለማውነትን ካብ ጥንቆላን ናይ እምነት ጉዳያት ካብ ዘይኮኑን ሓልዋ። ኣብ ሓሳባዊ እምነት ጥራይ ከይወድቅ ኣድሕነኒ፣ ኣባኻ ሓቀኛ እምነት ከምዝህልወኒ ግበር።”