വിദ്യാഭ്യാസാവകാശം നിഷേധിക്കപ്പെട്ട് ബുർക്കിനോ ഫാസോയിലെ കുട്ടികൾ

ഫാ.ജിനു ജേക്കബ്,വത്തിക്കാൻ സിറ്റി

2023-2024 അധ്യയന വർഷത്തിന്റെ തുടക്കത്തിൽ,  രാജ്യത്തിന്റെ വിവിധ ഭാഗങ്ങളിൽ നടന്നുകൊണ്ടിരിക്കുന്ന അക്രമവും അരക്ഷിതാവസ്ഥയും കാരണംഏകദേശം 6000 ഓളം സ്‌കൂളുകളാണ് പ്രവർത്തനരഹിതമായി അടഞ്ഞുകിടക്കുന്നത്. തത്ഫലമായി ഏകദേശം പത്തു ലക്ഷത്തോളം കുട്ടികൾ വിദ്യാഭ്യാസം നേടാൻ സാധിക്കാതെ വീടുകളിലും താത്കാലിക അഭയകേന്ദ്രങ്ങളിലും കഴിയുന്നു.

2023-ൽ, സംഘർഷം ബാധിച്ച 3.2 ദശലക്ഷം കുട്ടികൾ ഉൾപ്പെടെ ഏകദേശം 5.5 ദശലക്ഷം ആളുകൾക്ക് ബുർക്കിന ഫാസോയിൽ മാനുഷികസഹായം ആവശ്യമാണെന്ന് യൂണിസെഫ് സംഘടന വിലയിരുത്തുന്നു. 52,000-ത്തിലധികം ആളുകൾക്ക് താൽക്കാലിക അഭയകേന്ദ്രങ്ങളായി ഏകദേശം 230 സ്‌കൂളുകൾ ഉപയോഗിക്കുന്നതിനാലും ഈ പ്രതിസന്ധി രാജ്യത്ത് തുടരുകയാണ്.

ഗുണനിലവാരമുള്ള വിദ്യാഭ്യാസം നേടാനും സമാധാനത്തിലും സുരക്ഷിതത്വത്തിലും കുട്ടികളുടെ  സ്വപ്നങ്ങൾ സാക്ഷാത്കരിക്കാനും, വിവിധ സന്നദ്ധ സംഘടനകളുമായി ചേർന്നുള്ള പ്രവർത്തനങ്ങൾ യൂണിസെഫ് ഏകോപിപ്പിക്കുന്നുണ്ട്.കുട്ടികളെ തിരികെ സ്‌കൂളുകളിലേക്ക് എത്തിക്കുവാൻ ആവശ്യമായ ബോധവത്ക്കരണം മാതാപിതാക്കൾക്ക് നൽകുവാനും സംഘടന ശ്രദ്ധിക്കുന്നുണ്ട്.