തിരയുക

Vatican News
ഫയല്‍ ചിത്രം - സിസ്റ്റൈന്‍ കപ്പേളയിലെ ജ്ഞാനസ്നാന കര്‍മ്മം ഫയല്‍ ചിത്രം - സിസ്റ്റൈന്‍ കപ്പേളയിലെ ജ്ഞാനസ്നാന കര്‍മ്മം  (Vatican Media)

നവജാതശിശുക്കള്‍ക്കു ഈവര്‍ഷം പാപ്പാ ജ്ഞാനസ്നാനം നല്കില്ല

മഹാമാരിയുടെ വിലക്കുകള്‍ പാലിച്ചുകൊണ്ടാണ് കുട്ടികള്‍ക്കു ജ്ഞാനസ്നാനം നല്കുന്ന കര്‍മ്മം വത്തിക്കാന്‍ റദ്ദാക്കിയത്.

- ഫാദര്‍ വില്യം  നെല്ലിക്കല്‍ 

യേശുവിന്‍റെ ജ്ഞാനസ്നാനത്തിരുനാളിലെ പതിവ്
അനുവര്‍ഷം ജനുവരി മാസത്തിലെ രണ്ടാം ‍ഞായറാഴ്ച യേശുവിന്‍റെ ജ്ഞാനസ്നാനത്തിരുനാളിന്, ഈ വര്‍ഷം ജനുവരി 10-നു വത്തിക്കാനിലെ സിസ്റ്റൈന്‍ കപ്പേളയില്‍വച്ചു നല്കേണ്ടിയിരുന്ന കുട്ടികളുടെ ജ്ഞാനസ്നാനമാണ് വത്തിക്കാന്‍ റദ്ദാക്കിയത്. ഇറ്റലിയിലും ലോകത്തിന്‍റെ ഇതര ഭാഗങ്ങളിലും ഇനിയും ക്ലേശങ്ങള്‍ വിതയ്ക്കുന്ന മഹാമാരിയുടെ വിലക്കുകള്‍ പാലിച്ചുകൊണ്ടാണ് വത്തിക്കാന്‍റെ ആരോഗ്യവകുപ്പ് പാപ്പായുടെ മുഖ്യകാര്‍മ്മികത്വത്തില്‍ നടത്തപ്പെടുന്ന കുഞ്ഞുങ്ങളുടെ ജ്ഞാനസ്നാനം ഈ വര്‍ഷം വേണ്ടെന്നുവെച്ചതെന്ന് വത്തിക്കാന്‍റെ പ്രസ്സ് ഓഫിസ് മേധാവി മത്തയോ ബ്രൂണി പ്രസ്താവനയിലൂടെ അറിയിച്ചു. 

റദ്ദാക്കിയ നല്ല പതിവ്
പാപ്പായില്‍നിന്നും ഈ കൂദാശ സ്വീകരിക്കാവന്‍ പേരു നല്കിയിട്ടുള്ള കുട്ടികളുടെ ജ്ഞാനസ്നാനം അവരവരുടെ ഇടവകകളില്‍ അതേ ദിനത്തില്‍ നടത്തുമെന്ന് ജനുവരി 6-നു പുറത്തുവിട്ട വത്തിക്കാന്‍റെ പ്രസ്താവന വ്യക്തമാക്കി. അനുവര്‍ഷം വത്തിക്കാനിലെ ജോലിക്കാരുടെ മക്കളെയും, വത്തിക്കാന്‍റെ വളരെ അടുത്ത അഭ്യൂദയകാംക്ഷികളുടെ കുഞ്ഞുങ്ങളെയും മാത്രമാണ് പാപ്പാ വര്‍ഷത്തില്‍ ഒരിക്കല്‍ ജ്ഞാനസ്നാനം നല്കുന്നത്.
 

07 January 2021, 13:32