പാപ്പാ:പുനരായുധവത്ക്കരണ മത്സരം അരുത്, ഓരോ ജീവനും അമൂല്യം!

ജോയി കരിവേലി, വത്തിക്കാൻ സിറ്റി

ഉത്ഥാനത്തിരുന്നാൾ ദിനത്തിൽ ഞായറാഴ്ച (20/04/25) വത്തിക്കാനില്‍ വിശുദ്ധ പത്രോസിന്‍റെ ബസിലിക്കയുടെ ചത്വരത്തിൽ കർദ്ദിനാൾ ആഞ്ചെലൊ കൊമാസ്ത്രിയുടെ (Card. Angelo Comastri) മുഖ്യകാർമ്മികത്വത്തിൽ അർപ്പിക്കപ്പെട്ട സാഘോഷമായ ദിവ്യബലിയ്ക്കും സ്വർല്ലോകരാജ്ഞീ ആനന്ദിച്ചാലും എന്ന മദ്ധ്യാഹ്നപ്രാർത്ഥനയ്ക്കും  ശേഷം പ്രാദേശിക സമയം ഉച്ചയ്ക്ക് 12 മണിയായപ്പോൾ ഫ്രാൻസീസ് പാപ്പാ വിശുദ്ധ പത്രോസിൻറെ ബസിലിക്കയുടെ മദ്ധ്യ ബാൽക്കണിയിൽ ചക്രക്കസേരയിൽ ആനീതനായി. അപ്പോൾ ബാൻറ് സംഘം ദേശീയ ഗാന ശകലങ്ങൾ വാദനം ചെയ്തു. തുടർന്ന് പാപ്പാ എല്ലാവരെയും അഭിവാദ്യം ചെയ്തപ്പോൾ കരഘോഷങ്ങളുയർന്നു. പാപ്പാ എല്ലാവർക്കും ഉയിർപ്പുതിരുന്നാൾ മംഗളങ്ങൾ നേർന്നു. ഫ്രാൻസീസ് പാപ്പായ്ക്ക് സംസാരിക്കാൻ ബുദ്ധിമുട്ടുള്ളതു കാരണം “ഊര്‍ബി ഏത്ത് ഓര്‍ബി” സന്ദേശം പാപ്പായുടെ ആരാധനാക്രമകാര്യങ്ങളുടെ ചുമതലവഹിക്കുന്ന ആർച്ച്ബിഷപ്പ് ദിയേഗൊ ജൊവാന്നി റവേല്ലി   ( Diego Giovanni Ravelli) പാരായണം ചെയ്യുകയായിരുന്നു.

ഊർബി ഏത്ത് ഓർബി സന്ദേശം - ആനന്ദക്കണ്ണീരണിയിക്കുന്ന അല്ലേലൂയാ ഗീതം

ക്രിസ്തു ഉയിർത്തെഴുന്നേറ്റു, അല്ലേലൂയാ!

സഹോദരീ സഹോദരന്മാരേ, ഉയിർപ്പുതിരുന്നാൾ മംഗളങ്ങൾ!

ഇന്ന് സഭയിൽ, അവസാനം, അല്ലേലൂയ മുഴങ്ങുന്നു, അത് അധരങ്ങളിൽ നിന്ന് അധരങ്ങളിലേക്ക്, ഹൃദയത്തിൽ നിന്ന് ഹൃദയത്തിലേക്ക് ഒഴുകുന്നു, അതിൻറെ ആലാപനം ലോകമെമ്പാടുമുള്ള ദൈവജനത്തെ ആനന്ദാശ്രു പൊഴിയിപ്പിക്കുന്നു.

ജറുസലേമിലെ ശൂന്യമായ കല്ലറയിൽ നിന്ന് കേട്ടുകേൾവിയില്ലാത്ത ഒരു പ്രഖ്യാപനം നമ്മിലേക്കുവരെ എത്തുന്നു: ക്രൂശിക്കപ്പെട്ട യേശു, "ഇവിടെ ഇല്ല, അവൻ ഉയിർത്തെഴുന്നേറ്റു" (ലൂക്കാ 24:6). അവൻ കല്ലറയിലില്ല, അവൻ ജീവിച്ചിരിക്കുന്നുണ്ട്!

തിന്മകളെ ജയിക്കുന്ന സ്നേഹം

സ്നേഹം വിദ്വേഷത്തെ ജയിച്ചു. വെളിച്ചം ഇരുട്ടിനെ കീഴടക്കിയിരിക്കുന്നു. സത്യം നുണയുടെ മേൽ വിജയം വരിച്ചു. പ്രതികാരത്തിനു മേൽ ക്ഷമ ജയിച്ചു. നമ്മുടെ ചരിത്രത്തിൽ നിന്ന് തിന്മ അപ്രത്യക്ഷമായിട്ടില്ല, അത് അവസാനം വരെ ഉണ്ടായിരിക്കും, എന്നാൽ അതിന് ഇനിമേൽ ആധിപത്യമില്ല, ഈ ദിവസത്തിൻറെ കൃപ സ്വീകരിക്കുന്നവൻറെ മേൽ അതിന് ഇനി അധികാരമില്ല.

സഹോദരീ സഹോദരന്മാരേ, വിശിഷ്യ വേദനയിലും ദുഃഖത്തിലും കഴിയുന്നവരേ, നിങ്ങളുടെ നിശബ്ദ നിലവിളി ശ്രവിക്കപ്പെട്ടിരിക്കുന്നു, നിങ്ങളുടെ അശ്രുകണങ്ങൾ ശേഖരിക്കപ്പെട്ടിരിക്കുന്നു, ഒന്നുപോലും നഷ്ടപ്പെട്ടുപോയിട്ടില്ല! യേശുവിൻറെ പീഡാസഹന മരണങ്ങളിൽ, ദൈവം ലോകത്തിലെ എല്ലാ തിന്മകളും സ്വയം ഏറ്റെടുക്കുകയും തൻറെ അനന്തമായ കാരുണ്യത്താൽ അവയെ തോല്പിക്കുകയും ചെയ്തു: മനുഷ്യൻറെ ഹൃദയത്തെ വിഷലിപ്തമാക്കുകയും സർവ്വത്ര അക്രമവും അഴിമതിയും വിതയ്ക്കുകയും ചെയ്യുന്ന പൈശാചിക അഹങ്കാരത്തെ അവൻ ഉന്മൂലനം ചെയ്തു. ദൈവത്തിൻറെ കുഞ്ഞാട് വിജയം വരിച്ചിരിക്കുന്നു! അതുകൊണ്ടാണ് ഇന്ന് നമ്മൾ ഇങ്ങനെ ഉദ്ഘോഷിക്കുന്നത്: "എൻറെ പ്രത്യാശയായ ക്രിസ്തു ഉയിർത്തെഴുന്നേറ്റു!" (ഉയിർപ്പുതിരുന്നാൾ അനുക്രമം).

ഉത്ഥാനം പ്രത്യാശയുടെ അടിത്തറ

അതെ, യേശുവിൻറെ പുനരുത്ഥാനമാണ് പ്രത്യാശയുടെ അടിത്തറ: ഈ സംഭവത്തിൽ നിന്നു തുടങ്ങി, പ്രത്യാശ ഇനി ഒരു മിഥ്യയല്ല. ഇല്ല. പ്രത്യാശ നിരാശപ്പെടുത്തില്ല! ക്രൂശിക്കപ്പെട്ടവനും ഉയിർത്തെഴുന്നേറ്റവനുമായ ക്രിസ്തുവിന് നന്ദി. പ്രത്യാശ നിരാശപ്പെടുത്തില്ല! (റോമർ 5:5 കാണുക). അത് ഒഴിഞ്ഞുമാറുന്ന ഒരു പ്രത്യാശയല്ല, മറിച്ച് വെല്ലുവിളിക്കുന്ന ഒന്നാണ്; അത് പിന്തിരിപ്പിക്കുന്നതല്ല, മറിച്ച് ശാക്തീകരിക്കുന്നതാണ്.

ദൈവത്തിൽ പ്രത്യാശിക്കുന്നവർ തങ്ങളുടെ ദുർബ്ബലമായ കൈകൾ അവൻറെ വലുതും ശക്തവുമായ കരങ്ങളിൽ സമർപ്പിക്കുന്നു, അവർ വീണ്ടും എഴുന്നേല്ക്കുകയും യാത്ര ആരംഭിക്കുകയും ചെയ്യുന്നു: ഉത്ഥിതനായ യേശുവിനോടൊപ്പം അവർ പ്രത്യാശയുടെ തീർത്ഥാടകരായി മാറുന്നു, സ്നേഹത്തിൻറെ വിജയത്തിൻറെയും ജീവൻറെ നിരായുധീകൃത ശക്തിയുടെയും സാക്ഷികളായി മാറുന്നു.

നരകുലം ഉയിർത്തെഴുന്നേല്ക്കണം

ക്രിസ്തു ഉയിർത്തെഴുന്നേറ്റു! മരണത്തിനു വേണ്ടിയല്ല, പ്രത്യുത, ജീവനു വേണ്ടി സൃഷ്ടിക്കപ്പെട്ട നമ്മുടെ അസ്തിത്വത്തിൻറെ മുഴുവൻ അർത്ഥവും ഈ പ്രഖ്യാപനത്തിൽ അടങ്ങിയിരിക്കുന്നു. ഉയിർപ്പുതിരുന്നാൾ ജീവൻറെ ആഘോഷമാണ്! ദൈവം നമ്മെ ജീവനു വേണ്ടി സൃഷ്ടിച്ചിരിക്കുന്നു, മാനവകുലം ഉയിർത്തെഴുന്നേൽക്കണമെന്ന് അവൻ ആഗ്രഹിക്കുന്നു! അവൻറെ കണ്ണിൽ ഓരോ ജീവനും വിലപ്പെട്ടതാണ്! സ്വന്തം അമ്മയുടെ ഉദരത്തിലുള്ള കുഞ്ഞിൻറെയും അതുപോലെ തന്നെ പ്രായമായവരുടെയും രോഗികളുടെയും. അവരെല്ലാം ഉപേക്ഷിക്കപ്പെടേണ്ട ആളുകളായി കണക്കാക്കുന്ന നാടുകളുടെ എണ്ണം വർദ്ധിച്ചുവരികയാണ്.

ജീവനെ ഉന്മൂലനം ചെയ്യാനുള്ള വ്യഗ്രത

ജീവൻ ഇല്ലാതാക്കാനുള്ള താല്പര്യം എത്രമാത്രമാണ് ലോകത്തിൻറെ വിവിധ ഭാഗങ്ങളെ ബാധിക്കുന്ന നിരവധി സംഘർഷങ്ങളിൽ നാം ദിവസവും കാണുന്നത്! കുടുംബങ്ങളിലും  സ്ത്രീകൾക്കോ ​​കുട്ടികൾക്കോ ​​എതിരെയും എത്രമാത്രം അക്രമങ്ങളാണ് നാം പലപ്പോഴും കാണുന്നത്! ഏറ്റവും ദുർബ്ബലരായവരോട്, പാർശ്വവത്കൃതരോടും കുടിയേറ്റക്കാരോടും ചിലപ്പോൾ എത്രമാത്രം അവജ്ഞയാണ് കാട്ടുന്നത്!

ഈ ദിവസം, നാം വീണ്ടും പ്രത്യാശയുള്ളവരാകുകയും, നമ്മുടെ സമീപത്തല്ലാത്തവരോ, അല്ലെങ്കില്‍, നമുക്ക് ഏറ്റവും പരിചിതമായതില്‍ നിന്ന് വ്യത്യസ്ത ആചാരങ്ങളോടും ജീവിതരീതികളോടും ആശയങ്ങളോടും ശീലങ്ങളോടും കൂടി വിദൂരദേശത്തുനിന്നെത്തിയവരോ ഉൾപ്പടെയുള്ള മറ്റുള്ളവരിൽ, വിശ്വാസം അർപ്പിക്കുന്നവരാകുകയും ചെയ്തിരുന്നെങ്കിലെന്ന് ഞാന്‍ ആഗ്രഹിക്കുന്നു, എന്തെന്നാൽ നാമെല്ലാവരും ദൈവത്തിൻറെ മക്കളാണ്!

മദ്ധ്യപൂർവ്വദേശത്ത് സമാധാന കിരണങ്ങൾ പടരട്ടെ

സമാധാനം സാധ്യമാകുമെന്ന പ്രതീക്ഷയിലേക്ക് നമുക്ക് തിരികെ പോകാൻ കഴിഞ്ഞിരുന്നെങ്കിൽ എന്ന് ഞാൻ ആഗ്രഹിക്കുന്നു! ഈ വർഷം കത്തോലിക്കരും ഓർത്തഡോക്സുകാരും ഒരേ ദിവസം ഉയിർപ്പുതിരുന്നാൾ ആഘോഷിക്കുന്ന പുനരുത്ഥാന ദേവാലയമായ തിരുക്കല്ലറയിൽ നിന്ന് സമാധാനത്തിൻറെ പ്രകാശകിരണങ്ങൾ വിശുദ്ധ നാട്ടിലാകമാനവും ലോകം മുഴുവനിലും പരക്കട്ടെ. പലസ്തീനിലും ഇസ്രായേലിലും യാതനകളനുഭവിക്കുന്ന ക്രിസ്ത്യാനികളുടെയും,  അതുപോലെ തന്നെ എല്ലാ ഇസ്രായേൽക്കാരുടെയും എല്ലാ പലസ്തീൻ ജനതയുടെയും ചാരെ ഞാനുണ്ട്. ലോകമെമ്പാടും  യഹൂദവിരുദ്ധാന്തരീക്ഷം വർദ്ധിച്ചുവരുന്നതും  അത് വ്യാപകമായിക്കൊണ്ടിരിക്കുന്നതും ആശങ്കയുളവാക്കുന്നു. ഒപ്പം, എൻറെ ചിന്തകൾ ഗാസയിലെ ജനങ്ങളിലേക്കും, പ്രത്യേകിച്ച് ക്രൈസ്തവ സമൂഹത്തിലേക്കും പായുന്നു. അവിടെ ഭയാനകമായ സംഘർഷം മരണവും നാശവും വിതയ്ക്കുന്നതും തുടരുകയും നാടകീയവും നിന്ദ്യവുമായ ഒരു മാനവികസാഹചര്യത്തിന് കാരണമാകുകയും ചെയ്യുന്നു. യുദ്ധത്തിലേർപ്പെട്ടിരിക്കുന്ന കക്ഷികളോട് ഞാൻ അഭ്യർത്ഥിക്കുന്നു: വെടിനിർത്തുക, ബന്ദികളെ മോചിപ്പിക്കുക, വിശക്കുന്നവരും സമാധാനപരമായ ഭാവി ആഗ്രഹിക്കുന്നവരുമായ ആളുകൾക്ക് സഹായം നൽകുക!

ലെബനനും സിറിയയ്ക്കും വേണ്ടി പ്രാർത്ഥിക്കാം

ലെബനനിലെയും സിറിയയിലെയും ക്രിസ്ത്യൻ സമൂഹങ്ങൾക്കുവേണ്ടി നമുക്ക് പ്രാർത്ഥിക്കാം, സിറിയ അതിൻറെ ചരിത്രത്തിൻറെ അതിലോലമായ ഒരു പരിവർത്തന ഘട്ടത്തിലാണ്. ഇരു നാടുകളും ഭദ്രതയും അതത് രാഷ്ട്രങ്ങളുടെ ഭാഗധേയങ്ങളിലുള്ള പങ്കാളിത്തവും ആഗ്രഹിക്കുന്നു. പ്രിയപ്പെട്ട മദ്ധ്യപൂർവ്വദേശത്തെ ക്രൈസ്തവരെ സവിശേഷ ശ്രദ്ധയോടും പ്രാർത്ഥനയോടും കൂടെ തുണയ്ക്കാൻ ഞാൻ മുഴുവൻ സഭയോടും അഭ്യർത്ഥിക്കുന്നു.

യെമെനും ഉക്രൈയിനും ദക്ഷിണ കൗക്കാസസും അർമേനിയയും അസെർബൈജാനും

യുദ്ധം മൂലം ലോകത്തിലെ ഏറ്റവും മോശമായ "സുദീർഘ" മാനവിക പ്രതിസന്ധികളിൽ ഒന്ന് അനുഭവിക്കുന്ന യെമനിലെ ജനങ്ങളെ ഞാൻ പ്രത്യേകം ഓർക്കുകയാണ്. രചനാത്മക  സംഭാഷണത്തിലൂടെ പരിഹാരങ്ങൾ കണ്ടെത്താൻ ഞാൻ എല്ലാവരെയും ക്ഷണിക്കുന്നു.

ഉത്ഥിതനായ ക്രിസ്തു പീഡിത ഉക്രൈയിന് സമാധാനമെന്ന ഉയിർപ്പുതിരുന്നാൾ ദാനമേകുകയും നീതിയുക്തവും സ്ഥായിയുമായ ഒരു സമാധാനം കൈവരിക്കുന്നതിനുള്ള ശ്രമങ്ങൾ തുടരാൻ ബന്ധപ്പെട്ട എല്ലാവർക്കും പ്രചോദനം പകരുകയും ചെയ്യട്ടെ.

ഈ ഉത്സവ ദിനത്തിൽ, നമുക്ക് ദക്ഷിണ കൗക്കാസസിനെ അനുസ്മരിക്കുകയും അർമേനിയയും അസർബൈജാനും തമ്മിലുള്ള നിയതമായ സമാധാനക്കരാർ എത്രയും വേഗം ഒപ്പുവയ്ക്കപ്പെടുകയും നടപ്പിലാക്കപ്പെടുകയും ചെയ്യട്ടെയെന്നും അത് ആ മേഖലയിൽ ഏറെ കാത്തിരുന്ന അനുരഞ്ജനത്തിലേക്ക് നയിക്കട്ടെയെന്നും പ്രാർത്ഥിക്കുകയും ചെയ്യാം.

ഉത്ഥാനത്തിരുന്നാൾ വെളിച്ചം പടിഞ്ഞാറൻ ബാൾക്കൻ പ്രദേശത്ത് ഐക്യയത്നങ്ങൾക്ക് പ്രചോദനമേകുകയും, പിരിമുറുക്കങ്ങളും പ്രതിസന്ധികളും വഷളാകുന്നത് ഒഴിവാക്കാൻ പ്രവർത്തിക്കുന്ന രാഷ്ട്രീയ പ്രവർത്തകർക്കും, അതുപോലെതന്നെ അപകടകരവും അസ്ഥിരപ്പെടുത്തുന്നതുമായ പെരുമാറ്റരീതികൾ നിരസിക്കുന്നതിൽ ആ പ്രദേശത്തിൻറെ സഹകാരികൾക്കും പിന്തുണയേകുകയും ചെയ്യട്ടെ.ർ

ആഫ്രിക്കയെയും നമുക്കോർക്കാം

നമ്മുടെ പ്രത്യാശയായ ഉത്ഥിതനായ ക്രിസ്തു, സംഘർഷങ്ങൾക്കും അക്രമത്തിനും ഇരകളായ ആഫ്രിക്കയിലെ ജനതകൾക്ക്, സർവ്വോപരി, കോംഗോ ജനാധിപത്യ റിപ്പബ്ലിക്, സുഡാൻ, ദക്ഷിണ സുഡാൻ എന്നിവിടങ്ങളിൽ, സമാധാനവും സാന്ത്വനവും പ്രദാനം ചെയ്യട്ടെ. സഹേൽ, ആഫ്രിക്കയുടെ കൊമ്പ് പ്രദേശം, ഗ്രേറ്റ് ലേക്ക്സ് മേഖല എന്നിവിടങ്ങളിൽ സംഘർഷങ്ങൾ മൂലം ദുരിതമനുഭവിക്കുന്നവരെയും, പല സ്ഥലങ്ങളിലും തങ്ങളുടെ വിശ്വാസം സ്വതന്ത്രമായി പ്രഖ്യാപിക്കാൻ കഴിയാത്ത ക്രിസ്ത്യാനികളെയും അവിടന്ന് പിന്തുണയ്ക്കട്ടെ.

സമാധാനത്തിന് മതസ്വാതന്ത്ര്യവും അഭിപ്രായ സ്വാതന്ത്ര്യവും

മതസ്വാതന്ത്ര്യം ഇല്ലാത്തിടത്ത്, അല്ലെങ്കിൽ ചിന്താസ്വാതന്ത്ര്യവും സംസാരസ്വാതന്ത്ര്യവുമില്ലാത്തിടത്ത്, മറ്റുള്ളവരുടെ അഭിപ്രായങ്ങളെ ബഹുമാനിക്കാത്തിടത്ത് സമാധാനം സാദ്ധ്യമല്ല.

യഥാർത്ഥ നിരായുധീകരണം കൂടാതെ സമാധാനം സാദ്ധ്യമല്ല! ഓരോ ജനതയും സ്വന്തം പ്രതിരോധത്തിനായി സജ്ജമാകേണ്ടതിൻറെ ആവശ്യകത പൊതുവായ പുനരായുധവല്ക്കരണ മത്സരമായി പരിണമിക്കാൻ പാടില്ല. ഭിന്നതകൾ സൃഷ്ടിക്കുന്നതും രാഷ്ട്രീയവും സാമ്പത്തികവുമായ പ്രത്യാഘാതങ്ങൾ ഉണ്ടാക്കുന്നതുമായ മതിലുകൾ തകർക്കാൻ ഉത്ഥാനദിനത്തിൻറെ വെളിച്ചം നമ്മെ പ്രേരിപ്പിക്കുന്നു. പരസ്പരം കരുതേലാകാനും, പരസ്പര ഐക്യദാർഢ്യം വർദ്ധമാനമാക്കാനും, ഓരോ മനുഷ്യ വ്യക്തിയുടെയും സമഗ്രവികസനം പരിപോഷിപ്പിക്കുന്നതിനായി പ്രവർത്തിക്കാനും ഇത് നമ്മെ പ്രേരിപ്പിക്കുന്നു.

മ്യാന്മാറിലെ ജനങ്ങളുടെ ദുരിതം

വർഷങ്ങളായി സായുധ സംഘർഷത്താൽ പീഡിതവും, ആയിരക്കണക്കിന് ആളുകളുടെ മരണത്തിനും അനാഥരും വൃദ്ധരും ഉൾപ്പെടെ നിരവധി അതിജീവിതരുടെ ദുരിതത്തിനും കാരണമായ സാഗൈങ്ങിലെ വിനാശകരമായ ഭൂകമ്പത്തിൻറെ അനന്തരഫലങ്ങളെ ധീരതയോടും ക്ഷമയോടുംകുടെ നേരിടുന്ന ബർമ്മക്കാരായ ജനതയ്ക്ക് ഈ സമയത്ത് നമ്മുടെ സഹായത്തിൻറെ അഭാവം ഉണ്ടാകരുത്. ഇരകൾക്കും അവരുടെ പ്രിയപ്പെട്ടവർക്കും വേണ്ടി നമുക്ക് പ്രാർത്ഥിക്കാം, സേവനപ്രവർത്തനങ്ങളിൽ ഏർപ്പെട്ടിരിക്കുന്ന ഉദാരമതികളായ സകല സന്നദ്ധപ്രവർത്തകർക്കും ഹൃദയംഗമമായ നന്ദി. രാജ്യത്തെ വിവിധ പ്രവർത്തകരുടെ ഭാഗത്തുനിന്നുണ്ടായിട്ടുള്ള വെടിനിർത്തൽ പ്രഖ്യാപനം ആകമാന മ്യാൻമാറിന് പ്രതീക്ഷയുടെ അടയാളമാണ്.

ഭയത്തിൻറെ യുക്തിക്ക് അടിമപ്പെടരുത്

അടച്ചുപൂട്ടുന്ന ഭയത്തിൻറെ യുക്തിക്ക് വഴങ്ങരുത് മറിച്ച്, ആവശ്യമുള്ളവരെ സഹായിക്കാനും വിശപ്പിനെതിരെ പോരാടാനും വികസന പരിപോഷകങ്ങളായ സംരംഭങ്ങൾക്ക് പ്രചോദനം പകരാനും ലഭ്യമായ വിഭവങ്ങൾ ഉപയോഗിക്കണമെന്ന് ലോകത്തിലെ രാഷ്ട്രീയ ഉത്തരവാദിത്തങ്ങളുള്ള എല്ലാവരോടും ഞാൻ അഭ്യർത്ഥിക്കുകയാണ്. ഇവയാണ് സമാധാനത്തിൻറെ "ആയുധങ്ങൾ": മരണം വിതയ്ക്കുന്നതിനുപകരം ഭാവി കെട്ടിപ്പടുക്കുന്നവ!

നമ്മുടെ ദൈനംദിന പ്രവർത്തനങ്ങളുടെ ആധാരമായി ഭവിക്കുന്നതിൽ മാനവികതയുടെ തത്വം  ഒരിക്കലും പരാജയപ്പെടാതിരിക്കട്ടെ. ഏതിരാളികളല്ല, മറിച്ച് ആത്മാവും അന്തസ്സും ഉള്ള ആളുകളാണ് ആക്രമിക്കപ്പെടുന്നതെന്ന്, നിസ്സഹായരായ പൗരന്മാരെയും വിദ്യാലയങ്ങളെയും ആശുപത്രികളെയും ജീവകാരുണ്യപ്രവർത്തകരെയും ബാധിക്കുന്ന സംഘർഷങ്ങളുടെ ക്രൂരതയ്ക്കു മുന്നിൽ നമുക്ക് മറക്കാനാകില്ല.

യുദ്ധത്തടവുകാരുടെ കൈമാറ്റം സാദ്ധ്യമാകട്ടെ

ഈ ജൂബിലി വർഷത്തിൽ, ഉയിർപ്പുതിരുന്നാൾ, യുദ്ധത്തടവുകാരെയും രാഷ്ട്രീയ തടവുകാരെയും മോചിപ്പിക്കുന്നതിനുള്ള ശുഭകരമായ ഒരു അവസരമായി ഭവിക്കട്ടെ! പ്രിയ സഹോദരീ സഹോദരന്മാരേ, കർത്താവിൻറെ ഉത്ഥാനദിനത്തിൽ, മരണവും ജീവിതവും വിസ്മയകരമായ ഒരു പോരാട്ടത്തിൽ പരസ്പരം ഏറ്റുമുട്ടി, എന്നാൽ കർത്താവ് ഇപ്പോൾ എന്നേക്കും ജീവിക്കുന്നു (ഉയിർപ്പുതിരുന്നാൾ ക്രമം) കൂടാതെ ആയുധങ്ങളുടെ ഗർജ്ജനവും മരണത്തിൻറെ മാറ്റൊലിയും ഇനി കേൾക്കാത്ത, അവസാനമില്ലാത്ത ജീവിതത്തിൽ പങ്കുചേരാൻ നമ്മളും വിളിക്കപ്പെട്ടിരിക്കുന്നു എന്ന ഉറപ്പ് അവിടന്ന് നമ്മിൽ സന്നിവേശിപ്പിക്കുന്നു. എല്ലാം പുതിയതാക്കാൻ കഴിയുന്ന ഏകനായവനെ നമുക്ക് നമ്മെത്തന്നെ ഭരമേൽപ്പിക്കാം (cf. വെളിപ്പാട് 21:5)! എല്ലാവർക്കും ഉയിർപ്പുതിരുന്നാൾ മംഗളങ്ങൾ!

ഊർബി ഏത്ത് ഓർബി ആശീർവ്വാദം

ഈ സന്ദേശവായന അവസാനിച്ചതിനെ തുടർന്ന്, പ്രോട്ടൊ ഡീക്കൻ കർദ്ദിനാൾ ഡൊമീനിക്ക് മമ്പേർത്തി (Card.Dominique Mamberti), ഫ്രാന്‍സീസ് പാപ്പാ “ഊര്‍ബി  ഏത്ത് ഓര്‍ബി”  ആശീര്‍വ്വാദം നല്‍കാന്‍പോകുകയാണെന്നും സഭ നിഷ്ക്കര്‍ഷിച്ചിട്ടുള്ള വ്യവസ്ഥകള്‍ക്കനുസൃതം, അത്, നേരിട്ടൊ റേഡിയോ-ടെലെവിഷൻ മാദ്ധ്യമങ്ങളിലൂടെയൊ ഇതര സാങ്കേതികോപാധികളിലൂടെയൊ, സ്വീകരിക്കുന്നവര്‍ക്ക് പൂര്‍ണ്ണദണ്ഡവിമോചനം ലഭിക്കുമെന്നും പ്രഖ്യാപിച്ചതിനെ    തുടര്‍ന്ന്  “ഊര്‍ബി  ഏത്ത് ഓര്‍ബി” ആശീര്‍വ്വാദം നല്കപ്പെട്ടു.  

ആശീര്‍വ്വാദനാന്തരം, പാപ്പാ കൈകൾ വീശി എല്ലാവരെയും അഭിവാദ്യം ചെയ്തതിനു ശേഷം വിശുദ്ധ പത്രോസിന്‍റെ ബസിലിക്കയുടെ മട്ടുപ്പാവില്‍ നിന്ന് പിന്‍വാങ്ങി. തദ്ദനന്തരം എല്ലാവരെയും വിസ്മയത്തിലാഴ്ത്തിക്കൊണ്ട് പാപ്പാ അപ്രതീക്ഷിതമായി വെളുത്ത തുറന്ന വാഹനത്തിൽ വിശുദ്ധ പത്രോസിൻറെ ബസിലിക്കയുടെ അങ്കണത്തിലെത്തുകയും വിശ്വാസികളെ വലംവയ്ക്കുകയും ചെയ്തു.