സ്ഥൈര്യലേപനം മാമ്മോദീസയെന്ന ദാനത്തിൻറെ സ്ഥിരീകരണം, പാപ്പാ !

ജോയി കരിവേലി, വത്തിക്കാൻ സിറ്റി

സഭയാകുന്ന മഹാകുടുംബത്തിൽ നമ്മെ പ്രവേശിപ്പിക്കുന്നതും പരിശുദ്ധാരൂപി നമ്മിൽ കുടിയിരിക്കാൻ വരുന്നതുമായ ദിവസമാണ് മാമ്മോദീസാ ദിനമെന്ന് പാപ്പാ ഓർമ്മിപ്പിക്കുന്നു.

ഇറ്റലിയിലെ ബാരി-ബിത്തോന്തൊ അതിരൂപതയിൽ നിന്നെത്തിയ സ്ഥൈര്യേലേപനാർത്ഥികളും അവരുടെ മാതാപിതാക്കളും കുടുംബാംഗങ്ങളുമുൾപ്പെട്ട ഏഴായിരത്തിലേറെപ്പേരെ ശനിയാഴ്‌ച (27/01/24) വത്തിക്കാനിൽ സ്വീകരിച്ച് സംബോധന ചെയ്യുകയായിരുന്നു ഫ്രാൻസീസ് പാപ്പാ.

നാം ക്രൈസ്തവജീവിതത്തിലേക്ക്, യേശുവിലുള്ള ജീവിതത്തിലേക്ക് പിറന്നുവീഴുന്ന ദിനമാകയാൽ മാമ്മോദീസാത്തീയതി സുപ്രധാനമാണെന്നും  അത് ഓർത്തിരിക്കുകയും ആഘോഷിക്കുകയും വേണമെന്നും പാപ്പാ പറഞ്ഞു.

സുവിശേഷ പ്രഘോഷണമെന്ന ദൗത്യം ഈ കൂദാശവഴി നമുക്കു ലഭിക്കുന്നതിനെക്കുറിച്ചു പരാമർശിച്ച പാപ്പാ വാഴ്ത്തപ്പെട്ട കാർലൊ അക്കൂത്തിസിൻറെ മാതൃക പിൻചെല്ലാൻ പ്രചോദനം പകർന്നു. പ്രാർത്ഥനയോടുള്ള ഇഷ്ടം, വിശ്വാസ സാക്ഷ്യം, പരസ്നേഹം എന്നീ മൂന്നു മാർഗ്ഗങ്ങൾ വാഴ്ത്തപ്പെട്ട അക്കൂത്തിസ് സുവിശേഷസന്ദേശ പ്രസരണത്തിന് ഉപയോഗപ്പെടുത്തിയെന്ന് പാപ്പാ വിശദീകരിച്ചു.