മെക്സിക്കോയിൽ, അഭയാർത്ഥി കേന്ദ്രത്തിലെ അഗ്നിബാധയിൽ പാപ്പായുടെ ദുഃഖം!

ജോയി കരിവേലി, വത്തിക്കാൻ സിറ്റി

മെക്സിക്കോയിലെ സ്യുദാദ് ഹുവാരെസിൽ ചൊവ്വാഴ്ച  (28/03/23) കുടിയേറ്റക്കാർക്കായുള്ള ഒരു കേന്ദ്രത്തിലുണ്ടായ അഗ്നിബാധയിൽ മരണമടഞ്ഞവർക്കായി പാപ്പാ പ്രാർത്ഥിക്കുന്നു.

ബുധനാഴ്ച (29/03/23) വത്തിക്കാനിൽ അനുവദിച്ച പ്രതിവാര പൊതുകൂടിക്കാഴ്ചാ വേളയിൽ സ്പാനിഷ് ഭാഷാക്കാരെ പ്രത്യേകം സംബോധന ചെയ്ത വേളയിലാണ്  ഫ്രാൻസീസ് പാപ്പാ ഈ തീപിടുത്ത ദുരന്തത്തിൽ മരണമടഞ്ഞവരെയും അവരുടെ കുടുംബാംഗങ്ങളെയും അനുസ്മരിച്ചത്.

ഈ ദുരന്തത്തിൻറെ വേദന പേറുന്നവർക്ക് ദൈവികസാന്ത്വനം ലഭിക്കുന്നതിനായി പാപ്പാ പ്രാർത്ഥിക്കുകയും ചെയ്തു.

കുടിയേറ്റക്കാരുടെ വാസ കേന്ദ്രത്തിലുണ്ടായ അഗ്നിബാധയിൽ  നാല്പതോളം പേർക്ക് ജീവഹാനി സംഭവിക്കുകയും മുപ്പതോളം പേർക്ക് പൊള്ളലേൽക്കുകയും ചെയ്തിട്ടുണ്ട്. മദ്ധ്യ അമേരിക്കയിലും തെക്കെ അമേരിക്കയിലും നിന്നുള്ളവരാണ് ഈ കേന്ദ്രത്തിൽ താമസിച്ചിരുന്നത്. മരണമടഞ്ഞവരിൽ കൂടുതലും ഗോട്ടിമാലക്കാരാണ്. തങ്ങളെ നാടുകടത്തുന്നതിനെതിരെ പ്രതിഷേധിക്കുന്ന കുടിയേറ്റക്കാരുടെ ഒരു വിഭാഗമാണ് ഈ തീപിടിത്തത്തിനു പിന്നിലെന്ന് കരുതപ്പെടുന്നു.