തൊഴിലാളികളുടെയും തൊഴിലിന്‍റെയും ഔന്നത്യം!
ജോയി കരിവേലി, വത്തിക്കാന്‍ സിറ്റി
തൊഴിലാളികളുടെ അന്തസ്സ് സംരക്ഷിക്കപ്പെടേണ്ടതിന്‍റെ ആവശ്യകത പാപ്പാ ചൂണ്ടിക്കാട്ടുന്നു.
ജൂലൈ മാസത്തിലെ ആദ്യ ശനിയാഴ്ച ഐക്യരാഷ്ട്രസഭയുടെ ആഭിമുഖ്യത്തില്‍ സഹകരണസംഘങ്ങളുടെ അന്താരാഷ്ട്രദിനം ആചരിക്കപ്പെടുന്നതിനോടനുബന്ധിച്ച് ഈ ശനിയാഴ്ച (06/07/2019) കോപ്സ്ഡേ (#CoopsDay) എന്ന ഹാഷ്ടാഗോടുകൂടി കണ്ണിചേര്‍ത്ത ട്വിറ്റര്‍ സന്ദേശത്തിലാണ് ഫ്രാന്‍സീസ് പാപ്പാ ഇത് എടുത്തുകാട്ടിയിരിക്കുന്നത്.
"തൊഴിലാളികളുടെയും തൊഴിലിന്‍റെയും ഔന്നത്യവും നമ്മുടെ പൊതുഭവനമായ ഭൂമിയുടെ നന്മയും സംരക്ഷിക്കാന്‍ കഴിയുന്ന വ്യക്തികളെയും സ്ഥാപനങ്ങളയെും നമുക്കാവശ്യമുണ്ട്" എന്നാണ് പാപ്പാ കുറിച്ചിരിക്കുന്നത്.
വിവിധഭാഷകളിലായി 4 കോടിയിലേറെവരുന്ന ട്വിറ്റര്‍ അനുയായികളുള്ള പാപ്പാ കുറിക്കുന്ന ട്വിറ്റര്‍ സന്ദേശങ്ങള്‍ അറബി, ലത്തീന്‍, ജര്‍മ്മന്‍ ഇറ്റാലിയന്‍, ഇംഗ്ലീഷ്, സ്പാനിഷ്, പോളിഷ്, പോര്‍ച്ചുഗീസ്, ഫ്രഞ്ച്, എന്നിങ്ങനെ 9 ഭാഷകളില്‍ ലഭ്യമാണ്.
സഹകരണസംഘങ്ങളുടെ അന്താരാഷ്ട്ര ദിനം
“സഹകരണസംഘങ്ങള്‍ അന്തസ്സാര്‍ന്ന തൊഴിലിന്” എന്നതാണ് സഹകരണസംഘങ്ങളുടെ അന്താരാഷ്ട്രദിനാചരണത്തിനുള്ള ഇക്കൊല്ലത്തെ വിചിന്തന പ്രമേയം.
1923-ല്‍ അന്താരാഷ്ട്ര സഹകരണ സഖ്യമാണ് (ഐസിഎ-ICA) സഹകരണസംഘ അന്താരാഷ്ട്രദിനം ഏര്‍പ്പെടുത്തിയത്.
എന്നാല്‍ 1995-ല്‍, അന്താരാഷ്ട്ര സഹകരണസംഘ സഖ്യത്തിന്‍റെ സ്ഥാപന ശതാബ്ദിയാഘോഷവേളയിലാണ് ഐക്യരാഷ്ട്ര സഭ (യുഎന്‍ഒ-UNO) മറ്റൊരു അന്താരാഷ്ട്ര സഹകരസംഘ ദിനം പ്രഖ്യാപിച്ചുകൊണ്ട് ഈ ആചരണത്തില്‍ പങ്കുചേര്‍ന്നത്.
അന്താരാഷ്ട്ര സഹകരണ സഖ്യവും ഐക്യരാഷ്ട്രസഭയും ഒരേ ദിവസമാണ് സഹകരണസംഘങ്ങളുടെ അന്താരാഷ്ട്രദിനം ആചരിക്കുന്നത്.
യുഎന്‍ഒയുടെ ഇരുപത്തിയഞ്ചാമത്തെയും ഐസിഎയുടെ തൊണ്ണൂറ്റിയേഴാമത്തെയും അന്താരാഷ്ട്ര സഹകരണസംഘ ദിനാചരണമാണ് ഇക്കൊല്ലത്തേത്.
