ബിഷപ്പ് മിഗുവൽ ഏഞ്ചൽ: കായിക വിനോദങ്ങളും പരസ്യങ്ങളും അനധികൃത കുടിയേറ്റത്തിന് ഇന്ധനം നൽകുന്നു

സി. റൂബിനി ചിന്നപ്പ൯ സി.റ്റി.സി, വത്തിക്കാൻ ന്യൂസ്

2023 ൽ ലോകമെമ്പാടുമുള്ള കുടിയേറ്റ പാതകളിൽ 8,565 ജീവനുകൾ നഷ്ടപ്പെട്ടുവെന്ന് ചൂണ്ടിക്കാട്ടിയ ഇക്വറ്റോറിയൽ ഗിനിയയിലെ എബിബെയിൻ രൂപതയിലെ ബിഷപ്പ് മിഗുവൽ ഏഞ്ചൽ എൻഗ്വേമ ബീ സഹാറ മരുഭൂമിയും കാനറി ദ്വീപുകളിലേക്കുള്ള അപകടകരമായ കടൽപാതയും പ്രത്യേകിച്ചും അപകടകരമാണെന്ന് ഊന്നിപ്പറഞ്ഞു. അസ്വസ്ഥമാക്കുന്ന ഈ കണക്കുകൾ യഥാർത്ഥ മരണങ്ങളുടെ ഒരു ഭാഗം മാത്രമേ പ്രതിനിധീകരിക്കുന്നുള്ളൂ എന്ന് അദ്ദേഹം ചൂണ്ടിക്കാട്ടി.

കുടിയേറ്റത്തിന്റെ പ്രധാന പ്രേരകശക്തി ദാരിദ്ര്യമാണെന്ന് പറഞ്ഞ ബിഷപ്പ് എൻഗ്വേമ, അഴിമതിയും ബ്യൂറോക്രാറ്റിക് തടസ്സങ്ങളും പ്രധാന തടസ്സങ്ങളാകുന്ന  സഹായ വിതരണത്തിന്റെ കാര്യക്ഷമതയില്ലായ്മയെക്കുറിച്ച് വിലപിച്ചു. ദുർബലരായ ജനങ്ങളെ നേരിട്ട് സഹായിക്കുന്നതിന് സഭ, വനിതാ അസോസിയേഷനുകൾ, യൂത്ത് ഫൗണ്ടേഷനുകൾ തുടങ്ങിയ പ്രാദേശിക സ്ഥാപനങ്ങൾക്ക് പിന്തുണ അഭ്യർത്ഥിച്ചുകൊണ്ട് അദ്ദേഹം അടിത്തട്ടിലൂടെയുള്ള സമീപനത്തിനായി വാദിച്ചു.

പാശ്ചാത്യ സമ്പന്നതയെക്കുറിച്ചുള്ള തെറ്റായ മിഥ്യാധാരണകൾ നിലനിർത്തുന്നതിൽ സ്പോർട്ട്സിന്റെയും പരസ്യത്തിന്റെയും പങ്കിനെ ബിഷപ്പ് അപലപിച്ചു. കുടിയേറ്റക്കാർ അഭിമുഖീകരിക്കുന്ന വെല്ലുവിളികളുടെ യാഥാർത്ഥ്യബോധമുള്ള ചിത്രം മനസ്സിലാക്കേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു, കഠിനമായ യാത്രയും, അതിലെ വെല്ലുവിളികളും നേരിട്ട് ലക്ഷ്യത്തിലെത്തുന്നവരെ സമൂഹത്തിൽ ഉൾച്ചേർക്കാൻ വേണ്ട നീണ്ട പ്രക്രിയയെയും അദ്ദേഹം തുറന്നു കാട്ടി.

മാത്രമല്ല, സ്വയംപര്യാപ്തതയും സുസ്ഥിര വികസനവും പ്രോത്സാഹിപ്പിക്കുന്നതിന് പ്രാദേശിക സാമ്പത്തിക പ്രവർത്തനങ്ങൾ പ്രോത്സാഹിപ്പിക്കേണ്ടതിന്റെ അനിവാര്യത ബിഷപ്പ് എൻഗ്വേമ അടിവരയിട്ടു. ബാഹ്യ സഹായത്തെ ആശ്രയിക്കുന്നതിനെതിരെ മുന്നറിയിപ്പ് നൽകി. പ്രത്യയശാസ്ത്രപരമായ അടിച്ചേൽപ്പിക്കലിനെതിരെയും കൊളോണിയൽ മനോഭാവങ്ങളുടെ പുനരുജ്ജീവനത്തിനെതിരെയും മുന്നറിയിപ്പ് നൽകിക്കൊണ്ട് അദ്ദേഹം പരമ്പരാഗതമായി പിൻതുടരുന്ന സഹായ സമ്പ്രദായങ്ങളെ ശക്തമായി എതിർത്തു.

കഴിഞ്ഞ അഞ്ച് വർഷത്തിനിടെ ഇക്വറ്റോറിയൽ ഗിനിയയിലെ 28 പദ്ധതികൾക്ക് എസിഎൻ നൽകിയ ഉറച്ച പിന്തുണ പ്രാദേശിക സഭയുടെ അജപാലന ശ്രമങ്ങളെ ശക്തിപ്പെടുത്തുകയും, കുടിയേറ്റത്തിന്റെയും ദാരിദ്ര്യത്തിന്റെയും ബഹുമുഖ വെല്ലുവിളികളെ അഭിസംബോധന ചെയ്യുന്നതിൽ സഹകരണ സംരംഭങ്ങൾ നൽകിയ നിർണ്ണായക പങ്ക് അടിവരയിടുകയും ചെയ്തു.

ആഫ്രിക്കൻ ഭൂഖണ്ഡത്തെ ബാധിക്കുന്ന ദാരിദ്ര്യം, തെറ്റായ വിവരങ്ങൾ, വ്യവസ്ഥാപരമായ അസമത്വങ്ങൾ എന്നിവയാൽ നയിക്കപ്പെടുന്ന കുടിയേറ്റത്തെ ചെറുക്കുന്നതിന് സമഗ്രമായ ഒരു സമീപനത്തിന്റെ അടിയന്തിര ആവശ്യകതയെക്കുറിച്ചുള്ള വികാരനിർഭരമായ ഓർമ്മപ്പെടുത്തലായി ബിഷപ്പ് എൻഗുവേമയുടെ അഭ്യർത്ഥന പ്രതിധ്വനിക്കുന്നു