ശ്രീലങ്കയിലെ സഭ ഭീകരാക്രമണത്തിനിരകളായവരെ അനുസ്മരിക്കുന്നു!
ജോയി കരിവേലി, വത്തിക്കാൻ സിറ്റി
2019 ഏപ്രിൽ 21-ന്, ഉയിർപ്പു ഞായറാഴ്ച ശ്രീലങ്കയിലുണ്ടായ ഭീകരാക്രമണത്തിൽ ജീവൻ പൊലിഞ്ഞവരെ അനുസ്മരിക്കുന്നതിന് പ്രസ്തുത ദുരന്ത വാർഷിക ദിനമായ ചൊവാഴ്ച (21/04/20202) പ്രാദേശിക കത്തോലിക്കാ സഭ 2 മിനിറ്റ് മൗനമാചരിക്കുകയും ദേവാലയമണികൾ മുഴക്കുകയും ചെയ്യും.
കൊളൊമ്പൊ ആർച്ച്ബിഷപ്പ് കർദ്ദിനാൾ മാൽക്കം രഞ്ജിത്താണ് ഈ മൗനാചരണത്തിന് വിശ്വാസികളെ ക്ഷണിച്ചത്.
രാവിലെ, പ്രാദേശികസമയം 8.45-ന് മൗനാചരണം ആരംഭിക്കുകയും ഒരു വിളക്കൊ മെഴുകുതിരിയൊ ഭവനങ്ങളിൽ കൊളുത്തുകയും ചെയ്യണമെന്ന് അദ്ദേഹം നിർദ്ദേശിച്ചു.
ഭീകരാക്രമണത്തിനിരകളായവർക്കുവേണ്ടിയുള്ള അനുസ്മരണച്ചടങ്ങുകളിൽ നേരിട്ടുള്ള പങ്കാളിത്തമില്ലാതെ ദൃശ്യശ്രാവ്യ മാദ്ധ്യമങ്ങളിലൂടെ പങ്കുചേരാമെന്നും കർദ്ദിനാൾ മാൽക്കം രഞ്ജിത്ത് അറിയിച്ചു.
2019 ഏപ്രിൽ 21-ന്, ഉയിർപ്പു ഞായറാഴ്ച 2 കത്തോലിക്കാ ദേവാലയങ്ങളിലും 1 എവഞ്ചേലിക്കൽ ദേവാലയത്തിലും 3 ആഡംബര ഹോട്ടലുകളിലുമായുണ്ടായ മുസ്ലിംഭീകരാക്രണങ്ങളിൽ 31 വിദേശികളുൾപ്പടെ 279 പേർ മരിക്കുകയും എതാണ്ട് 500 പേർക്ക് പരിക്കേല്ക്കുകയും ചെയ്തു.
വായനക്കാർക്ക് നന്ദി. സമകാലികസംഭവങ്ങളെക്കുറിച്ച് കൂടുതലായി അറിയാൻ ഇവിടെ ക്ലിക് ചെയ്ത് വത്തിക്കാൻ ന്യൂസ് വാർത്താക്കുറിപ്പിന്റെ സൗജന്യവരിക്കാരാകുക: