Որոնել

Vatican News
Աթէնքի մէջ անտառային հրդեհներ Աթէնքի մէջ անտառային հրդեհներ  (AFP or licensors)

Տարածուող անտառային հրդեհներու պատճառով հազարաւոր մարդիկ լքած են Աթէնքի արուարձանը

Յունաստանի մէջ կան աւելի քան 50 անտառային հրդեհներ, որովհետեւ երկրին հարուածած է վերջին երեսուն տարիներու ընթացքին ամէնէն սաստիկ տաքը:

Հազարաւոր մարդիկ ստիպուած եղած են լքել Յունաստանի մայրաքաղաք Աթէնքի արուարձան Թրաքոնմաքետոնեսը, երբ ուժեղ քամին տարածած է անտառային հրդեհները, որոնք հրկիզած են տուներ: Այս մասին կը հաղորդէ բրիտանական «Կարտիըն» օրաթերթը:

Յունաստանի մէջ կան աւելի քան 50 անտառային հրդեհներ, որովհետեւ երկրին հարուածած է վերջին երեսուն տարիներու ընթացքին ամէնէն սաստիկ տաքը:

Տասնեակ հազարաւոր տուներ եւ շինութիւններ աւերուած են, այդ պատճառով ալ վարչապետ Քիրիաքոս Միցոթաքիս խոստացած է արմատական փոփոխութիւն կատարել կլիմային առչնուող հարցերու մէջ երկրի մօտեցման մէջ:

Յունական Էւիա կղզիին մէջ մոլեգնած անտառային հրդեհը ոչնչացուցած է առնուազն 150 տուն: Կրակը շրջապատած է Ս. Դաւիթ վանքն ու տասնեակ մը գիւղեր: Այս մասին կը գրէ բրիտանական «Կարտիըն» օրաթերթը` մանրամասնելով, որ վանքի երեք վանականներ մերժած են հեռանալ, սակայն մօտակայ գիւղերէն բոլորը հեռացուած են:

«Մենք շնչահեղձ կ՛ըլլանք ծուխին պատճառով» գործակալութիւններէն մէկուն հետ հեռաձայնային հաղորդակցութեան ընթացքին պատմած է վանականներէն մէկը` նկարագրելով վանքը շրջապատող 30-40 մեթր բարձրութեամբ բոցերը:

Ոստիկանութիւնը յայտնած է, որ վանականներուն պիտի ստիպէ հեռանալ, եթէ անոնց կեանքին վտանգ սպառնայ: Լողափին վրայ հաւաքուած շուրջ 85 մարդ հեռացուած է հինգ նաւակով:

Աղբիւրը կը գրէ, որ ասիկա մէկն է շուրջ 100 անտառային հրդեհներէն, որոնք այս օրերուն պատուհասած են Յունաստանը:

Անցեալ հինգշաբթի առաւօտեան հրշէջները շարունակած են մարել Աթէնքի մօտ բռնկած հրդեհը, մինչդեռ ողիմպիական խաղերու «ծննդավայր» Օլիմփիայի քաղաքապետը օգնութիւն խնդրած է, որովհետեւ կրակը կը սպառնայ այդ վայրին: Օլիմփիայի մէջ շուրջ 100 հրշէջ կը պայքարի կրակին դէմ, անոնց կ՛օգնեն երեք ուղղաթիռ եւ երկու օդանաւ:

Հրդեհները բռնկած են, որովհետեւ Յունաստանը կը գտնուի տաքի ալիքի ճիրաններուն մէջ: Փորձագէտները նախազգուշացուցած են, որ համաշխարհային ջերմացումը կը մեծցնէ նման հրդեհներու յաճախականութիւնն ու ուժգնութիւնը:

«Այն ամէնը, ինչ որ կարելի է ընել թանգարանն ու հնագիտական վայրը փրկելու համար, ուրկէ սկսած են Ողիմպիական խաղերը, կատարուած է», ըսած է մշակոյթի նախարար Լինա Մենտոնի:

Քաղուած «Ազդակ»էն

10/08/2021, 07:40