Որոնել

Vatican News
Քորոնավիրուս Քորոնավիրուս  (AFP or licensors)

Աշխարհի տարածքին «Քորոնա» ժահրի նոր տարբերակի պարագաներ կ՛արձանագրուին

Անցեալ շաբաթ «Քորոնա» ժահրի նոր տարբերակի գոյութեան մասին տեղեկութեան հրապարակումէն ետք աշխարհի տարածքին ճամբորդութեան արգելքներ հաստատուեցան:

«Քովիտ-19» ժահրի առաջին անգամ Բրիտանիոյ մէջ յայտնաբերուած աւելի վարակիչ նոր տարբերակի պարագաներ յայտնաբերուած են եւրոպական շարք մը երկիրներու, Քանատայի եւ Ճափոնի մէջ: Այս մասին հաղորդեց «Պի.Պի.Սի.»-ն:

Բրիտանիայէն եկած քաղաքացիներու մօտ վարակումներ յայտնաբերուած են Սպանիոյ, Զուիցերիոյ, Շուէտի եւ Ֆրանսայի մէջ:

Պաշտօնատարներ կը յայտնեն, որ Քանատայի Օնթարիօ նահանգին մէջ «Քորոնա»-ի նոր տարբերակով վարակուած ամոլին մասին ճամբորդութեան կամ վտանգաւոր հաղորդակցութեան մասին տեղեկութիւններ չկան:

Ճափոն այսօրուընէ սկսեալ կ՛արգիլէ երկրին մէջ չբնակող օտարահպատակներուն Ճափոն մուտք գործելը:

Բրիտանիայէն եկած հինգ ճամբորդներու մօտ վարակումի մասին տեղեկացնելէ ետք, Ճափոն հաղորդած է յաւելեալ հաստատ երկու պարագաներու մասին, որոնցմէ մէկը երկրին մէջ վարակուած է:

Անցեալ շաբաթ «Քորոնա» ժահրի նոր տարբերակի գոյութեան մասին տեղեկութեան հրապարակումէն ետք աշխարհի տարածքին ճամբորդութեան արգելքներ հաստատուեցան:

Նշենք, որ Յորդանանի առողջապահութեան նախարարը երէկ յայտարարեց, որ Յորդանանի մէջ արձանագրուած է «Քորոնա» ժահրի Բրիտանիոյ մէջ յայտնաբերուած նոր տեսակով վարակման երկու պարագաներ:

Քաղուած «Ազդակ »էն

28/12/2021, 07:10