Ռայի Պատրիարք. «Իշխանութիւնը իրաւունք չունի խաղաղ եւ արդարացի պահանջներուն բռնարարքներով եւ ոստիկանական արարքներով դէմ դնելու»
Մարոնի համայնքի Պշարա Ռայի պատրիարքը երէկ Պքերքէի մէջ նախագահեց կիրակի օրուան Ս. պատարագին, որուն ընթացքին արտասանած իր քարոզին մէջ հաստատեց, որ լիբանանցի պատասխանատուներուն պարտականութիւնն է լիբանանցի ժողովուրդին եւ Լիբանանին բարիք կատարել` սահմանադրական հաստատութիւններուն ընդմէջէն երկրին տնտեսական, ընկերային, բարգաւաճման եւ քաղաքական մարզերը կայունացնելով:
Ան նշեց, որ առանց սահմանադրական հաստատութիւններուն կարելի չէ Լիբանանի բարիքները իրականացնել:
«Միւս կողմէ, իշխանութիւնը իրաւունք չունի խաղաղ եւ արդարացի պահանջներուն բռնարարքներով եւ ոստիկանական արարքներով դէմ դնելու, ինչպէս որ իրենց իրաւունքը պահանջող քաղաքացիները իրաւունք չունին սահմանադրութիւնը խախտելու», հաստատեց ան:
Ռայի պատրիարքը անդրադարձաւ նաեւ Միացեալ Նահանգներու նախագահ Տանըլտ Թրամփի յայտարարած «Դարու գործարք»-ին` զայն նկատելով Պաղեստինեան դատին դէմ ցնցիչ հարուած մը:
Քաղուած «Ազդակ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
