Որոնել

Vatican News
Արցախ Արցախ 

Հայ Եկեղեցւոյ աշխարհասփիւռ Թեմերու երիտասարդներու ուխտգնացութիւնը Արցախ. «Դէպի Սուրբ Էջմիածին, Դէպի Սրբազան Արցախ»

Համահայկական հաւաքին կը մասնակցին Հայաստանի, Արցախի եւ Սփիւռքի թեմերէն ժամանած շուրջ 250 եկեղեցասէր երիտասարդներ:

Գարեգին Բ. Ամենայն Հայոց Կաթողիկոսի օրհնութեամբ՝  Յուլիս 4-7 տեղի կ՛ ունենայ Հայ Եկեղեցւոյ Համաշխարհային Երիտասարդական Միաւորման (ՀԵՀԵՄ) «Դէպի Սուրբ Էջմիածին, դէպի սրբազան Արցախ» ուխտագնացութիւնը:

Համահայկական հաւաքին կը մասնակցին Հայաստանի, Արցախի եւ Սփիւռքի թեմերէն ժամանած շուրջ 250 եկեղեցասէր երիտասարդներ:

Ուխտագնացութեան մեկնարկը   կատարուեցաւ վեհափառ հայրապետին օրհնութեամբ, Մայր Աթոռ Սուրբ Էջմիածինէն:

Երիտասարդական հաւաքի մասնակիցները այցելութիւններ կատարեցին Հայաստանի եւ Արցախի տեսարժան վայրեր,  հանդիպում ունեցան Արցախի Թեմի Առաջնորդ Պարգեւ Արք. Մարտիրոսեանի եւ Արցախի Հանրապետութեան նախագահ Բակօ Սահակեանի հետ:

Ուխտագնացութեան ծիրէն ներս Երիտասարդական միութիւններու ներկայացուցիչները ոլորտի առաջատար փորձագէտներու հետ կը քննարկեն իրենց գաղափարներն ու նախաձեռնութիւնները` բաժնուելով 7 խումբերու. հոգեւոր-ազգային ձեռնարկներ, առեւտուր-ֆորումային, մարզական-ողիմպիական, մշակութային, ընկերային, տեղեկատուական եւ կրթադաստիարակչական: Ծրագրային խումբերու աշխատանքները կը միտին երիտասարդ աշխատակիցներուն մէջ առաջնորդական կարողութիւններու զարգացման, քոյր թեմերու (Հայաստան-Սփիւռք) գործակցութեան խթանման, ՀԵՀԵՄ տարածաշրջանային եւ միջտարածաշրջանային, ինչպէս նաեւ համաերիտասարդական նոր ու կազմակերպուած նախաձեռնութիւններու նախագծման:

06/07/2019, 08:00