Որոնել

Vatican News
Վատիկանի Ֆինանսներու վերահսկողութեան գրասենեակները Վատիկանի Ֆինանսներու վերահսկողութեան գրասենեակները 

Վատիկանի Ֆինանսներու Վերահսկողութիւնը հրապարակած է 2019 թուականի տեղեկատուութիւնը։

Տեղեկատուութիւնը կը յիշէ 370 պարագաներ, ուր արտասահմանեան գործակիցներու (Financial Intelligence Units) հետ կատարուած են համագործակցութեան փոխանակումներ։

Վազգէն Աբարդեան - Վատիկան

Վատիկանի Ֆինանսներու Վերահսկողութեան ուշադրութեան յանձնուած գումարներու կասկածելի հոսքի պարագաները նախորդ տարուան ընթացքին թեթեւ ելք մը արձանագրած են։ Մինչ 2018 թուականին խարդախութիւններու թիւը 56 էր, 2019 թուականին ան բարձրացած է 64ի։ Այս կը հաղորդէ Ֆինանսներու Վերահսկողութիւնը իր 2019 թուականի տարեկան տեղեկատուութեան մէջ, որ հրապարակուած է ուրբաթ, յուլիս 3ին։ Աճած է նաեւ այս հարցով վատիկանեան դատախազութեան ներկայացուած ամբաստանութիւններու թիւը, որ 2018ին արձանագրուած 11 պարագաներէ բարձրացած է 15 պարագաներու։ Վերահսկողութեան համաձայն իրականացուած են «կանխարգելման չորս միջոցառումներ», ինչպէս դրամատան հաշուի սառեցում։

Արդիւնալի եղած է Վատիկանի Ֆինանսներու Վերահսկողութեան համագործակցութիւնը միջազգային մակարդակի վրայ։ Տեղեկատուութիւնը կը յիշէ 370 պարագաներ, ուր արտասահմանեան գործակիցներու (Financial Intelligence Units) հետ կատարուած են համագործակցութեան փոխանակումներ։ Կասկածի առարկայ պարագաներու մեծամասնութիւնը առընչուած է միջազգային խարդախութեան, տուրքերէ փախուստի եւ շորթումի։

Վատիկանի Ֆինանսներու Վերահսկողութեան տնօրէն Քարմելօ Պարպակալլօ, որ իր պաշտօնը կը վարէ նախորդ տարուան նոյեմբեր ամսէն, մատնանիշ ըրած է որոշ բարեկարգումներու, որոնց Սուրբ Աթոռը կը ձեռնարկէ՝ թափանցիկութեան հասնելու նպատակով։ Ան յայտարարած է յաւելեալ քայլերու որդեգրում՝ ապահովցնելու համար յստակութիւն դրամական գործառնութիւններու պարագային։ Ան աւելցուցած է թէ կասկած չկայ, թէ իր պատշտօնէութիւնը նաեւ ապագային իր բաժինը պիտի բերէ այդ յստակացումին։

Սուրբ Աթոռի եւ Վատիկանի Ֆինանսներու Վերահսկողութիւնը հիմնուած է Բենեդիկտոս ԺԶ. Պապի գահակալութեան տարիներուն (2005-2013), պայքարելու համար դրամի լուացման եւ ահաբեկչութեան օժանդակութեան դէմ։ Ինչպէս այլ պետութիւններու Financial Intelligence Units-ը, նաեւ Վատիկանի Ֆինանսներու Վերահսկողութիւնը կը հետախուզէ իրեն յայտնուած կասկածելի պարագաները։ Եթէ կասկած կայ քրէական գործի, պարագան կը յանձնուի վատիկանեան դատախազութեան։

04/07/2020, 08:01