Սուրիա. Արեւելքի պատրիարքներ Ճօ Պայտընին կը դիմեն պատժամիջոցները վերացնելու խնդրագիրով:
Վատիկան Նիուզ
Ուղերձը ստորագրուած է Սուրիայի Օրթոտոքս Եկեղեցւոյ պատրիարք Իգնատիոս Եփրեմ Բ Քարիմի, Կաթողիկէ Եկեղեցւոյ պատրիարք Իգնատիոս Եուսէֆ Գ Եունանի, Մելքիդ Եկեղեցւոյ պատրիարք Եուսէֆ Ապսիի եւ Մերձաւոր Արեւելքի Եկեղեցիների Խորհուրդի գլխաւոր քարտուղար Միշէլ Ապսի կողմից:
ԱՄՆ նախագահի պաշտօնը ստանձնելու առթիւ, ընդունուած կարգով, նախագահ Պայտընին ուղղուած շնորհաւորանքներից յետոյ՝ Եկեղեցիների առաջնորդները ուշադրութիւն են հրաւիրում ԱՄՆ նախկին վարչակարգերի կողմից Դամասկոսի նկատմամբ կիրառուող պատժամիջոցների աղէտալի հետեւանքների վրայ: Բոլորովին վերջերս՝ դեկտեմբեր ամսին, ոյժի մէջ մտաւ նաեւ Սէզարի օրէնք անունը ստացած մէկ այլ պատժամիջոց, որը «Սուրիայում տիրող ծանր իրավիճակը էլ աւելի անտանելի է դարձնում, յատկապէս՝ Քովիտ-19-ի համաճարակի պայմաններում՝ արգելափակելով օգնութիւնը, առեւտուրը եւ ներդրումները, որոնք խիստ անհրաժեշտ են Սուրիայում արդէն իսկ մէկ տասնամեակ շարունակուող պատերազմի հետեւանքով ջլատուած առողջապահական համակարգի եւ տնտեսութեան գործունէութեան համար», - ընդգծում են պատրիարքները:
«Հանրային պատիժ» Սուրիայի ժողովրդի նկատմամբ
Այս միջոցները ընկալւում են որպէս «հանրային պատիժ» եւ «երկիրը ընկղմում աննախադէպ մարդասիրական ճգնաժամի մէջ: Նախկինում Արեւելքի ցորենի շտեմարանը համարուող Սուրիան այսօր մեծ դժուարութեամբ է կարողանում կերակրել իր սոված ժողովրդին», - գրուած է նամակում: «Սաստիկ ձմեռները եւ առողջապահական այս ճգնաժամը, որ հիւանդանոցներին չի յաջողւում զսպել՝ աւարտուն տեսք են հաղորդում աշխարհի վերջը պատկերող այս կտաւին»:
Պատրիարքները խնդրագիրը եզրափակում են Սպիտակ Տան նոր ղեկավարին ուղղուած հանդիսաւոր կոչով. «Պարոն նախագահ, թախանձագին խնդրում ենք օգնել Սուրիայի ժողովրդին՝ մեղմացնելու մարդասիրական ճգնաժամը, որը սպառնում է անկայունութեան նոր ալիքի պատճառ հանդիսանալ Մերձաւոր Արեւելքում եւ դրա սահմաններից դուրս՝ ինչպէս նշուած է Միաւորուած ազգերի յատուկ զեկոյցի մէջ: Միացեալ Նահանգների ազգային շահերը կարելի է պաշտպանել առանց Սուրիայի ժողովրդի նկատմամբ պատժամիջոցներ կիրառելու»:
Թարգմանեց՝ Հրանուշ Սարգսեանը
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ