Пошук

Vatican News
Ватыканскія музеі. Ілюстрацыйнае фота Ватыканскія музеі. Ілюстрацыйнае фота 

Ватыканскія музеі застануцца зачыненымі да сярэдзіны студзеня

Да 15 студзеня 2021 г. Ватыканскія музеі застануцца зачыненымі для наведвальнікаў. Рашэнне прынята ў сувязі з новымі мерамі ўладаў Італіі, накіраванымі на стрымліванне распаўсюджвання COVID-19.

У гэты перыяд будзе таксама прыпынена любая турыстычная, музейная і культурная дзейнасць у комплексе Папскіх віл у летняй рэзідэнцыі Кастэль-Гандольфа пад Рымам.

Прадугледжаны аўтаматычны зварот грошай за набытыя ці ўжо замоўленыя квіткі і арганізаваныя экскурсіі, таму людзям не давядзецца нават звяртацца ў Музеі з запытам з гэтай нагоды, - адзначаецца ў паведамленні ў Instagram.

Тым не менш, з нагоды надыходзячых святаў Божага Нараджэння папскія галерэі падрыхтавалі для ўсіх прыхільнікаў высокага мастацтва арыгінальны падарунак – “Падарачную карту Ватыканскіх музеяў” (Musei Vaticani Gift Card).

Набыць яе можна ў інтэрнэце, выбраўшы адзін з двух варыянтаў “віртуальнай экскурсіі”: просты ўваход або наведванне працягласцю каля дзвюх гадзін у суправаджэнні гіда. Дзякуючы такой магчымасці, кожны жадаючы зможа асабіста ацаніць шэдэўры сакральнага мастацтва.

У самым пачатку пандэміі ўлады Дзяржавы Ватыкан абвясцілі, што ў сваёй дзейнасці па барацьбе з каронавірусам яны будуць прытрымлівацца распараджэнняў, якія выдаюцца ў сувязі з гэтым у Італіі. Падчас першай хвалі эпідэміі яны прынялі шэраг надзвычайных мер, у прыватнасці, зачынілі с 8 сакавіка Ватыканскія музеі, а таксама ўсе музеі і археалагічныя зоны, якія існуюць пры папскіх базыліках Рыма. З 10 сакавіка быў спынены доступ турыстаў у базыліку св. Пятра і на плошчу перад галоўным каталіцкім храмам свету. Ватыканскія музеі зноў адкрыліся для наведвальнікаў 1 чэрвеня пасля амаль трохмесячнага перапынку, хоць і ў некалькі абмежаваным рэжыме. Месяц таму дырэкцыя прыняла рашэнне аб іх закрыцці.

Ватыканскія музеі былі заснаваны Юліем II у XVI ст. Продаж квіткоў у іх з’яўляецца адной з важных крыніц даходаў у бюджэт Ватыкана.
 

05 снежня 2020, 11:11