Пошук

Vatican News
Кардынал Бэньяміна Стэла Кардынал Бэньяміна Стэла 

Ватыканскі кардынал адказаў на крытыку нямецкіх біскупаў

Інструкцыя Святога Пасаду “Душпастырскае навяртанне парафіяльнай супольнасці на службе евангелізацыйнай місіі Касцёла” выклікала шырокую дыскусію, асабліва ў Касцёле ў Германіі.

Прэфект Кангрэгацыі па справах духавенства, кардынал Бэньяміна Стэла, які працаваў над тэкстам, шкадуе, што дакумент успрымаецца некаторымі настолькі “вузка”.

У інтэрв’ю італьянскай “La Stampa” іерарх заўважыў, што Інструкцыя падкрэслівае асаблівую ролю Эўхарыстыі і ў сувязі з гэтым акцэнтуе ўвагу на святарскім служэнні. Але гэта не значыць, што святар абавязаны ўсё рабіць сам. Ён павінен быць вызвалены ад адміністрацыйнай і бюракратычнай працы, каб прысвяціць сябе душпастырству. Аднак трэба паклапаціцца аб тым, каб парафія не ператварылася ў “філіял прадпрыемства”, якім можа кіраваць любы.

Ватыканскі іерарх абверг абвінавачванні ў тым, што Інструкцыя абцяжарвае святароў адміністрацыйнымі задачамі: наадварот, дакумент мае на мэце перасцерагчы ад канцэпцыі парафіі як “установы” культу.

У ёй падкрэсліваецца, што парафія – гэта “місіянерская супольнасць”, у якую людзі могуць зрабіць уклад у залежнасці ад сваіх харызмаў і кампетэнцый. Гэта павінна дапамагчы святару сканцэнтравацца на важных задачах яго служэння: Эўхарыстыі, прапаведаванні Божага слова, духоўным кіраўніцтве і споведзі, садзейнічанні любові і блізкасці сярод вернікаў, актыўнасці не толькі ў адносінах да вернікаў, але і да тых, хто далёкі ад веры.

Тое, як некаторыя нямецкія іерархі ўспрынялі Інструкцыю, кардынал Стэла назваў “рэдукцыяй”. Ён нагадаў, што па дамоўленасці паміж біскупам, біскупскай канферэнцыяй і Апостальскай Сталіцай цяпер свецкія могуць праводзіць абрады шлюбу і пахавання. Тут ужо дакладна рэгламентавана, што дазволена свецкім вернікам, а што належыць выключна святару.

Аднак існаванне некалькіх магчымасцей для правядзення абрадаў “не павінна прыводзіць нас да функцыяналізму, адарванага ад досведу веры Божага народа”.

У апублікаванай 20 ліпеня 2020 г. інструкцыі Кангрэгацыі па справах духавенства, між іншым, гаворыцца, што свецкія не могуць кіраваць парафіямі, гэтага таксама не можа рабіць група кансэкраваных асоб і свецкіх. Толькі святар можа быць пробашчам.

Ватыканскі дакумент быў па-рознаму прыняты ў Германіі. Некаторыя біскупы назвалі яго “нерэальным і адсталым”. Іншыя іерархі выказалі ўдзячнасць Святому Пасаду – Інструкцыя, на іх думку, вызначае місіянерскі кірунак для Касцёла.

У адказ на жорсткую крытыку, кардынал Стэла заявіў, што будзе рады сустрэцца з прадстаўнікамі нямецкага епіскапату, каб развеяць іх сумневы і абурэнне, - паведаміла нямецкае каталіцкае агенцтва KNA. Сустрэча можа адбыцца тады, “калі біскупы пажадаюць, у зручны для іх час”.
 

31 ліпеня 2020, 13:00