Пошук

Vatican News
Цырымонія інтранізацыі Саака Машаляна Цырымонія інтранізацыі Саака Машаляна  (AFP or licensors)

Дэлегацыя Святога Пасаду на інтранізацыі армянскага Патрыярха

Афіцыйная дэлегацыя Святога Пасаду прыняла ўдзел ва ўрачыстай інтранізацыі 85-га Канстантынопальскага Патрыярха Армянскай Апостальскай Царквы, якая прайшла ў Стамбуле.

11 студзеня 2020 г. на пасаду Патрыярха быў абраны 57-гадовы епіскап Саак Машалян. Выбары праходзілі у сувязі са смерцю яго папярэдніка, архіепіскапа Месропа Мутафяна. Іерарх адышоў у вечнасць 8 сакавіка 2019 г. пасля працяглай хваробы.

У склад ватыканскай дэлегацыі ўвайшлі біскуп Рубэн Тэрабланка Гансалес, Апостальскі вікарый Стамбула і старшыня Канферэнцыі Біскупаў Турцыі, мансеньёр Мігель Мунас Кардаба, супрацоўнік Апостальскай нунцыятуры ў Турцыі, і айцец Іакінф Дэсцівэль, супрацоўнік Усходняй секцыі Папскай рады спрыяння хрысціянскаму адзінству.

Напрыканцы цырымоніі біскуп Тэрабланка Гансалес зачытаў віншавальнае пасланне Святога Айца і ўручыў новаабранаму Патрыярху яго падарунак – нагрудны крыж.

Старшыня Канферэнцыі Біскупаў Турцыі прыгадаў візіты cв. Паўла VI, св. Яна Паўла ІІ, Бэнэдыкта XVI і Францішка ў сядзібу Армянскага Патрыярха ў Стамбуле, а таксама пра візіты ў Рым папярэдняга Прадстаяцеля. У сваю чаргу айцец Іакінф Дэсцівэль пераказаў новаабранаму Патрыярху віншаванні кардынала Курта Коха, старшыні Папскай рады спрыяння хрысціянскаму адзінству.

Патрыярх Саак Машалян нарадзіўся ў 1962 г. у Стамбуле. Скончыў філасофскі факультэт Стамбульскага ўніверсітэта, вывучаў тэалогію ў Лонданскім і Дублінскім універсітэтах. Быў інспектарам армянскіх духоўных семінарый у Іерусаліме і Святым Эчміядзіне. Біскупскую сакру атрымаў у 2008 г. з рук Каталікоса ўсіх армян Гарэгіна ІІ. З ліпеня 2019 г. выконваў абавязкі месцаахоўніка канстантынопальскай патрыяршай кафедры.

Навіна ў фармаце аўдыё
16 студзеня 2020, 13:30