Пошук

Vatican News

Анёл Панскі: шлях служэння з’яўляецца следствам нашага хросту

Святы Айцец, разважаючы перад малітвай Анёл Панскі 17 кастрычніка 2021 г., заахвоціў вернікаў “пагрузіцца” ў Хрыста, ісці за Ім, не шукаць уласных інтарэсаў, але прысвяціць сябе Яго служэнню.

Аляксандр Амяльчэня - Vatican News

Папа спаслаўся на Евангелле ХХIX Звычайнай нядзелі (Мк 10, 35-45), дзе гаворыцца, што “Сын Чалавечы не на тое прыйшоў, каб Яму служылі, але каб служыць і аддаць жыццё сваё для адкуплення многіх”. Адваротныя паводзіны паказалі апосталы Якуб і Ян, якія хацелі сядзець у Валадарстве Божым, адзін справа, а другі злева ад Хрыста. Аднак Збаўца вучыць, што сапраўдная слава дасягаецца не праз узвышэнне сябе, а праз той хрост, які Ён сам хутка прыме ў Ерузалеме.

Езус пагрузіўся ў смерць, аддаўшы сваё жыццё за збаўленне людзей. Таму Яго слава, Божая слава – гэта любоў, якая становіцца служэннем. Вось чаму Ён кажа сваім вучням: “Хто хоча быць найбольшым сярод вас, няхай будзе вам слугою” (Мк 10, 43).

Францішак супаставіў два дзеясловы: паказаць сябе і пагрузіцца. Першы – гэта мышленне гэтага свету: імкнуцца рэалізаваць свае амбіцыі і падняцца па кар'ернай лесвіцы. “Імкненне да асабістага прэстыжу можа стаць хваробай духу, нават калі гэта адбываецца ў добрых намерах; напрыклад, калі за дабром, якое мы робім і абвяшчаем, насамрэч хаваецца толькі пошук сябе і самасцвярджэнне”, - адзначыў Святы Айцец, заахвочваючы вернікаў да вывучэння інтэнцый свайго сэрца.

Папа падкрэсліў, што Езус супрацьпаставіў такому падыходу логіку служэння. Яна выражаецца ў дзеяслове "пагрузіцца". “Езус просіць нас спачувальна пагрузіцца ў жыццё тых, каго мы сустракаем, як Ён зрабіў гэта для нас”, - патлумачыў Францішак.

Папа звярнуў увагу на тое, што шлях служэння з’яўляецца следствам нашага хросту. Гаворка ідзе пра пагружэнне ў Езуса, “якое мы ўжо атрымалі праз ласку і якое вядзе нас, штурхае нас ісці за Ім, не шукаючы ўласных інтарэсаў, але прысвячаючы сябе Яго служэнню”. Ён назваў гэта “агнём, які запаліў у нас Дух Святы і які трэба трымаць распаленым”.

“Сёння папросім Духа Святога абнавіць у нас ласку хросту, пагружэнне ў Езуса, у яго спосаб быцця, у служэнне”, - заахвоціў Францішак у канцы свайго разважання.
 

17 кастрычніка 2021, 12:38

“Анёл Панскі” – гэта старажытная малітва, якая прамаўляецца тройчы на працягу дня – раніцай, апоўдні і вечарам, – на ўспамін таямніцы Уцелаўлення.

Кожную нядзелю і ўрачыстасць Папа сустракаецца з вернікамі апоўдні, каб разам памаліцца яе словамі. Звычайна перад гэтым ён звяртаецца да сабраных з кароткім разважаннем, натхнёным літургічнымі чытаннямі, якія Касцёл прызначае на гэты дзень.

Мінулая марыйная малітва

Чытаць усё >