Пошук

Vatican News
Ілюстрацыйнае фота Ілюстрацыйнае фота  (AFP or licensors)

Відэапасланне Святога Айца да хрысціянскай марской асацыяцыі

Францішак скіраваў відэапасланне да ўдзельнікаў ХІ Сусветнай канферэнцыі аб’яднання “International Christian Maritime Association”, якая з 21 па 25 кастрычніка праходзіць у Тайвані.

Нагодай для паслання Пантыфіка стала 50-годдзе арганізацыі. Яна аб’ядноўвае хрысціянскія душпастырскія службы, якія нясуць дапамогу маракам у 125 краінах свету. Папа пажадаў, каб вынікам сустрэчы стала вызначэнне новых і больш эфектыўных форм дапамогі маракам і рыбакам, а таксама іх сем’ям.

“Яшчэ цалкам актуальным застаецца Апостальскі ліст “Stella maris”, выдадзены ў 1997 г., у якім св. Ян Павел ІІ акрэсліў фундаментальныя напрамкі душпастырскага клопату аб вялікай колькасці людзей, што працуюць у моры, аб іх блізкіх, а таксама аб тых, хто падарожнічае морам. У гэтым дакуменце мой папярэднік заклікаў прыкласці ўсе намаганні, каб “людзі мора мелі ў дастатку сродкі, неабходныя для святога жыцця”, - сказаў Францішак.

Святы Айцец заклікаў прадстаўнікоў “розных хрысціянскіх традыцый”, якія ўваходзяць у склад арганізацыі, дапамагаць “людзям мора пазнаваць Езуса Хрыста і жыць згодна з Яго навучаннем, ва ўзаемнай павазе і адкрытасці адно да аднаго”.“Заклікаю вас перамагаць цяжкасці, якія часам можаце сустрэць у вашай місіі, з перакананасцю прасоўваючы дух экуменізму...”, - сказаў Папа.

“International Christian Maritime Association” (Міжнародная хрысціянская марская асацыяцыя) была заснавана ў 1969 г. У яе склад уваходзіць 28 душпастырскіх службаў розных канфесій. Каталіцкі Касцёл прадстаўлены марскім душпастырствам “Stella Maris”, якое дзейнічае ў больш чым 300 партах у 55 краінах свету.

Навіна ў фармаце аўдыё
21 кастрычніка 2019, 10:42