Sudan:Watoto 190 wameuawa na wengine 1,700 kujeruhiwa tangu mzozo wa vita

Na Angella Rwezaula, - Vatican.

Hali nchini Sudan inaelekea kwenye maafa na watoto wanazidi kukumbwa na mapigano. Wakati hatuwezi kuthibitisha makadirio kutokana na kukithiri kwa ghasia, UNICEF imepokea ripoti kwamba watoto 190 wameuawa na wengine 1,700 kujeruhiwa nchini Sudan tangu mzozo ulizuka karibu wiki tatu zilizopita.Kwa ajili ya watoto wa Sudan, ghasia lazima zikome. Kama ilivyo katika migogoro yoyote, watoto ndio walio hatarini zaidi na ni lazima kila juhudi ifanywe kuwaepusha na madhara. UNICEF inatoa wito kwa wahusika katika mzozo kuzingatia wajibu wao wa kisheria chini ya sheria ya kimataifa ya kibinadamu na kuhakikisha kuwa watoto hawahusiki katika mzozo huo. Hii ni pamoja na kukomesha mashambulizi yote dhidi ya vituo vya afya, shule, mifumo ya maji na vyoo na miundombinu mingine ambayo watoto wanaitegemea.

Pande zote za mzozo ziheshimu sheria za kimataifa

Watoto wamekuwa wakiishi katikati ya ghasia za kutisha kwa karibu majuma matatu na familia nyingi zinahama Sudan na nje ya mipaka yake. Wafanyakazi wa kutoa  misaada pia wameshambuliwa, huku vituo vya misaada ya kibinadamu, magari na vifaa ni pamoja na vile vya UNICEF, vimeporwa au kuharibiwa. “Mashambulizi haya yanahatarisha uwezo wetu wa kufikia watoto kote nchini na huduma za kuokoa maisha za afya, lishe, maji na vyoo”. Kwa hiyo muhimu kwamba pande zinazohusika katika mzozo ziheshimu sheria za kimataifa, kuhakikisha kwamba wahusika wa kibinadamu wanaweza kufanya kazi kwa usalama mashinani ili kusaidia raia walio katika dhiki. Tunatoa wito kwa uingizaji wa bidhaa muhimu za kibinadamu na kibiashara bila vikwazo, bila vikwazo na bila kukatizwa, ikiwa ni pamoja na chakula na mafuta kwa njia ya bahari, anga na barabara, bila kujali ni nani anayedhibiti maeneo haya. UNICEF pia inatoa wito wa kutatuliwa kwa muda mrefu wa mzozo huo wa kisiasa ili watoto wa Sudan wakue katika mazingira ya amani na kutarajia mustakabali wenye matumaini zaidi.