Կիներու հզօրացման ծրագիրի մասնակից 47 հայ կիներու վկայականաց բաշխում

Նախաքրիստոնէական, ապա քրիստոնէական շրջանին եւ մանաւանդ հայ ժողովուրդի պարագային, կինը կը նկատուի ընտանիքին հիմքը: Քրիստոնէութեան մուտքով կնոջ պաշտամունքը արտայայտուած է Աստուածամօր կերպարով: Հետաքրքրական է միջնադարուն գիտնական, գրող եւ քահանայ Մխիթար Գօշի գրած «Դատաստանագիրք»¬ը, որուն մէջ նկարագրուած է ընտանիքի մէջ տղամարդոց ու կիներու դերը, եւ փաստուած է կնոջ կրթութիւն ստանալու անհրաժեշտութիւնը: 19-րդ դարուն Հայ եկեղեցին փորձեց Մխիթար Գօշի գաղափարը` կիներու կրթութիւնը, գործնականի վերածել: Այս առումով, Հայ եկեղեցւոյ իսկ կողմէ օրիորդաց դպրոցներ հիմնուեցան: Այս նախաձեռնութեան շնորհիւ` ի յայտ եկան հայ կին գիտնականներ, գրողներ, մշակութային, պետական, հասարակական եւ քաղաքական գործիչներ:

Մեր հայկական իրականութեան մէջ, Լիբանանի պարագային, կան բարեսիրական, կնոջական կազմակերպութիւններ, որոնք իրենց ընկերային, բժշկական ծառայութեանց կողքին, առանձնայատուկ տեղ յատկացուցած են հայ կնոջ զարգացման, բարօրութեան եւ, ինչո՞ւ ոչ, հզօրացման: Այս առումով, Ճինիշեան յիշատակի հաստատութիւնը վերջին քանի մը ամիսներուն ընթացքին կազմակերպեց Կիներու հզօրացման ծրագիր մը, որ կը նպատակադրէր ձիրքեր ձեռք բերել: Կարի, դէմքի եւ եղունգի խնամքի յատուկ դասարաններու մէջ կիները վաթսուն ժամերու ընթացքին սորվեցան հմտութիւններն ու աշխատանքի ձեւերը: Իսկ դասարան մըն ալ բժշկական ընդհանուր գիտութիւններու դասընթացքներու մասնակցեցաւ:

Կիներու հզօրացման դասընթացքներու վկայականաց բաշխման հանդիսութիւնը տեղի ունեցաւ չորեքշաբթի, 21 փետրուար 2024-ին, կէսօրէ ետք ժամը 5:00-ին, Ազգային առաջնորդարանի «Երջօ Սամուէլեան-Եռագոյն» սրահին մէջ: Սոյն հանդիսութեան ներկայ գտնուեցան Ճինիշեան յիշատակի ձեռնարկի Նիւ Եորքի գրասենեակի ընդհանուր տնօրէն Էլիզա Մինասեան, Ճինիշեանի Հայաստանի տնօրէն Արմէն Յակոբեան, Ճինիշեան յիշատակի ձեռնարկի խորհրդատու մարմինը եւ անձնակազմը:

Բացման խօսքով հանդէս եկաւ Ճինիշեան յիշատակի ձեռնարկի Լիբանանի տնօրէն Քրիստին Դանիէլեան-Սարգիսեան, որ ներկայացուց Ճինիշեան հաստատութեան այլազան ծրագիրները, որոնց մէջ ներառուած էր նաեւ Կիներու հզօրացման ծրագիրը, որուն հետեւեցան քառասունեօթը կիներ, եւ վաթսուն ժամերու ընթացքին անոնք ձեռք բերին կարեւոր տեղեկութիւններ կարի, դէմքի եւ եղունգի խնամքի վերաբերեալ: Ան գնահատեց մասնակցող կիները եւ յոյս յայտնեց, որ յառաջիկայ ամիսներուն իւրաքանչիւրը համապատասխան գործի ձեռնարկած կ՛ըլլայ, որպէսզի իրենց ընտանիքներուն կարենան աւելի լաւ ձեւով օգտակար դառնալ: Քրիստին Դանիէլեան-Սարգիսեան ողջունեց Ճինիշեան յիշատակի ձեռնարկի Նիւ Եորքի ընդհանուր տնօրէնին եւ Հայաստանի տնօրէնին ներկայութիւնը:

Ճինիշեան յիշատակի ձեռնարկի Նիւ Եորքի գրասենեակի ընդհանուր տնօրէն Էլիզա Մինասեան իր սրտի խօսքին մէջ գնահատեց այս ծրագրի նախաձեռնութիւնը  եւ իր ուրախութիւնը յայտնեց` ի տես այս ծրագրի յաջողութեան: Ան գնահատեց այս ծրագրի նախաձեռնութիւնը եւ լուսարձակի տակ առաւ մեծ թիւով կիներու մասնակցութիւնը` ձիրքեր ձեռք բերելու: Ան ըսաւ, որ հայրենիքի մէջ այս գործերը մեծ արժէք ունին: Էլիզա Մինասեան մաղթեց, որ Կիներու հզօրացման ծրագիրը ծառայէ ի սպաս լիբանանահայ գաղութի եւ մեր ընտանիքներու բարգաւաճման:

Այնուհետեւ, ձեռամբ ընդհանուր տնօրէնին, Կիներու հզօրացման ծրագիրի 47 մասնակից կիները ստացան իրենց վկայականները:

Տեղին է նշել, որ այս առիթով Ճինիշեանի պարմանուհիներու խումբը ներկայացուց գեղարուեստական յայտագիր` երգ, ասմունք, պար:

Աղբիւրը` Ազդակ