Ուաշինկթըն. «Հայաստանի գերիշխանութեան եւ տարածքային ամբողջականութեան որեւէ խախտում լուրջ հետեւանքներու պիտի յանգեցնէ»

Միացեալ Նահանգներու արտաքին գործոց նախարարութիւնը վերահաստատած է իր վճռական աջակցութիւնը Հայաստանի գերիշխանութեան ու տարածքային ամբողջականութեան` պատասխանելով «Ամերիկայի Ձայն»-ի հայկական ծառայութեան Լեմքինի հիմնարկի Հայաստանի եւ Ազրպէյճանի մասին հնչեցուցած մտահոգութեան վերաբերեալ հարցումին:

Յիշեցնենք, որ Լեմքինի Ցեղասպանութեան կանխարգիլման հիմնարկը 31 հոկտեմբերին յայտարարած էր կարմիր դրօշի ահազանգ եւ խոր մտահոգութիւն յայտնած յառաջիկայ օրերուն եւ շաբաթներուն Ազրպէյճանի կողմէ Հայաստան ներխուժելու հաւանականութեան մասին:

Պատասխանելով «Ամերիկայի ձայն»-ի հարցումին` Միացեալ Նահանգներու արտաքին գործոց նախարարութիւնը շեշտած է, որ Հայաստանի «գերիշխանութեան եւ տարածքային ամբողջականութեան որեւէ խախտում լուրջ հետեւանքներու պիտի յանգեցնէ»:

«Միացեալ Նահանգներ վճռականօրէն կ՛աջակցի Հայաստանի գերիշխանութեան եւ տարածքային ամբողջականութեան: Մենք ընդգծած ենք, որ այդ գերիշխանութեան եւ տարածքային ամբողջականութեան որեւէ խախտում լուրջ հետեւանքներու պիտի յանգեցնէ: Մենք պարբերաբար կը շեշտենք մեր ակնկալութիւնները, օրինակ` ուժի կիրարկման դէմ յորդորը, եւ շարունակաբար կը հետեւինք կացութեան:

«Հայաստանը Միացեալ Նահանգներու մտերիմ գործընկերն ու բարեկամն է, եւ մենք կ՛ակնկալենք աշխատիլ Հայաստանի իշխանութիւններուն հետ` ամրապնդելու համար Հայաստանի քաղաքական եւ տնտեսական անվտանգութիւնը», նշած է Միացեալ Նահանգներու արտաքին գործոց նախարարութիւնը:

Աղբիւրը՝ Ազդակ